Exodus 36

Kamba (MBIVILIA ŨVOO MŨSEO)

← Chapter 35 Jump to: Chapter 37 →

1“Mbesaleli, Ooliavu, na mũndũ o na wĩva ũla Mwĩai Ngai ũnengete ũmanyi na ũtonyi wa kũtethya wĩa ũsu wa kwaka Ĩeema ĩtheu, no nginya matethye wĩa kwĩanana na ũndũ Mwĩai Ngai wĩaĩte.”

2Nĩvo ĩndĩ Mwose weetie Mbesaleli, Ooliavu na mũndũ w'onthe ũla wĩ na ũmanyi na Mwĩai Ngai ũmũnengete ũtonyi, na wendeeaw'a nĩ kũka na kũtethya wĩa ũsu.

3Mwose nĩwamanengie syĩndũ syonthe ila andũ ma Ĩsilaeli maumĩtye kwondũ wa kwaka Ĩeema ĩtheu ya kũkomanĩa na Ngai. Andũ nĩmaendeeie kumya nthembo na ngoo ya kwenda kĩla kwakya.

4Nĩvo ĩndĩ andũ ala maĩ na ũĩ wa kũtethya wĩa ũsu wa kwaka Ĩeema ĩtheu matiie wĩa woo mathi

5meea Mwose atĩĩ, “Andũ nĩmaendee na kũete syĩndũ mbingĩ o na mbee wa ũndũ ikwendeka kwa kũtethya wĩa ũla Mwĩai Ngai wĩaĩte ũtethw'e.”

6Kwoou Mwose nĩwaumisye mwĩao ũtavanw'e kĩla vandũ maeemanĩ kana vai mũndũ waĩlĩte kumya kĩndũ mbee wa vau kya kwaka Ĩeema ĩtheu; kwoou andũ nĩmaekie kũete syĩndũ.

7Syĩndũ ila maĩ manaete syaĩ mbingĩ kũvĩtũka ila syendekaa kwa kũtethya wĩa ũsu.

8Aũme ala maĩ na ũmanyi mwingĩ mbeange wa ala angĩ matethasya wĩa nĩmo maakie Ĩeema ĩtheu ya kũkomanĩa na Mwĩai Ngai. Mayĩseũvisye na suka ĩkũmi itumĩtwe na ndii nzeo ndũmu mbokothe sya langi wa mbuluu, ũngĩ wa langi wa nzambalaũ na ũngĩ mũtune mũno. Suka isu syaanakavĩtw'e kwa nzĩa ya mwanya kwa kũtumĩĩwa malaa ma syũmbe syĩ nthwau syĩtawa akelũvi.

9Suka isu syonthe nĩsyeanene na syaĩ na ũasa wa mita ĩkũmi na ilĩ na ũthanthau wa mita ilĩ.

10Nĩmatumie makwatany'a suka itano vamwe na meekana o ta ũu na ila ingĩ itano.

11Nĩmasyokie maseũvya ikwatũ sya kĩtambaa kya mbuluu na maitumĩĩa ũtiivonĩ wa suka ĩla yaĩ ũtee wa isu itano ngwatany'e. Nĩmeekie o ta ũu na suka ila ingĩ itano ngwatany'e.

12Nĩmatumĩĩie ikwatũ mĩongo ĩtano kĩtambaanĩ kĩmwe kya ila itano ngwatany'e, na ikwatũ ingĩ mĩongo ĩtano ithimanĩte na kĩtambaa kĩla kĩ ũtee vyũ wa ila ingĩ itano ngwatany'e.

13O ta ũu, nĩmaseũvisye ngolya mĩongo ĩtano sya thaavu na makwatany'a masuka asu elĩ na ngolya isu; kwoou Ĩeema yatw'ĩka kĩndũ kĩmwe.

14Nĩmaseũvisye suka sya kũvw'ĩka Ĩeema yĩu kuma ilungunĩ ĩkũmi na kĩmwe sya ngũa itumĩtwe na w'ĩa wa mbũi.

15Nĩmaiseũvisye syonthe syĩanene; kĩla ũmwe wĩ na ũasa wa mita ĩkũmi na itatũ na ũthanthau wa mita ilĩ.

16Nĩmatumie makwatany'a suka itano vamwe, na ila ingĩ thanthatũ maikwatany'a vamwe.

17Nĩmatumĩĩie ikwatũ mĩongo ĩtano ũtiivonĩ wa suka ĩla yĩ ũtee vyũ wa ila itano ngwatany'e, na ikwatũ ingĩ mĩongo ĩtano ũtiivonĩ wa ila ingĩ thanthatũ ngwatany'e.

18Nĩmaseũvisye ngolya mĩongo ĩtano sya kyũma kya mbulonzi sya kũkwatany'a suka isu syelĩ itw'ĩke suka ĩmwe ya kũvw'ĩkaa Ĩeema.

