Exodus 28

Kamba (MBIVILIA ŨVOO MŨSEO)

← Chapter 27 Jump to: Chapter 29 →

1Mwĩai Ngai nĩwaneenie na Mwose amwĩa atĩĩ, “Ĩta mwana-a-inyia waku Alũni, e na ana make Natavu, Aviu, Elieseli na Ĩthamali. Mavathe kuma andũnĩ ma Ĩsilaeli manthũkũmae ta athembi.

2Seũvĩsya mwana-a-inyia waku Alũni ngũa ntheu sya kũtuma anengwa ndaĩa na sya kũmwanakavya.

3Tavya andũ ala me na ũmanyi na nĩmanengete ũĩ maũndũnĩ ma mũthemba ũsu, maseũvĩsye Alũni ngũa sya kũvathwa kwake nĩ kana anthũkũmae ta mũthembi.

4Ii nĩsyo ngũa ila meũseũvya: Ngusu ya kwoveea kĩthũi; ngũa ya ĩũlũ, ngũa ndaasa, kanzũ mbanakavye kwa kũtumĩĩwa malaa, ngovia, na mũsivi wa ngũa. Maseũvye ngũa ntheu kwondũ wa Alũni na ana make manthũkũmae ta athembi.

5Andũ asu me na ũmanyi ũsu nĩmatũmĩe ndii sya mbuluu, ingĩ sya langi wa nzambalaũ na ingĩ ndune mũno, ndii sya thaavu, na ndii nzeo ndũmu mbokothe.

6“Maseũvye ngũa ya ĩũlũ ya mũthembi ĩtumĩtwe kwa nzĩa ya mwanya na ũlii wa thaavu, itambaa sya mbuluu, ingĩ sya langi wa nzambalaũ, ingĩ ndune mũno, na sya ndii nzeo ndũmu mbokothe.

7Nĩyĩthĩwe na ikwatũ ilĩ sya ituo itumĩĩwe ndeenĩ syayo nĩ kana yĩthĩwe ikwatanĩtw'e vamwe.

8Mũsivi ũtumĩtwe nesa na ndii o isu ũtumĩĩwe ngũanĩ ĩsu ya ĩũlũ nĩ kana syĩthĩwe ikwatene.

9Osa mavia elĩ ma thooa mũnene metawa onekisi na ũiandĩka kwa kũtemeleela masyĩtwa ma ana ĩkũmi na elĩ ma Yakovo.

10Maandĩke kwĩanana na ũndũ masyaiwe maatĩanĩe, masyĩtwa thanthatũ ĩvianĩ yĩmwe na ala angĩ thanthatũ ĩvianĩ yĩla yĩngĩ.

11Osa mũndũ wĩ na ũmanyi wa kwasa syĩndũ sya wanake atemeleele mavianĩ asu elĩ masyĩtwa ma ana ma Yakovo. Ũmbĩĩa mavia asu kĩndũnĩ kyanakavĩtw'e na thaavu.

12Oveea mavia asu ikwatũnĩ sya kĩtuo sya ĩla ngũa ya ĩũlũ ya mũthembi methĩwe mavia ma ũlilikany'o wa mbaĩ ĩkũmi na ilĩ sya andũ ma Ĩsilaeli. Alũni akakuaa masyĩtwa asu ituonĩ syake ta ũlilikany'o mbee wa Mwĩai Ngai.

13Seũvya syĩndũ ilĩ syanakavĩtw'e na thaavu,

14na nyololo ilĩ sya thaavu mũthei imilanĩtw'e ta ĩkanda. Ĩkwatany'e na syĩndũ isu sya thaavu mbanakavye.

15“Seũvya ngusu ya kwoveea kĩthũi ya Mũthembi ũla Mũnene nĩ kana akamĩtũmĩaa kũmanya kwenda kwa Ngai. Mĩseũvye ũitũmĩa syĩndũ ila ũtũmĩie kũseũvya ngũa ya ĩũlũ na ũimĩtumĩĩa malaa o ta asu mayo.

