Ecclesiastes 2

Kamba (Mbivilia) 1956

← Chapter 1 Jump to: Chapter 3 →

1Nĩnaneenie ngoonĩ yakwa, Ũka yu, ngakwĩkuũa na motanu; kwondũ wa ũu ĩw’ĩa mũyo motanunĩ: na, sĩsya, ũu naw’o waĩ wa mana.

2Naisye ũndũ wa kũtheka, Nĩkũũũka; na ũndũ wa ũtanu, Wĩkaa ata?

3Namanthie ngoonĩ yakwa ũndũ ndonya kũtanĩthya mwĩĩ wakwa na mbinyu, ngoo yakwa ĩkĩndongoesya na ũĩ, na ũndũ ndonya kũkwata ũtumanu, kũvika ndonye kwona ũseo ũla ana ma andũ maĩle kwĩka ĩtheo wa ĩtu mĩthenya yonthe ya thayũ woo.

4Nĩneeseũvĩsye mawĩa manene, nĩneeyakĩe nyũmba mbingĩ; nĩneevandĩe mĩũnda ya mĩsavivũ;

5nĩneeseũvĩsye mĩũnda na kũndũ kwanake vyũ, na navanda mĩti nthĩnĩ wa kw’o ya mĩthemba yonthe ya matunda;

6nĩneeseũvĩsye ndia sya manzĩ, nĩnyithasye na manzĩ asu mũtitũ kũla kũvandĩtwe mĩtĩ mĩnini yĩane;

7nĩnathooie athũkũmi aũme na eĩtu, na naĩ na athũkũmi ala masyaĩwe nyũmbanĩ yakwa; o na naĩ na ũthwii wa ndĩthya sya ng’ombe na sya mbũi na malondu, kwĩ onthe ala maĩ Yelusaleme mbee wakwa;

8o na nĩneeyũmbanĩsye vetha na thaavu, na ũthwii wa asumbĩ na wa ilungu nene sya nthĩ; nĩneeyosee aini aũme na aini aka, na motanu ma ana ma andũ, na syĩndũ sya kũinga, nasyo syaĩ sya mĩthemba yonthe.

9Kwondũ wa ũu naĩ mũnene, na naingĩvĩwe kũvĩtũka onthe ala maĩ Yelusaleme mbee wakwa: o na ũĩ wakwa nĩwekalaa nakwa.

10Na o kĩla metho makwa mendaa ndyaamavata; ndyaaima ngoo yakwa ũtanu o na wĩva; nũndũ ngoo yakwa yatanaa nũndũ wa wĩa wakwa w’onthe; na ũu waĩ kĩanda kyakwa kwondũ wa wĩa wakwa w’onthe.

11Na ĩndĩ nasisya wĩa w’onthe ũla moko makwa meekie, na wĩa ũla neethĩnĩsye kũtethya; na, sisya, w’onthe waĩ mana na ta kũsemban’ya na kĩseve, na kũtyaĩ ũunĩko ĩtheo wa syũa.

12Na ĩndĩ neethyũũa nĩsisye, ũĩ, na ũũũki, na ũtumanu: nũndũ mũndũ ũla wĩũka ĩtina wa mũsumbĩ atonya kwĩka ata? No maũndũ asu ala mathelile kwĩkwa tene.

13Na ĩndĩ noona kana ũĩ nũvĩtũkĩte motanu kũasa, o tondũ kyeni kĩvĩtũkĩte kĩvindu.

14Metho ma mũndũ mũĩ me mũtwe kwake, na ndia nĩkinyaa kĩvindunĩ: ĩndĩ noona atĩ ũndũ ũmwe nĩwĩkĩkaa kwa onthe.

15Nĩvo ĩndĩ naisye ngoonĩ yakwa, O tondũ kwĩkĩkaa kwa ndia, now’o kũkekĩka kwakwa; na ĩndĩ naĩ na ũĩ mũvĩtũku ata? Na ĩndĩ nasya ngoonĩ yakwa, o na ũu naw’o nĩ wa mana.

16Nũndũ ũndũ wa mũndũ mũĩ, now’o kwa ndia, kũtĩ ũlilikano tene na tene; nũndũ mĩthenya ĩla yũkĩte onthe makethĩwa moolile tene. Na kaĩ mũndũ mũĩ nũkusaa o ta ndia!

17Kwondũ wa ũu namena thayũ, nũndũ wĩa ũla ũtethaw’a ĩtheo wa syũa, waĩ thĩna kwakwa; nũndũ w’onthe nĩ wa mana na ta kũsemban’ya na kĩseve.

18Na namena wĩa wakwa w’onthe ũla neethĩnĩsye ĩtheo wa syũa, nũndũ no mũvaka nĩũtiĩe mũndũ ũla ũkethĩwa ĩtina wakwa.

19Na ũla wĩsĩ nũũ ethĩwa akethĩwa mũndũ mũĩ kana ndia? Ĩndĩ nake akethĩwa ĩũlũ wa wĩa wakwa w’onthe ũla neethĩnĩsye, na ũla neeyonanĩthisye nĩ mũĩ nthĩnĩ waw’o ĩtheo wa syũa. Ũu naw’o nĩ wa mana.

20Kwondũ wa ũu nĩneethyũũie nĩtume ngoo yakwa ĩyĩtũka ũndũ wa wĩa w’onthe ũla neethĩnĩsye ĩtheo wa syũa.

21Nũndũ kwi mũndũ ũla ũtethasya wĩa wake na ũĩ, na ũmanyi, na ũtuĩka; ĩndĩ akootiĩa mũndũ ũla ũtaotethya wĩthĩwe kĩanda kyake. Ũu naw’o nĩ wa mana, na ũthũku mũnene.

22Nũndũ mũndũ e na kyaũ kwondũ wa wĩa wake w’onthe, na kĩthing’ĩĩsyo kya ngoo yake, ũla weethĩnĩsye nthĩnĩ wakyo ĩtheo wa syũa?

23Nũndũ mĩthenya yake yonthe no mawoo, na thĩna wake no woo; ĩĩ, o na ũtukũ ngoo yake ndĩthũmũaa. O na ũu naw’o nĩ wa mana.

24Kũti ũndũ ũseo kwa mũndũ kũvĩtũka kũya na kũnyw’a, na kũtuma thayũ wake kũtanĩa ũseo wĩanĩ wake. Na ũu naw’o noona atĩwumĩte kw’okonĩ kwa Ngai.

25Nũndũ nũũ ũtonya kũya, kana nũũ ũtonya kwĩthĩwa na ũtanu, kwĩ nyie?

26Nũndũ mũndũ ũla ũmwendeeasya Ngai nũmũnengae ũĩ, na ũmanyi, na ũtanu; ĩndĩ nũnengae mũndũ mwathe thĩna, kũmban’ya na kwongeleela, nĩ kana amũngenge ũla ũmwendeeasya Ngai. Ũndũ ũu naw’o nĩ mana na ta kũsemban’ya na kĩseve.

← Chapter 1 Jump to: Chapter 3 →