Hebrews 12

Kamba (Mbivilia) 1956

← Chapter 11 Jump to: Chapter 13 →

1Kwondũ wa ũu ithyĩ naitũ, nĩkwĩthĩwa nitũthyũlũlũkĩtwe nĩ mũumbĩ mũnene wĩana ũu wa ngũsĩ, nĩtwie ũtee kĩla kĩũtũvata kũthi kyonthe, na naĩ ĩla ĩtũsiĩiaa na ũvũthũ, na tũsembe na wũmĩĩsyo ũkĩlan’yonĩ ũla wiĩtwe mbee waĩtũ,

2tũkĩmũsisya Yesũ, mwambĩlĩlya na mwĩanisya wa mũĩkĩĩo witũ, ũla kwondũ wa ũtanu ũla waiiwe mbee wake oomĩĩsya ĩla ngelan’yo, aivũthya nthoni, na nĩwekalile nthĩ ngalĩ ya kw’oko kwa aũme kwa kĩvĩla kya ũsumbĩ kya Ngai.

3Sũanĩai mũno ũla womĩĩsye mosiĩĩo mailyĩ ũu ma ala athe, nĩ kana mũikanoe, mũkĩteva ngoonĩ syenyu.

4Mũinamba kũkita kũvika kwĩtĩkya nthakame, mũkyũkita na naĩ:

5na nĩmũlĩtwe nĩ ũtao ũla ũmũtaa inyw’ĩ ta mwĩ ana, Mwana wakwa, ndũkone ta ũndũ ũnini kũsilĩlwa nĩ Mwĩaĩi, Kana ndũkateve yĩla ũkũkanw’a nĩwe;

6Nũndũ ũla Mwĩaĩi ũmwendaa nũmũsilĩlaa, Na kũvũa kĩla mwana ũla wosaa.

7Nĩ kwondũ wa kũsilĩlwa mũmĩĩasya; Ngai amwĩkaa ta ana; nũndũ nĩ mwana wĩva ũla ũtasilĩlawa nĩ ĩthe?

8Ĩndĩ ethĩwa mũtiũsilĩlwa, ũndũ onthe mekawa, mwi ana ma ũlaalainĩ, na ti ana ma w’o.

9Na vamwe na ũu, twaĩ na aaĩthe maitũ ma mwĩĩ matũsilĩlaa, na nĩtwamataĩaa: ti kavaa mũno kũmwĩnyivĩsya Asa wa maveva maitũ, na kwĩthĩwa thayũ?

10Nũndũ nĩ w’o asu vandũ va matukũ manini matũsilĩlaa o ũndũ moonaa ta ũseo; ĩndĩ we kwondũ wa kũtũuna, nĩ kana twĩthĩwe osi ma ũtheu wake.

11Kũsilĩlwa kw’onthe ĩvinda yĩĩ kũioneka ta ũndũ wa ũtanu ĩndĩ ta ũndũ wa woo; ĩndĩ ĩtina nĩkũmaeteae ala mamanyĩĩtw’e nĩkw’o ũsyao wa mũuo naw’o nĩ ũsyao wa ũlũngalu.

12Kwondũ wa ũu ũkĩlyai moko ala maleelu, na maũũ ala monzu;

13na seũvĩsyai nyaĩĩ syenyu nzĩa ndũngalu, nĩ kana mutha ũla ũthuaa ndũkavĩtĩthw’e, ĩndĩ kavaa ũvow’e.

14Manthai kwĩthiwa na mũuo na andũ onthe, na kũvathwa mwĩthĩwe atheu kũla mũndũ ate nakw’o ndakamwona Mwĩaĩi:

15mũkĩsisya mũno mũndũ o na wĩva ndakatiale kũvikĩa ũla mumo wa Ngai; kĩtina kya ũũ kĩikathongooe na kũmũthĩn’ya, na kwondũ wakyo aingĩ kũvukw’a;

16kũikethĩwe kĩlaalai, kana ũla ũtamũkĩaa Ngai, ta Esau, ũla nũndũ wa kya ũya kĩmwe wathooisye ũtiĩwa wa ũkithathi wake.

17Nũndũ nĩmwĩsĩ kana o na ĩtina yĩla wendie kũtiĩwa ũla ũathimo, nĩwaleilwe; nũndũ ndaaona ũthei wa kwĩalyũla, o na kau nĩwomanthie mũno na methoi.

18Nũndũ mũtyaavikĩa kĩĩma kĩla kĩtonya ũkiitwa, na kĩla kyakanie mwaki, o na wiũ, na kĩvindu, na kĩuutani,

19na wasya wa soo, na wasya wa ndeto; na ala meewie wasya ũsu meesũvana maikatavw’e ndeto ĩngĩ;

20nũndũ matyaatonya kũmĩĩsya ũndũ weeaiwe, atĩĩ, Ethĩwa o na nyamũ ĩkakiita kĩĩma kyu, ĩkooawa na mavia;

21ũndũ ũsu woonekie waĩ wa kwĩw’ĩthya w’ĩa mũno, o ũndũ Mose waisye, Nĩnalikwa nĩ w’ĩa mũno na kũtetema:

22ĩndĩ inyw’ĩ mũvikĩe kĩĩma kya Saioni, na mũsyĩ wa Ngai ũla wĩ thayũ, Yelusaleme wa itunĩ, na nguthu sya alaĩka ngili nyingĩ,

23na ũmbano mũnene, naw’o nĩ ĩkanisa ya ala masyaiwe mbee ala maandĩkiwe ĩtunĩ, na kwa Ngai Mũsili wa andũ onthe, na maveva ma andũ alũngalu ala meanĩwe,

24na kwa Yesũ mwĩw’anĩthya wa ũtianĩo mweũ, na nthakame ya kũminzangisya ĩla ĩneena nesa kwĩ ĩla ya Aveli.

25Sisyai mũikamũlee ũla ũneenaa. Nũndũ ethĩwa asu matyaavonoka ala mamũleile ũla wamataĩe kũũ nthĩ, mbee mũno ithyĩ tũikavonoka twamwĩthyũũĩa na kũmũtia ũla ũtũ taa e ĩtunĩ:

26ũla wasya wake wathingithisye nthĩ: ĩndĩ yu nĩwathanĩte, akyasya, No ĩngĩ ĩmwe ngathingithya, tĩ nthĩ yoka, ĩndĩ o na itu nayo.

27Na ndeto ĩno, No ĩngĩ ĩmwe, nĩyonanasya kũvetwa kwa syindũ ila itonya kũthingithw’a, ta syĩndũ ila syoombiwe, ni kana syĩndũ ila itatonya kũthingithw’a itonye kwĩkala.

28Kwondũ wa ũu, tũkyosa ũsumbi ũla ũtatonya kũthingithw’a, nĩtwĩthĩwe na mumo, naw’o kwondũ waw’o tũtonya kũmũnenga Ngai ũthũkũmi ũla wĩmwendeesya vamwe na ũtaĩo na kũmũkĩa:

29nũndũ Ngai waitũ nĩ mwaki ũĩsaa.

← Chapter 11 Jump to: Chapter 13 →