16Ngusu ĩsu yĩthĩwe yĩanene ngalĩko syonthe na ĩkatũlanĩlwa kũndũ kwĩlĩ, ũasa na ũthanthau wa sendimita mĩongo ĩlĩ na ilĩ.

17“Ũmbĩĩa mĩthĩa ĩna ya mavia ma thooa mũnene ĩũlũ wa ngusu ĩsu. Mũthĩanĩ wa mbee ũmbĩĩa ala metawa salitũ, tovasi na nganeti,

18na mũthĩanĩ wa kelĩ ũyũmbĩĩa ala metawa emelandi, savaya, na ndaĩamondi.

19Mũthĩanĩ wa katatũ ũmbĩĩa ala metawa yasithi, angate, na amethisi,

20na mũthĩanĩ wa kana ũyũmbĩĩa ala metawa mbelili, onekisi, na yasiva. Mavia asu nĩmombĩĩwe ĩũlũ wa syĩndũ mbanakavye sya thaavu.

21Kĩla yĩmwe ya mavia asu ĩkũmi na elĩ yĩandĩkwe kwa kũtemeleelwa ĩsyĩtwa yĩmwe ya ana ma Yakovo, methĩwe vandũ va mbaĩ ĩkũmi na ilĩ sya Ĩsilaeli.

22Seũvĩsya ngusu ĩsu ya kwoveea kĩthũi nyololo sya thaavu mũthei imilanĩtw'e ta ĩkanda.

23Seũvya kwondũ wa ngusu ya kwoveea kĩthũi ngome ilĩ sya thaavu na kũsyĩkĩa mĩthyanĩ ĩlĩ ya ĩũlũ ya ngusu.

24Kundĩkĩla ila nyololo ilĩ sya thaavu ngomenĩ isu ilĩ syĩ mĩthyanĩ ya ngusu ĩsu ya kwoveea kĩthũi.

25Kundĩkĩla mĩthya ĩla ĩngĩ ya nyololo isu ĩla syĩndũnĩ mbanakavye na thaavu. O ta ũu syoka ũikwatanĩly'e mbee na ila ikwatũ sya ngũa ya ĩũlũ yĩtawa evoti.

26Seũvya ngome ilĩ sya thaavu na ũisyoveea mĩthyanĩ ĩlĩ ya ĩtheo ya ngusu ĩsu ũtiivonĩ ũla wĩ ngalĩko ya nthĩnĩ vakuvĩ na ĩla ngũa ya ĩũlũ.

27O ta ũu seũvya ngome ingĩ ilĩ sya thaavu na ũyĩikwatanĩlya mbee ngalĩkonĩ ya ĩtheo ya ila ikwatũ sya ngũa ya ĩũlũ vakuvĩ na mũtũlo ĩũlũ wa ũla mũsivi wa ngũa ĩsu ũtumĩtwe nesa.

28Ovany'a ngome sya ngusu ĩsu na ila sya ngũa ya ĩũlũ na ũlii wa mbuluu nĩ kana ngusu ĩsu yĩthĩwe ĩũlũ wa ũla mũsivi na ndĩkethĩwe yĩ ndeelu.

29“Yĩla Alũni ũkũlika vala Vandũ Vatheu akeekĩaa ngusu ĩsu ĩandĩkĩtwe kwa kũtemeleelwa masyĩtwa ma mbaĩ sya Ĩsilaeli, nĩ kana nyie Mwĩai Ngai nĩlilikanae andũ makwa kĩla ĩvinda.

30Ĩkĩa Ulimu na Thumimu ngusunĩ ĩsu nĩ kana Alũni aikuae yĩla wooka vala vandũ vatheu nĩĩ. Ĩvindanĩ yĩu no nginya akekĩaa ngusu ĩsu nĩ kana akethĩawa atonya kũmanya kwenda kwa Ngai kwondũ wa andũ ma Ĩsilaeli.

