Hebrews 2

Kamba (Mbivilia) 1956

← Chapter 1 Jump to: Chapter 3 →

1Kwondũ wa ũu nĩtwaĩle kũmasũvĩaa mũno maũndũ ala mew’ĩtwe, tũikese kũmatia.

2Nũndũ ethĩwa ndeto ĩla yaneeniwe nĩ alaika yai nũmu, na kĩla ĩvĩtyo na kũlea kwĩw’a syoosie itũvi yasyo ilũngalu;

3ithyĩ tũkavonoka ata, twavũthya ũtangĩĩo ũnenevete ũu? Ũla wambie ũneenwa nĩ Mwĩaĩi, na walũlũmĩlw’e kwitũ na ala meewie;

4Ngai nake akĩkũsĩĩa vamwe nao, na syama na moseng’yo na mavinya ma mĩthemba mingĩ, na mĩthĩnzĩo ya Veva Mũtheu, kwĩanana na kwenda kwake.

5Nũndũ ndaaia nthĩ ĩla yũkĩte ĩtheo wa alaĩka, ĩla tũũneena ũvoo wayo.

6Ĩndĩ mũndũ ũmwe aĩ na ũkũsĩ vandũ vamwe, akyasya, Mũndũ nĩ kyaũ, ũndũ ũmũlilikana? Kana mwana wa mũndũ, ũndũ ũthi vala ũĩ?

7Nĩwamũtwie mũnini ĩvinda kwĩ alaĩka. Nĩwamwĩkĩie ngovia ya ũsumbĩ ya ndaĩa na nguma, Na wamwia ĩũlũ wa mawĩa ma moko maku:

8Nĩwamwiĩe syĩndũ syonthe wĩnyivyonĩ ungu wa nyaĩĩ syake. Nũndũ akia syĩndũ syonthe ĩtheo wake, ndaatialya kĩndũ kĩmwe kĩtaiĩtwe ĩtheo wake. Ĩndĩ yu tũinamba kwona syĩndũ syonthe siĩtwe ĩtheo wake.

9Ĩndĩ nĩtũũmwona Yesũ ũla waniniwiv’e ĩvinda kwĩ alaĩka, kwondũ wa mathĩna ma kĩkw’ũ ekĩĩtwe ngovia ya ũsumbĩ ya ndaĩa na nguma, nĩ kana kwondũ wa mumo wa Ngai asame kĩkw’ũ vandũ va kĩla mũndũ.

10Nũndũ nĩwaĩlwe we, ũla kwondũ wake, na kwondũ wa wĩa wake syĩndũ syonthe syĩ vo, amina kũete ana aingĩ ndaĩanĩ yake, kũmwĩanĩsya mũnene wa ũtangĩĩo woo kwondũ wa mathĩna.

11Nĩkwĩthĩwa ũla ũvathanasya na ala mavathanaw’a, onthe maumaa nthĩnĩ wa ũmwe: kwondũ wa ũu ndew’aa nthoni kũmeta ana‐a‐ĩthe,

12akyasya, Ngatavan’ya syĩtwa yaku kwa ana‐a‐asa makwa, Ngakũtaĩĩa ũmbanonĩ.

13Na ĩngĩ, Ngamwĩkwatya we. Na ĩngĩ, Sisya, nyie na syana ila Ngai ũnengete.

14Ĩndĩ nĩkwĩthĩwa syana nĩsyosaa mwĩĩ na nthakame, we nake mwene nĩwosie o ta ũu; nĩ kana kwondũ wa kĩkw’ũ amwasye vinya ũla wai na vinya wa kĩkw’ũ, nake nĩ ndevili;

15na amathasya onthe ala kwondũ wa w’ĩa wa kĩkw’ũ maĩ ũkombonĩ thayũ woo w’onthe.

16Nũndũ nĩ w’o ndeũmatethya alaĩka, ĩndĩ ematethya ala ma ũsyao wa Avalaamu.

17Kwondũ wa ũu nĩwaĩlwe we nĩ kũvw’ananw’a maũndũni onthe na ana‐a‐ĩthe make, nĩ kana ethĩwe mũthembi mũnene wĩ tei na kĩthito maũndũnĩ ala melekele Ngai, nĩ kana ethĩwe nthembo ya wĩw’anĩthyo kwondũ wa naĩ sya andũ.

18Nĩkwĩthĩwa we mwene nĩwathĩniw’e aitatwa, nũtonya kũmatetheesya ala matatawa.

← Chapter 1 Jump to: Chapter 3 →