Hebrews 11

Kamba (Mbivilia) 1956

← Chapter 10 Jump to: Chapter 12 →

1Na ĩndĩ mũĩkĩĩo nĩ kĩla kĩmanyĩthasya vyũ maũndũ ala mekwatĩtw’e, na nĩ kĩla kĩĩkĩĩthasya maũndũ ala matonekaa.

2Nũndũ kwondũ waw’o atumĩa ma tene nĩmakũsĩĩwe.

3Kwondũ wa mũĩkĩĩo nĩtũũmanya kana nthĩ nĩsyoombiwe na ndeto ya Ngai, na syĩndũ ila syonekaa ĩtyaaũmbwa kuma syĩndũnĩ syenekee.

4Kwondũ wa mũĩkĩĩo Aveli nĩwamũthembeie Ngai nthembo nzeo kũvĩta ĩla ya Kaini, na kwondũ wayo nĩwakũsĩĩwe atĩ aĩ mũlũngalu, Ngai aikũsĩĩa mĩthĩnzĩo yake: na kwondũ waw’o o na kau nũkw’ĩte aneenaa kũvika o na yu.

5Kwondũ wa mũikĩĩo Enoku nĩwambatiw’e ndakone kĩkw’ũ; na ndaoneka, nũndũ Ngai nĩwamwambatisye: nũndũ mbee wa kwambatw’a kwake nĩwakũsĩĩwe kana nĩwamwendeeasya Ngai:

6na vate mũĩkĩĩo kũitonyeka kũmwendeesya; nũndũ ũla wũkaa kwa Ngai mũvaka etĩkĩle kana e vo, na ĩngĩ kana nũmanengae ĩtuvi ala mamũmanthaa.

7Kwondũ wa mũĩkĩĩo Noa, ooniw’e nĩ Ngai ũvoo wa maũndũ ala matanamba kwoneka, ũndũ wa kũmũkĩa Ngai, nĩwaseũvisye ngalawa avĩtye nyũmba yake; na kwondũ waw’o asilĩla nthĩ, na atw’ĩka mũtiĩwa wa ũlũngalu ũla wonekaa kwondũ wa mũĩkĩĩo.

8Kwondũ wa mũĩkĩĩo Avalaamu, eetwa, eew’a, na auma athi vandũ vala wĩnengwa ũtiĩwa; na auma, atesi vala ũnũũthi.

9Kwondũ wa mũĩkĩĩo atw’ĩka mwĩkali wa ũeninĩ nthĩ ĩla ya watho, ta nthĩ ĩte yake, akĩkala maeemanĩ vamwe na Isaka na Yakovo, atiĩwa vamwe nake ma watho o ũsu:

10nũndũ nĩweteelaa onw’e ndũa ĩla yĩ na myambĩlĩlyo, na mwambĩlĩlya na mwaki wayo nĩ Ngai.

11Kwondũ wa mũĩkĩĩo o na Sala anengiwe vinya wa kũitava yĩla weyĩtũkĩte, nũndũ nĩwamwonie e kĩthito ũla wamwathie:

12kwondũ wa ũu masyaiwe nĩ ũmwe, nake aĩ ta mũkw’ũ, andũ aingĩ o tondũ ndata sya ĩtunĩ singĩvĩte, na ta kĩthangathĩ kĩla kĩ ũtee wa ũkanga kĩtatalĩka.

13Asu onthe nĩmakwie mũĩkĩĩonĩ, matosete matho, ĩndĩ mamonete me kũasa na kũmatanĩa, na makĩtĩkĩla kana maĩ aeni na aendĩ ma kyalo ĩũlũ wa nthĩ.

14Nũndũ ala maneenaa ndeto ta isu meonan’ya vyũ kana memantha nthĩ yoo ene.

15Na kethĩwa nĩmalilikanile nthĩ ĩla maumie, methĩwa maĩ na ũthei wa kũalũka.

16Ĩndĩ yu mendaa nthĩ nzeo mbee, nayo nĩ ĩtunĩ: kwondũ wa ũu Ngai ndeũsonoka kwondũ wamo kwĩtwa Ngai woo, nĩkwĩthĩwa nũmaseũvĩsye ndũa.

17Kwondũ wa mũĩkĩĩo Avalaamu, atatwa, aumya Isaka ethĩwe nthembo: ĩĩ, we ũla wosete na ũtanu ala matho aĩ anathemba mwana wake ũla wasyaiwe e weka;

18we, ũla weiwe, Ũsyao waku ũkeetwa nthĩnĩ wa Isaka:

19aitala kana Ngai nũtonya kũmũthayũũkya o na kũmumya akw’ũnĩ; na kuma vo amwosa ĩngĩ kwa ngelekan’yo.

