Hebrews 5

Kamba (Mbivilia) 1956

← Chapter 4 Jump to: Chapter 6 →

1Nũndũ kĩla mũthembi mũnene, aumĩtw’e katĩ wa andũ, aiĩtwe kwondũ wa andũ maũndũnĩ ala melekele Ngai, nĩ kana athembe mĩthĩnzĩo na nthembo kwondũ wa naĩ:

2ũla ũtonya kũmĩĩsya e mũuu kwa ala mate na ũmanyi na ala mavĩtasya, nũndũ we mwene nũthyũlũlũkĩtwe nĩ wonzu;

3na kwondũ wa ũu nĩwaĩlwe nĩ kũthemba kwondũ wa naĩ, ũndũ wa naĩ sya andũ o na syake mwene.

4Na vai mũndũ ũkwĩyosea mwene ndaĩa ĩsu, no ũla wĩĩtwa nĩ Ngai, o ta Aluni.

5Ta ũu Klĩsto nake ndaaĩnenevya mwene atuwe mũthembi mũnene, ĩndĩ nĩ ũla waneenie nake, We nue Mwana wakwa, Ũmũnthĩ nĩnaũsyaa:

6o tondũ easya vandũ vangĩ, We wĩ mũthembi wa tene na tene O ta ũndũ Melikiseteki wailyĩ.

7Ũla, matukũ ma mwĩĩ wake, wamũvoyie ũla waĩ atonya kũmũtangĩĩa kũmumya kĩkw’ũnĩ, na mboya na mawĩsũvano vamwe na kũĩa mũno na methoi, na eethukĩĩw’a nũndũ wa kũmũkĩa Ngai,

8o na kau aĩ Mwana, eemanyĩsya kwĩw’aa ũndũ wa mathĩna ala mamũkwatie;

9na eanĩw’a, atw’ĩka mwambĩlĩlya wa ũtangĩĩo wa tene na tene kwa onthe ala mamwĩw’aa;

10ũla wetiwe nĩ Ngai ethĩwe mũthembi mũnene o ta ũndũ Melikiseteki wailyĩ.

11Twĩ na maũndũ maingĩ ma ũneena ũvoonĩ wake, namo nĩ vinya kũmavuan’ya nũndũ mũtw’ĩkĩte andũ ala matew’aa nesa.

12Nũndũ wa ĩvinda ĩasa yĩvĩtĩte mwaĩle kwĩthĩwa mwĩ amanyĩsya, ĩndĩ mwĩ na vata wa mũndũ kũmũmanyĩsya ĩngĩ momanyĩsyo ma mbee ma ndeto ila syaneeniwe nĩ Ngai; na mũtw’ĩkĩte ala me na vata wa ĩia, na ti lĩu mũmũ.

13Nũndũ kĩla mũndũ ũnyusaa ĩia ndesĩ mũno ndeto ya ũlũngalu; nũndũ nĩ kana kanini.

14Ĩndĩ lĩu mũmũ nĩ wa andũ aima, ala, nũndũ wa kwĩmanyĩsya, ilĩko syoo nimanyĩĩtw’e kũvathũkan’ya ũseo na ũthũku.

← Chapter 4 Jump to: Chapter 6 →