19Nĩmaseũvisye syĩndũ ingĩ ilĩ sya kũvw'ĩka Ĩeema yĩu, kĩmwe kuma kĩthumanĩ kya ndũũme kĩindĩtwe langinĩ mũtune, na kĩngĩ kuma kĩthumanĩ kĩseo kyololo syĩthĩawe sya kũyĩvw'ĩka.

20Nĩmaseũvisye mbwaũ ndũngalu sya mũtĩ wa mũea sya kũũngamya Ĩeema yĩu.

21Kĩla ũvwaũ waĩ na ũasa wa mita inya na ũthanthau wa sendimita mĩongo thanthatũ na thanthatũ.

22O ta ũu kĩla ũvwaũ weethĩawa na mĩthya ĩlĩ myasũvye na ĩvaasanĩte, nĩ kana mbwaũ isu ikwatanw'e vamwe. Mbwaũ isu syonthe syaĩ na mĩthya ĩsu myasũvye.

23Nĩmaseũvisye mbwaũ mĩongo ĩlĩ sya ngalĩko ya ĩtheo ya Ĩeema yĩu,

24na matina mĩongo ĩna ma silĩva ma kũũngamya mbwaũ isu ilikanĩtw'e namo; matina elĩ malikanĩtw'e na kĩla ũvwaũ nĩ kana makwatĩĩe mĩthya ĩsu ĩlĩ.

25Nĩmaseũvisye mbwaũ mĩongo ĩlĩ sya ngalĩko ya ĩũlũ ya Ĩeema yĩu,

26na matina mĩongo ĩna ma silĩva ma kũũngamya mbwaũ isu; matina elĩ malikanĩtw'e na ũvwaũ ũmwe na angĩ elĩ na ũvwaũ ũngĩ.

27Ĩtina wa Ĩeema ngalĩkonĩ ya ũthũĩlonĩ wa syũa nĩmaseũvisye mbwaũ thanthatũ

28na maseũvya ingĩ ilĩ sya konanĩ ngalĩko ya ĩtina ya Ĩeema.

29Mbwaũ isu sya konanĩ nĩsyakwatanĩtw'e kuma nthĩ kũvika ĩũlũ. Mbwaũ isu ilĩ syeekĩĩtwe konanĩ syaseũvĩtw'e kwa nzĩa ĩsu.

30Kwoou vaĩ mbwaũ nyanya syĩ na matina ĩkũmi na thanthatũ ma silĩva, matina elĩ malikanĩtw'e na kĩla ũvwaũ.

31Nĩmaseũvisye mĩamba ya mũtĩ wa mũea; ĩtano kwondũ wa mbwaũ ila syĩ ngalĩko ĩmwe ya Ĩeema,

32ĩtano kwondũ wa ngalĩko ĩla ĩngĩ, na ĩtano kwondũ wa mbwaũ ila syĩ ngalĩko ya ũthũĩlonĩ wa syũa ĩtina wa Ĩeema yĩu.

33Nĩmaseũvisye mũamba wa katĩ ũvĩtĩlĩte kuma ngalĩko ĩmwe ya Ĩeema kũthi ĩla ĩngĩ wĩsĩlĩte katĩ wa mbwaũ isu.

34Nĩmoombĩĩie mbwaũ isu thaavu, na masyoveea ngome sya thaavu sya kũkwatĩĩa mĩamba ĩsu ĩla o nayo mombĩĩie thaavu.

35Nĩmaseũvisye kĩtambaa kya ndii nzeo ndũmu mbokothe sya langi wa mbuluu, ũngĩ wa langi wa nzambalaũ, na ũngĩ mũtune mũno. Nĩmakyanakavisye kwa nzĩa ya mwanya kwa kũtumĩĩa malaa ma syũmbe syĩ nthwau syĩtawa akelũvi.

36Nĩmaseũvisye ituĩ inya sya mũtĩ wa mũea sya kũkolelw'a ĩla suka. Nĩmoombĩĩie ituĩ isu thaavu na masyoveea ngolya sya thaavu, na maiseũvĩsya matina ana ma silĩva ma kũiũngamya.

37O ta ũu nĩmaseũvisye kĩtambaa kya kwĩkĩa mũomonĩ wa Ĩeema, kĩtumĩtwe na ndii nzeo ndũmu mbokothe sya langi wa mbuluu, ũngĩ wa langi wa nzambalaũ, na ũngĩ mũtune mũno. Nĩmakĩtumie na makyanakavya.

38Nĩmaseũvĩsye kĩtambaa kĩu ituĩ itano masyĩkĩa ngolya, na moombĩĩa thaavu ngovianĩ na mĩkunzunĩ yasyo. Nĩmaseũvisye matina atano ma kyũma kya mbulonzi kwondũ wa ituĩ isu.

← Chapter 35 Jump to: Chapter 37 →