Ecclesiastes 3

Kamba (Mbivilia) 1956

← Chapter 2 Jump to: Chapter 4 →

1Kwondũ wa kĩla kĩndũ ve ĩvinda, na ĩvinda kwondũ wa kĩla ũndũ ĩtheo wa ĩtu:

2ĩvinda ya kũsyawa, na ĩvinda ya kũkw’a; ĩvinda ya kũvanda, na ĩvinda ya kũkũa kĩla kĩvande;

3ĩvinda ya kũaa, na ĩvinda ya kũvosya; ĩvinda ya kũomboa, na ĩvinda ya kwaka;

4ĩvinda ya kũĩa, na ĩvinda ya kũtheka; ĩvinda ya kũmeta, na ĩvinda ya kũsunga;

5ĩvinda ya kwĩkya mavia, na ĩvinda ya kũmban’ya mavia; ĩvinda ya kwĩvĩtĩĩsya, na ĩvinda ya kũlea kwĩvĩtĩĩsya;

6ĩvinda ya kũmantha, na ĩvinda ya kwasya; ĩvinda ya kũsũvĩa, na ĩvinda ya kwĩkya ũtee;

7ĩvinda ya kũtembũa, na ĩvinda ya kũtuma; ĩvinda ya kũvindya, na ĩvinda ya kũneena;

8ĩvinda ya kwenda, na ĩvinda ya kũmena; ĩvinda ya kaũ, na ĩvinda ya mũuo.

9Mũtethya wa wĩa e na ũunĩko mwaũ ũndũnĩ ũla ũtethasya?

10Nĩnonete thĩna ũla Ngai ũnengete ana ma andũ mathĩnaw’e nĩw’o.

11Nũseũvĩtye kĩla kĩndũ kĩthĩwe kĩseo mũno ĩvindanĩ yakyo: o na nĩwiĩte nthĩ yonthe ngoonĩ syoo, o na ũu w’onthe mũndũ ndatonya kũmanya wla ũla Ngaĩ ũtethetye kuma mwambĩlĩyonĩ o kũvika mũminũkĩlyo.

12Nĩnĩsĩ vati ũndũ ũseo kwoo, kwĩ kũtana na kwĩka ũseo o yĩla me thayũ.

13Na ĩngĩ nĩ mũthĩnzĩo wa Ngaĩ kana kĩla mũndũ aye na kũnyw’a, na kũtanĩa ũseo wĩanĩ wake w’onthe.

14Nĩnĩsĩ atĩ o ũla Ngai wĩkaa, ũkekalaa tene na tene: vati ũndũ ũtonya wongeleelwa ũndũnĩ ũsu, kana ũndũ o na wĩva kũolwa; na Ngai nĩwĩkĩte ũu, nĩ kana andũ mamũkĩe.

15Kĩla kĩ yu, kyaĩ o kw’o tene mũno; na kĩla kĩkeethĩwa kyaĩ o kw’o tene mũno: na Ngai nũmanthaa ĩngĩ kĩla kĩvĩtĩte.

16Na ĩngĩ noona ĩtheo wa syũa, vandũnĩ va ũsili wa katĩ, atĩ ũthũku wĩ o vo, na vandũnĩ va ũlũngalu, atĩ ũthũku wĩ o vo.

17Naisye ngoonĩ yakwa, Ngai akasilĩla alũngalu na athũku; nũndũ kwĩ ĩvinda kw’o kwondũ wa kĩla ũndũ na kĩla wĩa.

18Naisye ngoonĩ yakwa, Nĩ ũndũ wa ana ma andũ, nĩ kana Ngai amatate, na nĩ kana mone atĩ mo ene no ta nyamũ.

19Nũndũ ũndũ ũla ũkwataa ana ma andũ, nũkwataa nyamũ, kwĩkĩkaa o ũndũ ũmwe kwoo: o ũndũ ũmwe ũkusaa, now’o ĩla ĩngĩ ĩkusaa; ĩĩ, onthe me na mũvevo ũmwe; na mũndũ nde na ũnene kwĩ nyamũ: nũndũ onthe nĩ ma mana.

20Onthe maendaa vandũ vamwe; onthe nĩ ma kĩtoo, na onthe masyokaa ĩngĩ kĩtoonĩ.

21Nũũ ũla wĩsĩ veva wa mũndũ, ethĩwa wambataa ĩũlũ, na veva wa nyamũ, ethĩwa ũtheeaa nthĩ?

22Kwondũ wa ũu noonie vati ũndũ ũseo mbee, kwĩ mũndũ kũtanĩa mawĩa make; nũndũ kyu nĩkyo kĩanda kyake: nũndũ nũũ ũla ũkamũete ĩngĩ one ũndũ ũkethĩwa ĩtina wake?

← Chapter 2 Jump to: Chapter 4 →