Hebrews 6

Kamba (Mbivilia) 1956

← Chapter 5 Jump to: Chapter 7 →

1Kwondũ wa ũu tũkĩtia momanyĩsyo ma maũndũ ma mbee ma Klĩsto, twĩthing’ĩĩsye kũendeea mbee kũvikĩa wĩanĩu; tũte kwia ĩngĩ wambĩlĩlyo wa ũalyũlo wa ngoo kuma mawĩanĩ ala makw’ũ, na wa kũĩkĩĩa Ngai,

2na wa momanyĩsyo ma movatiso, na wa kwilĩĩlwa moko, na wa kũthayũũkw’a kwa akw’ũ, na wa ũsilĩlo wa tene na tene.

3Na ũu tũkeeka ethĩwa Ngai akatũtethya.

4Na ũndũ wa ala maminĩte kũnengwa kyeni na kũsama ũla mũthĩnzĩo wa ĩtunĩ, na kũtuwa osi ma Veva Mũtheu,

5na kũsama ndeto nzeo ya Ngai, na mavinya ma ĩvinda yĩla yũkĩte,

6na ĩndĩ makĩalyũka na kũtia, kũtitonyeka kũmatũnga eũ ĩngĩ kũvikĩa ũalyũlo wa ngoo; nĩkwĩthĩwa memwambĩthya ĩngĩ Mwana wa Ngai kwa o ene, na kũmũsonokya ũtheinĩ.

7Nũndũ nthĩ ĩla ĩnyw’ĩte mbua ĩla ĩmyuĩaa mavinda maingĩ, na ĩimesya nyũnyi ĩmaĩle ala ĩĩmawa kwondũ wamo, yosaa ũathimo kuma kwa Ngai:

8ĩndĩ ethĩwa nĩnĩkũmesya mĩw’a na thangila, nĩleawa na ĩ vakuvĩ na kũumanĩwa; na mũminũkĩlyo wayo nĩ kũvĩvw’a.

9Ĩndĩ, endwa, o na ethĩwa nĩtũũneena ũu, nĩtwĩtĩkĩlĩte maũndũ maseo mbee kwenyu, na maũndũ ala makwatene na ũtangĩĩo:

10nĩkwĩthĩwa Ngai ti ũla ũte mũlũngalu ũndũ ũtonya kũlwa nĩ wĩa wenyu na wendo ũla mwonanĩtye kwondũ wa syĩtwa yake, nĩkwĩthĩwa nĩmwamathũkũmie ala atheu, o na yu nĩmũmathũkũmaa.

11Na nĩtũkwenda kĩla ũmwe wenyu onanasye kĩthing’ĩĩsyo kyu kũvikĩa wĩanĩu wa wĩkwatyo o na kũvika mũminũkĩlyo:

12nĩ kana mũikethĩwe atulu, ĩndĩ mũkĩelekan’ya na ala meũtiĩwa matho kwondũ wa mũĩkĩĩo na wũmĩĩsyo.

13Nũndũ yĩla Ngai wamwathie Avalaamu, nĩkwĩthĩwa ndaatonya kwĩvĩta na ũngĩ mũnene mbee, nĩwevĩtie we mwene,

14akyasya, Nĩ w’o kũũathima ngakũathima, na kwingĩvya ngakwingĩvya.

15Na kwondũ wa ũu, ĩtina wa kũmĩĩsya kwake, nĩwosie ũla watho.

16Nũndũ andũ mevĩtaa na ũla mũnene: na nthĩnĩ wa ngananĩo syoo syonthe wĩvĩto nĩw’o ũminaa ũvoo ũlũme.

17Nthĩnĩ wa ũvoo ũsu Ngai, akyenda kũmon’ya mũno mbee atiĩwa ma ũla watho ũndũ ũtw’ĩo wake ũtatonya kũalyũka, nĩwekĩie wĩvĩto katĩ wake namo;

18nĩ kana kwondũ wa maũndũ elĩ ala mataalyũlĩka, nao nthĩnĩ wamo kũitonyeka Ngai kũneena ũvũngũ, twĩthĩwe na ũkiakisyo wĩ na vinya, ithyĩ ala twakũkie twone wĩvitho tũkwate wĩkwatyo ũla wiĩtwe mbee waitũ:

19ũla twĩ naw’o ta nanga ya ngoo, wĩkwatyo wĩ na ũlũmu na ũtakũĩka, ũlikaa nthĩnĩ wa vala ve ũla tũtũ;

20vala Yesũ ta mũtongoesya walikile kwondũ witũ, atw’ĩkĩte mũthembi mũnene wa tene na tene o ta ũndũ Melikiseteki wailyĩ.

← Chapter 5 Jump to: Chapter 7 →