31“Seũvya ngũa ndaasa ĩla yĩkĩawa nthĩnĩ wa ngũa ya ĩũlũ, yonthe yĩ ya w'ĩa wa langi wa mbuluu.

32Ngũa ĩsu ndaasa nĩyĩthĩwe na ĩima ya kũlikya mũtwe. Ũtiivo wa ĩima yĩu ũlũlũmĩĩlw'e kwa kũtumwa na ũlii nĩ kana ũyĩsiĩĩe kũtembũka.

33“Tumĩĩa mavisa ma matunda ma makũngũmanga na ũlii wa langi wa mbuluu, ũngĩ wa langi wa nzambalaũ na ũngĩ mũtune mũno, kwĩlingĩla ũtiivonĩ wa ngũa ĩsu. Katĩ wa mavisa ma matunda asu vatumĩĩwe ngengele sya thaavu.

34Tumĩĩa ngengele isu sya thaavu kĩla ĩmwe ĩatĩanĩe na ĩtunda yĩmwe ũtiivonĩ wa ngũa ĩsu.

35Alũni akeekĩa ngũa isu yĩla ũkũthũkũma ta mũthembi. Wasya wa ngengele ĩsu ũkeew'ĩkaa yĩla ũkũlika vala Vandũ Vatheu mbee wa Ngai, na yĩla wumĩte vo, nĩ kana ndakakw'e.

36“Seũvya kĩlaũni kya thaavu mũthei na ũikĩtemeleela ta movano ma mbete ya kwĩkĩa mũulĩ ndeto ii: ‘Mũvathe kwondũ wa Mwĩai Ngai.’

37Kundĩkĩla kĩlaũnĩ kĩu ngalĩkonĩ ya mbee ya ĩla ngovia na ũlii wa mbuluu.

38Alũni akeekĩaa kĩlaũnĩ kĩu kĩla ĩvinda kĩtulyanĩ kyake, nĩ kana nyie Mwĩai Ngai nĩtĩkĩlae nthembo syonthe ila andũ ma Ĩsilaeli membumĩasya o na ethĩwa nĩmekĩte ĩvĩtyo yĩla mekumya nthembo isu.

39“Tuma kanzũ na kĩtambaa kĩtumĩtwe na ũlii mũseo mũlũmu na ũisyeũvya ngovia na kĩtambaa kya ũlii mũseo mũlũmu, na o ta ũu ũiseũvya mũsivi wa ngũa wanakavĩtw'e kwa kũũtumĩĩa malaa.

40“Seũvĩsya ana ma Alũni kanzũ, mĩsivi ya ngũa na ngovia nĩ kana itume manengwa ndaĩa na iimanakavya.

41Ĩtina wa kwĩkĩa Alũni mwana-a-inyia waku na ana make ngũa isu, matw'ĩkĩthye athembi na ũimavatha kwa kũmetĩkĩsya mauta nĩ kana manthũkũmae ta athembi.

42Seũvya ngũa sya nthĩnĩ na ndii nzeo ndũmu nĩ kana maikoneke me athei. Syĩthĩwe ivw'ĩkĩte kuma kĩnyunyunĩ kũvika maunĩ.

43Alũni na ana make no nginya mekĩae ngũa isu sya nthĩnĩ kĩla ĩvinda meũlika Ĩeemanĩ ĩtheu ya kũkomanĩa na Ngai, kana yĩla maendete kĩthembeonĩ kũthũkũma vala Vandũnĩ Vatheu. Mekae ũu nĩ kana maikakwatwe nĩ ũndũ ũthũku na maikw'a. Ũũ nĩ mwĩao wa kũatĩĩawa ĩvinda yonthe nĩ Alũni na nzyawa syake syonthe.”

← Chapter 27 Jump to: Chapter 29 →