bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (MBIVILIA ŨVOO MŨSEO)
/
Exodus 23
Exodus 23
Kamba (MBIVILIA ŨVOO MŨSEO)
← Chapter 22
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 24 →
1
“Ndũkanyaĩĩkye ndeto sya ũvũngũ. Ndũkatetheesye mũndũ mũthũku kwa kumya ũkũsĩ wa ũvũngũ.
2
Ndũkaatĩĩe wingĩ wa andũ yĩla mekwĩka naĩ, kana yĩla mekumya ũkũsĩ ũtekwĩtĩkĩlana na ũsili wa katĩ.
3
Ndũkendeesye mũndũ ngya yĩla ũkũsilĩlwa.
4
“Wakomana na ng'ombe kana ĩng'oi ya mũndũ wĩ ũthũ naku yaĩte inga ũmũtũngĩe.
5
Na woona ĩng'oi yake yĩvalũkĩtw'e nĩ ũito wa mĩio, mũtetheesye kũyũkĩlya yĩũngame; ndũkamũtianĩsye nayo.
6
“Ndũkelelũkye sila wa katĩ ũla waĩlĩte kũnengwa mũndũ ngya yĩla ũkũsilĩlwa.
7
Ndũkaumye ũkũsĩ wa ũvũngũ, na ndũkoae mũndũ ũte ĩvĩtyo kana mũlũngalu, nĩkwĩthĩwa ngamũtalĩla ĩvĩtyo mũndũ ũla wĩkĩte ũndũ ũsu mũthũku.
8
Ndũketĩkĩle kwosa ĩtuvi ya wendeesyo, nũndũ ũu ũtumaa andũ matamanya maũndũ ala maĩlu na kwananga mwĩkalo wa ala alũngalu.
9
“Ndũkamwĩke naĩ mũndũ wĩ ũeninĩ; nĩmwĩsĩ ũndũ kwĩthĩwa wĩ mũeni kũilyĩ, nũndũ o nenyu mwaĩ ũeninĩ nthĩ ya Misili.
10
“Vandũ va myaka thanthatũ ũkavandaa mĩũnda yaku na kũketha kĩla ũvandĩte.
11
Ĩndĩ mwakanĩ wa mũonza ũkaekanaa na mũũnda waku ũte mũĩme, na ndũkaakethe kĩndũ o na kĩmwe kĩmeete vo. Ngya nĩtonya kũya kĩla kĩmeete vo, na nyamũ sya kĩtheka iiya kĩla kĩũtiala. Ũu now'o waĩlĩte kwĩkana na mĩũnda yaku ya mĩsavivũ na ya mĩthata.
12
“Tethasya wĩa mĩthenya thanthatũ kwa kyumwa, ĩndĩ ndũkatethye wĩa mũthenyanĩ wa mũonza nĩ kana ng'ombe syaku, na mang'oi maku mathũmũe, na syana sya ngombo yaku mũndũ mũka, na aeni mathũmũe.
13
“Ĩthukĩĩsye maũndũ onthe ala nyie Mwĩai Ngai ngũtavĩtye. Ndũkekaĩle ngai ingĩ; o na ndũkaiwete.
14
“Mũkeethĩawa na mboka mavinda atatũ kwa mwaka kwondũ wa ndaĩa yakwa.
15
Mweinĩ wa mbee ũla wĩtawa Avivu, naw'o nĩ mwei ũla mwaumie nthĩ ya Misili, mũkeethĩawa na Mboka ya Mũkate ũte Mbota kwĩanana na ũndũ namwĩaĩie. Mũikaye mũkate wĩkĩĩtwe mbota ĩvindanĩ ya mĩthenya ĩsu mũonza ya mboka ĩno. Mũikaaũke kũnthaitha mũtakuĩte nthembo.
16
“Mũkeethĩawa na Mboka ya Ngetha ya ũsyao wa mbee wa syĩndũ ila syumanĩte na ũthũkũmi wenyu, naw'o nĩ wa syĩndũ ila inyw'ĩ mũvandaa mĩũndanĩ yenyu. Ĩthĩawai na mboka ya kũmbany'a ngetha mũminũkĩlyonĩ wa mwaka yĩla mũkũmbany'a kuma mĩũndanĩ ũsyao ũla wumanĩte na wĩa wenyu.
