Hebrews 8

Kamba (Mbivilia) 1956

← Chapter 7 Jump to: Chapter 9 →

1Ĩndĩ maũndũnĩ ala tũũneena ũndũ wa mbee nĩ atiĩ: Twĩ na mũthembi mũnene ũilyĩ ũu, ũla wekalile ngalĩ ya kw’oko kwa aũme kwa kĩvĩla kya ũsumbĩ kya ũla Ũnene matunĩ,

2mũthũkũmi wa vandũ vatheu, na wa ĩeema yĩla ya w’o, yĩla yaakiwe nĩ Mwĩaĩi, na ti mũndũ.

3Nũndũ kĩla mũthembi mũnene aiawa nĩ kana athembe mĩthĩnzĩo na nthembo ya kũtonywa: kwondũ wa ũu nĩkwaĩle kana mũthembi ũũ mũnene ethĩwe na kĩndũ kya ũthemba.

4Ĩndĩ kethĩwa e kũũ nthĩ, ndethĩwa e mũthembi nongi, nĩkwĩthĩwa kwĩ ala mathembaa mĩthĩnzĩo kwĩanana na ĩla mĩao;

5ala mathũkũmaa ngelekan’yo na kyuu kya syĩndũ sya ĩtunĩ, o tondũ Mose wataiwe nĩ Ngai weyũmbanĩtye kwaka yĩla ĩeema: nũndũ easya, Sisya kana ũseũvye syĩndũ syonthe o ta ngelekan’yo ĩla woonew’e kĩĩmanĩ.

6Ĩndĩ yu nĩwosete ũthũkũmi ũla mũseo mbee, kwĩanana na ũndũ we nake nĩ mwĩw’anĩthya wa ũtianĩo mũseo mbee, ũla watwiwe ĩũlũ wa matho maseo mbee.

7Nũndũ kethĩwa ũtianĩo wa mbee, waĩ mwĩanĩu, vaiĩthĩwa na ũthei wa kũmantha ũngĩ wa kelĩ.

8Nũndũ aimonea mavĩtyo, easya, Sisyai, mĩthenya nĩyũkĩte, easya ũu Mwĩaĩi, Yĩla ngatianĩa ũtianĩo mweũ na nyũmba ya Isilaeli na nyũmba ya Yũta;

9Ndũkethĩwa ũilyĩ ta ũtianĩo ũla natianĩe na aaĩthe moo Mũthenya ũla namakwatie moko kũmatongoesya kũmaumya nthĩ ya Misili; Nũndũ matyaaĩkala ũtianĩonĩ wakwa, Nakwa ndyaamona ta kĩndũ, easya ũu Mwĩaĩi.

10Nũndũ ũũ nĩw’o ũtianĩo ũla ngatianĩa na nyũmba ya Isilaeli Ĩtina wa mĩthenya ĩsu, easya ũu Mwĩaĩi; Ngeekĩa mĩao yakwa ilĩkonĩ syoo, Na ngamĩandĩka ngoonĩ syoo: Na ngeethĩwa Ngai woo, Nao makeethĩwa andũ makwa:

11Na matĩkamanyĩan’ya kĩla mũndũ na mũtũi wake, Na kĩla mũndũ na mwana‐a‐inyia wake, makyasya, Mũmanye Mwĩaĩi: Nĩkwĩthĩwa onthe makamanya nyie, Kuma ũla mũnini woo kũvika ũla mũnene woo.

12Nũndũ ngeew’ĩaa tei mothũkũ moo, Na naĩ syoo ndikaililikana ĩngĩ.

13We, kwondũ wa kũneena, Ũtianĩo mweũ, nĩwatwie ũla wa mbee mũkũũ. Ĩndĩ kĩla kyambĩlĩlya ũkũa na kwanangĩka nĩ vakuvĩ kĩthele vyũ.

← Chapter 7 Jump to: Chapter 9 →