Hebrews 9

Kamba (Mbivilia) 1956

← Chapter 8 Jump to: Chapter 10 →

1Ĩndĩ o na ũla ũtianĩo wa mbee waĩ na motw’io ma kũthaitha Ngai, na vandũ vatheu vaw’o vaĩ va nthĩ ĩno.

2Nũndũ nĩkwaseũvitw’e ĩeema, yĩla ya mbee, nthĩnĩ wayo kwaĩ kĩndũ kĩla kyeekĩawa mataa, na mesa, na imũtũ ila syaiĩawa Ngai; vala veetawa Vandũ Vatheu.

3Na ĩtina wa tũtũ wa kelĩ, yĩla ĩeema yeetawa Vandũ Vatheu mbee;

4na vo vaĩ kĩtoeesya kya thaavu kya kũtoeesya ũvani, na ĩsandũkũ ya ũtianĩo yavw’ĩkĩtwe thaavu ngalĩ syonthe ĩũlũ na nthĩnĩ, na nthĩnĩ wayo vaĩ kavisũ ka thaavu kala kaĩ na lĩu wĩtawa mana, na ndata ya Aluni ĩla yathongooie, na masengea ma mavia ma ũla ũtianĩo;

5na ĩũlũ wayo vaĩ akeluvi ma ũtheu mũtisu mekĩae muunyĩ wĩkalonĩ wa tei; tũitonya kũneena yu ũvoo wa syĩndũ ĩsu kĩmwe na kĩmwe.

6Ĩndĩ syĩndũ isu iminĩtwe kũseũvw’a ũu, athembi nĩmalikaa ĩeemanĩ ya mbee mĩthenya yonthe, makĩanĩsya ũthaithi woo;

7ĩndĩ vala va kelĩ mũthembi mũnene avotaa weka, o ĩmwe kĩla mwaka, ĩndĩ ndalikaa vate nthakame, ĩla wathembaa kwondũ wake mwene, na kwondũ wa mavĩtyo ma andũ:

8Veva Mũtheu akyonan’ya kana nzĩa ya kũlika vandũ vatheu ndĩnamba kwonanw’a, yĩla ĩeema ya mbee yĩũngeme;

9na ũndũ ũũ naw’o nĩ ngelekan’yo ya ĩvinda yĩĩ twĩ nayo; na kwĩanana nayo mĩthĩnzĩo na nthembo sya kũtonywa nithembawa ila itatonya kũmwĩanĩsya ũsu ũthaithaa ũndũ wa wasya wa ngoo,

10nĩkwĩthĩwa nĩ motw’ĩo ma maũndũ ma mwĩĩ ki, sya ũya na sya ũnyw’a na kũthesya kwa mĩthemba mingĩ, ala maiiwe kũvika ĩvinda yĩkoka yĩla maũndũ makaseũvw’a methĩwe meũ.

11Ĩndĩ Klĩsto ooka mũthembi mũnene wa maũndũ maseo ala makethĩwa kwondũ wa ieema ĩnene na yĩanĩu mbee, yĩtaseũvĩtw’e na moko, na ũu nĩ kwasya, ti ya wũmbe ũũ,

12o na ti kwondũ wa nthakame ya mbũi na tũsaũ, ĩndĩ kwondũ wa nthakame yake mwene, nĩwavotie vala vandũ o ĩmwe tũ, osete wovosyo wa tene na tene.

13Nũndũ ethĩwa nthakame ya mbũi na nzaũ, na kwĩtĩkya mũu wa moi ĩũlũ wa ala mavukĩtw’e, nitheasya kũvika kũthesya mwĩĩ:

14nĩ mbee veana ata nthakame ya Klĩsto, ũla kwondũ wa Veva wa tene na tene wenenganie mwene kwa Ngai ate kĩema, kũtheasya wasya wa ngoo wenyu mume mawĩanĩ makw’ũ mũthũkũme Ngai ũla wĩ thayũ?

15Na kwondũ wa ũu nĩ mwĩw’anĩthya wa ũtianĩo mweũ, kana kĩkw’ũ kyamina kwĩthĩwa kw’o ũndũ wa wovosyo wa mavĩtyo ala meekĩtwe ĩvinda ya ũtianĩo wa mbee, ala meetiwe mose ũla watho wa ũtiĩwa wa tene na tene.

16Nũndũ vala ve ũtianĩo, mũvaka vethĩwe kĩkw’ũ kya ũla watianĩa.

17Nũndũ ũtianĩo wĩ na vinya vala ve kĩkw’ũ: nũndũ ndwĩ na vinya o na ĩndĩĩ yĩla ũla watianĩa wĩ thayũ.

18Kwondũ wa ũu o na ũtianĩo wa mbee ndwaambĩlĩlw’a vate nthakame.

19Nũndũ Mose amina kũneena na andũ onthe kĩla mwĩao o tondũ kweeaiwe ĩla mĩaonĩ, oosaa nthakame ya tũsaũ na mbũi, vamwe na manzĩ na w’ĩa mũtune wa ĩlondu na ĩseve ya mũtĩ wa ĩsovo, na aminzangĩsya ĩvuku e yo na andũ onthe,

20akyasya, Ĩno nĩyo nthakame ya ũtĩanĩo ũla Ngai wamwĩaĩe.

21Na ĩngĩ ĩeema na mĩio yonthe ya ũthaithĩ aminzangĩsya nthakame o ta ũu.

22Na kwĩanana na ĩla mĩao, vakuvĩ syĩndũ syonthe nitheaw’a na nthakame, na vate kwĩtĩka nthakame ũekeo ndwoneka.

23Ĩndĩ mũvaka ngelekan’yo sya syĩndũ syĩ ĩtũnĩ ithew’e na nthembo isu; ĩndĩ syindũ sya itunĩ syo ithew’e na nthembo sya kũtonywa nzeo kwĩ isu.

24Nũndũ Klĩsto ndaalika vandũ vatheu vaseũvĩtw’e na moko, ngelekan’yo ya vala va w’o; ĩndĩ alikile ĩtunĩ e yo, nĩ kana onekae yu mbee wa ũthyũ wa Ngai kwondũ witũ:

25o na ti kana eyumye mwene mavinda maingĩ, o ũndũ mũthembĩ mũnene ũlikaa vala vandũ vatheu kĩla mwaka na nthakame ĩte yake mwene;

26kethĩwa nĩ ũu, ethĩwa athĩniw’e mavinda maingĩ kuma mwambĩlĩlyo wa nthĩ: ĩndĩ yu o ĩmwe tũ ĩvinda ya mũminũkĩlyo wa mavinda nĩwonaniw’e nĩ kana avete naĩ aithembwa e we mwene.

27Na o ũndũ andũ matw’ĩĩwe maiiwe kũkw’a o ĩmwe, na ĩtina wa kũkw’a ũsilĩlo;

28o ta ũu Klĩsto, aumw’a o ĩmwe akue naĩ sya aingĩ, akaumĩla ĩvinda ya kelĩ, ate na ũvoo wa naĩ, kwa ala mamweteelaa kũvikĩa ũtangĩĩo.

← Chapter 8 Jump to: Chapter 10 →