Hebrews 1

Kamba (Mbivilia) 1956

Jump to: Chapter 2 →

1Ngai, ũla waneenie na aasa tene nthĩnĩ wa athani na ilungu nyingĩ na nzĩa nyingĩ,

2mũminũkĩlyo wa mĩthenya ĩno nũneenete naitũ nthĩnĩ wa Mwana wake, ũla wamwiie ethĩwe mũtiĩwa wa syĩndũ syonthe, na kwondũ wake oombie nthĩ syonthe;

3nake nĩkwĩthĩwa nĩ kyeni kya ũtheu wake mũtisu, na mũvw’ano ki wa mũvw’anĩle wake, na nĩwĩkalasya syĩndũ syonthe na ndeto ya vĩnya wake, amina ũthesyo wa naĩ, ekala ngalĩ ya kw’oko kwa aũme kwa Ũnene ĩũlũ;

4nĩkwĩthĩwa nũtw’ĩkĩte mũseo mũno kũvĩtũka alaĩka, o tondũ syĩtwa yake ya ũtiĩwa yĩvĩtũkĩte mũno masyĩtwa moo.

5Nũndũ nĩ wĩva wa alaĩka ũla, o na ĩvinda yĩva, weiwe, We, nue Mwana wakwa, Ũmũnthĩ nĩnaũsyaa? Na ĩngĩ, Ngeethĩwa Ĩthe wake, Nake akeethĩwa Mwana wakwa?

6Na aimũete ĩngĩ mũsyawa wa mbee kũũ nthĩ easya, Na alaĩka onthe ma Ngai nĩmamũthaithae.

7Na ũvoo wa alaĩka easya, Ũla ũtusaa alaĩka make iseve, Na athũkũmi make kĩtw’ĩki kya mwaki:

8ĩndĩ ũvoo wa Mwana easya, Kĩvĩla kyaku kya ũsumbĩ, we Ngai, nĩ kya tene na tene; Na ndata ya ũsumbĩ ya ũlũngalu nĩyo ndata ya ũsumbĩ waku.

9We, nĩwendete ũlũngalu, na kũmena ũthũku; Kwondũ wa ũu Ngai, Ngai waku, nĩwakwĩtĩkĩsye mauta, Namo nĩ mauta ma ũtanu, kũvĩta atindan’ya maku.

10Na ĩngĩ, We, Mwĩaĩi, mwambĩlĩlyonĩ nĩwakwatisye wambĩlĩlyo wa nthĩ, Na matu nĩ mawĩa ma moko maku:

11Syo ikanangĩka; ĩndĩ we nĩwĩkalaa: Na syonthe ikakũa o ta ngũa;

12Na ũkaikũnza ta ngũa ya ĩũlũ, Nasyo ikaalyũka ta ngũa: Ĩndĩ we nue ũla wĩkalaa o ũndũ ũmwe, Na myaka yaku ndĩkathela.

13Ĩndĩ nĩ wĩva wa alaĩka ũla, o na ĩvinda yĩva, weiwe, Ĩkala ngalĩ ya kw’oko kwakwa kwa aũme, Mũvaka natw’a amaitha maku kavĩla ka nyaĩĩ syaku?

14Asũ onthe ti maveva ma ũthũkũmi, ala matũmitwe kũthũkũma kwondũ wa ala makatiĩwa ũtangĩĩo?

Jump to: Chapter 2 →