17
Kĩla mwaka mavindanĩ ma mboka isu itatũ, aũme menyu onthe makookaa kũnthaitha, nyie Mwĩai Ngai, Ngai wenyu.
18
“Mũikambumĩsye nthembo ya nthakame ĩvulanĩtw'e na mũkate ũuĩtwe na mbota. “Mathunya ma nyamũ ĩla wĩnthembeaa ĩvindanĩ ya mboka ĩsu, maikaekawe mavike kĩoko kya mũthenya ũla ũatĩĩe.
19
“Etae kĩla kĩseo kya ũsyao wa mbee wa nthĩ yenyu nyũmbanĩ ya Mwĩai Ngai, Ngai waku. “Ndũkaue nyama sya katena ka ĩlondu kana ka mbũi na ĩia ya inyia wako.
20
“Sisya, nĩndũmĩte mũlaĩka aende mbee waku akũsũvĩae wĩ nzĩanĩ na kũũtwaa vala nzeũvĩtye.
21
Mwĩthukĩĩsye na kũmwĩw'a. Ndũkaleane nake nĩkwĩthĩwa nĩnĩmũtũmĩte, na ndakakũekea ĩvĩtyo yĩu.
22
Ethĩwa ũkeethukĩĩsya vyũ kĩla ũkũneena na kwĩka kyonthe kĩla ngũũtavya, nyie ngeethĩwa mũmaitha kwa amaitha maku na ngaleana na ala meleana naku.
23
Mũlaĩka wakwa akakũtongoesya na kũũtwaa nthĩ ya Aamoli, Aititi, Avelisi, Akanaani, Aivi, na Ayevusi, nakwa ngamamina vyũ.
24
Ndũkakumanĩe ngai syoo, kana kwithũkũma, kana kwĩka maũndũ ala mekawa mothaithinĩ masyo. Ĩndĩ mwĩsyĩkya kũasa vyũ na kwananga ithembeo syasyo.
25
Ethĩwa ũkanthaithaa nyie, Mwĩai Ngai, Ngai waku, ngakũathima kwa ũkũnenga lĩu na kĩw'ũ na ũkũvetangĩa mowau.
26
Vai mũndũ mũka ũkasyaa naĩ kana ethĩwe ngũngũ nthĩnĩ wa nthĩ yaku. Ngakũnenga kwĩkala thayũ ĩvinda ĩasa.
27
“Ngatuma andũ ala makũkananĩasya mambĩĩa kũngĩa. Ngaete kũlea kũeleanwa katĩ wa andũ ala wũkitaa namo. O ta ũu ngatuma amaitha maku onthe maũkĩa vyũ.
28
Ngatũmĩa amaitha maku mauĩ makwatwe nĩ w'ĩa; ngalũngya Aivi, Akanaani, na Aititi maume vala mũĩ.
29
Ndikamalũngya maume vala ũĩ ĩvindanĩ ya mwaka ũmwe. Ethĩwa ngeeka ũu nthĩ ĩkatiwa yĩ nthei na nyamũ sya kĩtheka iyĩthĩwa syĩ mbingĩ mũno kĩla vandũ.
30
Ngamalũngasya kavola kwa kavola nginya mwingĩve na kwosa nthĩ ĩsu yĩthĩwe yĩ yenyu.
31
Ngeekĩa nthĩ yaku mĩvaka kuma Ũkanga Mũtune kũvika Ũkanga wa Menditelenia na kuma weũnĩ kũvika Ũsĩnĩ wa Euvalati. Nĩkwĩthĩwa nyie ngamanengane andũ ala matũaa nthĩ ĩsu mokonĩ maku, naku ũkamalũngya maume mbee waku.
32
Ndũkaaseũvye ũtianĩo namo kana na ngai syoo.
33
Ndũkaaekane na andũ asu matũe nthĩ yaku; ethĩwa ũkamaeka makatuma ũmbĩtĩsya. Na wathaitha ngai syoo, naw'o ũsu ũkeethĩwa wĩ mũteo mũthũku mũno kwaku.”
← Chapter 22
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 24 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40