20Kwondũ wa mũĩkĩĩo Isaka amaathima Yakovo na Esau, o na ũvoonĩ wa maũndũ ala makoka.

21Kwondũ wa mũĩkĩĩo Yakovo, yĩla wakussa, aathima ana elĩ ma Yosevu; na athaitha, etw’ĩĩkĩte na mũthya wa ndata yake.

22Kwondũ wa mũĩkĩĩo Yosevu, yĩla mũminũkĩlyo wake waĩ vakuvĩ, aweta ũvoo wa kuma kwa ana ma Isilaeli; na eeaa ũndũ wa mavĩndĩ make.

23Kwondũ wa mũĩkĩĩo Mose, asyawa, avithwa myei ĩtatũ ni ala mamũsyaie, nũndũ moonie e kana kaseo; na matyaakĩa mwĩao wa mũsumbĩ.

24Kwondũ wa mũĩkĩĩo Mose, yĩla waĩ aneana, nĩwaleile kwĩtwa mwana wa mwĩĩtu wa Valao;

25akĩnyuva kavaa kũthĩnw’a vamwe na andũ ma Ngai, kwi kũtana maũndũnĩ ma naĩ ĩvinda;

26aitala kũvũthw’a kwa Klĩsto nĩ ũthwii mwingi kũvĩta ũthwii wa Misili, nũndũ nĩwasyaisye ituvi yĩla yĩkanenganwe.

27Kwondũ wa mũĩkĩĩo niwaumie Misili: ateũkĩa ũthatu wa mũsumbĩ: nũndũ nĩwomĩisye ta ũmwonaa ũla ũtonekaa.

28Kwondũ wa mũĩkĩĩo nĩwalilikanile Vasaka na aminzangisya nthakame, nĩ kana ũla mwanangi wa ala masyaiwe mbee ndakamakiite.

29Kwondũ wa mũĩkĩĩo nĩmavĩtĩle Ũkanganĩ Mũtune katĩ, ta kũvĩtĩla nthĩ nyũmũ: na Amisili matata kwĩka ũu mamelw’a.

30Kwondũ wa mũĩkĩĩo maũvai ma Yeliko mavalũka, ĩtina wa kũthyũlũlũkwa mĩthenya mũonza.

31Kwondũ wa mũĩkĩĩo Laavi yĩla ĩlwaya ndaanangwa vamwe na ala maleile kwĩw’a, nũndũ athokisye athiani na mũuo.

32Na nĩneena ũndũ ũngĩ wĩva? Nũndũ ĩvinda yĩimbĩanĩa ethĩwa nĩngũweta ũvoo wa Ngiteonĩ, na Mbalaka, na Samusoni, na Yevitha; na wa Ndaviti na Samueli na athani:

33ala kwondũ wa mũĩkĩĩo makĩlilye mosumbĩ vinya, meekie ũlũngalu, moosie matho, matumisye makanyw’a ma mĩnyambũ,

34mavoisye vinya wa mwaki, mavonokie ũĩ wa ũvyũ, yĩla maĩ onzu meekĩiwe vinya, maĩ ai kaũnĩ, malũngilye ita sya aeni

35Aka nĩmoosie akw’ũ moo ala mathayũũkiw’e: na angĩ mathĩniw’e na mathĩna mai, matekwĩtĩkĩla kũthaw’a; nĩ kana mone ũthayũũkyo mũseo kwĩ ũsu:

36na angĩ maĩ na matatwa ma kũvũthw’a na kũkũnwa mũno, ĩĩ, o na kwovwa na kwĩkĩwa kolokolonĩ:

37nĩmakimiwe na mavia, nĩmatililwe na mang’weli, nĩmatatiwe, nĩmooaiwe na ũvyũ: mangangie makĩvw’ĩka mbũa sya malondu na sya mbũi; matyaĩ na kĩndũ, maĩ na monyamao, meekiwe naĩ

38(andũ ala nthĩ ĩtaĩle kwĩthĩwa nao), mangangie maweũnĩ na iĩmanĩ na ngunganĩ, na maimanĩ ma nthĩ.

39Na asu onthe makũsĩĩwe kwondũ wa mũĩkĩĩo woo, matyaaosa ũla watho,

40nĩkwĩthĩwa Ngai nĩwatũseũvĩsye kĩndũ kĩseo mbee, nĩ kana asu matikethĩwe meanĩwe ithyĩ tũte vo.

← Chapter 10 Jump to: Chapter 12 →