Hebrews 7

Kamba (Mbivilia) 1956

← Chapter 6 Jump to: Chapter 8 →

1Nũndũ Melikiseteki ũsu, mũsumbĩ wa Saleme, mũthembi wa Ngai Ũla Wĩ Ĩũlũ wa Onthe, ũla wakomanie na Avalaamu asyokete kuma kũmoaa asumbĩ, na amũathima,

2na ũla Avalaamu wamũaĩe kĩlungu kya ĩkũmi kya syĩndũ syonthe (mbee, ũalyũlo wa syĩtwa yĩu nĩ, Mũsũmbĩ wa ũlũngalu, na ĩngĩ, Mũsumbĩ wa Saleme, ũalyũlo wayo nĩ, Mũsumbĩ wa mũuo;

3ũte ĩthe, ũte nyinyia, ũte mosyaanĩo ma mbaĩ yake, ũte wambĩlĩlyo wa mĩthenya yake kana mũminũkĩlyo wa thayũ wake, ĩndĩ avw’ananw’a na Mwana wa Ngai), ekalaa e mũthembi tene na tene.

4Sũanĩaĩ ĩndĩ ũndũ mũndũ ũsu wanenevete, ũla Avalaamu, ĩthe waitũ mũnene, wamũnengie kĩlungu kya ĩkũmi kya syĩndũ ila syaĩ nzeo mbee sya mũtavo.

5Na nĩ w’o ala ma ana ma Livaĩ ala mosaa ũthembi me na mwĩao wa kwosa ilungu sya ĩkũmi sya andũ kwĩanana na ĩla mĩao, na ũu nĩ kwa ana‐a‐ĩthe moo, o na kau asu maumĩte kĩnyunyunĩ kya Avalaamu:

6ĩndĩ we, ũla mosyaanĩo make matatalawa kuma kwa asu, nĩwosie ilungu sya ĩkũmi sya Avalaamu, na amũathima ũsu waĩ na ala matho.

7Ĩndĩ vate ngananĩo ũla mũnini nũathimawa nĩ ũla mũnene.

8Na vaa andũ ala makusaa nĩmosaa ilungu sya ĩkũmi; ĩndĩ ku kwaĩ ũmwe wosie, ũla ũkũsĩĩawa kana e thayũ.

9Na nĩkũtonya kũneenwa, kana kwa nzĩa ya Avalaamu, o na Livai, ũla wosaa ilungu sya ĩkũmi, nake nĩwaumisye ilungu sya ĩkũmi;

10nũndũ we aĩ kĩnyunyunĩ kya ĩthe wake Avalaamu, o yĩla Melikiseteki wakomanie nake.

11Ĩndĩ ethĩwa kwaĩ wĩanĩu kwondũ wa ũthembi wa Alivai (nĩkwĩthĩwa andũ nĩmoosie ĩla mĩao kwondũ waw’o), kwaĩ vata ũngĩ wa kyaũ kana mũthembi ũngĩ okĩle ũilyĩ ta Melikiseteki, na ndakatalwa ta ũndũ Aluni wailyĩ?

12Nĩkwĩthĩwa ũthembi waalyũka, no mũvaka ĩla mĩao nayo ĩalyũke.

13Nũndũ ũla ũneeneawa maũndũ asu nĩ wa mbaĩ ĩngĩ, na kuma nthĩnĩ wayo vai mũndũ ũla wathũkũmie kĩthembeonĩ.

14Nĩkwĩthĩwa nĩwenekee vyũ kana Mwĩaĩi waitũ aumie mbaĩnĩ ya Yuta; na Mose ndaaneena ũvoo wa athembi mbaĩnĩ ĩsu.

15Na ũndũ ũla tũũneena nĩwenekee mũno mbee, ethĩwa mũthembi ũngĩ akookĩla ũilyĩ ta Melikiseteki,

16ũla watwiwe mũthembi, ti kwondũ wa ũtw’ĩo wa mwĩao ũla wĩ kwondũ wa mwĩĩ, ĩndĩ kwondũ wa vinya wa thayu ũtathela:

17nũndũ nĩwakũsĩĩwe, We wĩ mũthembi wa tene na tene O ta ũndũ Melikiseteki wailyĩ.

18Nũndũ kwĩ kũveta kwa ũla mwĩao ũla waĩ mbee nũndũ ndwĩ vinya na ndwĩ vata

19(nũndũ ĩla mĩao ndyaaĩanĩsya ũndũ), na kwĩ kũete wĩkwatyo mũseo mbee, ũla kwondũ waw’o tũmũthengeeaa Ngai.

20Na nĩkwĩthĩwa ũndũ ũsu ndwaaĩkwa vate wĩvĩto

21(nũndũ nĩ w’o asu matwiwe athembi vate wĩvĩto; ĩndĩ we nĩwatwiwe na wĩvĩto nĩ ũla wamwĩie, Mwĩaĩi nĩwevĩtie na ndakealyũla, We wĩ mũthembi wa tene na tene);

22kwĩanana na ũndũ o ũsu Yesũ atw’ĩkĩte mũĩkĩĩwa wa ũtianĩo mũseo mbee.

23Na nĩ w’o nĩmatwiwe athembi aingĩ, nĩkwĩthĩwa kwondũ wa kĩkw’ũ nĩmeũsiĩĩwa kwĩkalaa:

24ĩndĩ we, nĩkwĩthĩwa ekalaa kũvika tene na tene, e na ũthembi wake ũla ũtatwĩkanaa.

25Kwondũ wa ũu nake nũtonya kũmatangĩĩa vyũ ala mamũthengeeaa Ngai mavĩtĩle kwake, nũndũ e thayũ mĩthenya yonthe kũmavoyeaa.

26Nĩkwĩthĩwa mũthembi mũnene ta ũsu nĩwatwaĩle ithyĩ, ũla mũtheu, ũtaĩ na ũkengani, ũtaĩ na ũvuku, ũla wavathanĩtw’e na andũ athe, na watũlilw’e ĩũlũ wa matu;

27ũla ũte vata kĩla mĩthenya, ta athembi asu anene, kumya nthembo, mbee kwondũ wa nai syake mwene, na ĩndĩ kwondũ wa naĩ sya andũ; nũndũ nĩwekie ũu o ĩmwe, yĩla weyumisye mwene.

28Nũndũ ĩla mĩao ĩmaiaa andũ me na wonzu methĩwe athembi anene; ĩndĩ ndeto ya wĩvĩto, ũla wookie ĩtina wa ĩla mĩao, yamwiie Mwana ũla wĩanĩe kũvika tene na tene.

← Chapter 6 Jump to: Chapter 8 →