Exodus 3

Kamba (MBIVILIA ŨVOO MŨSEO)

← Chapter 2 Jump to: Chapter 4 →

1Mũthenya ũmwe, Mwose ayĩĩthya mbũi na malondu ma mũthoni wake, Yethilo, mũthembi wa Mitiani, nĩwaingie ndĩthya ĩsu kwĩsĩla weũnĩ, elekele ngalĩko ya ũthũĩlonĩ wa syũa, na avika kĩĩmanĩ kya Ngai kĩla kĩtawa Sinaĩ.

2Mũlaĩka wa Mwĩai Ngai nĩwamumĩlĩĩle ailyĩ ta ũlĩlĩnzĩ wa mwaki wumĩte kakuthunĩ katĩ. Mwose nĩwoonie kana o na vala kakuthu kau nĩkakanĩte mwaki, kayavĩsaa.

3Mwose nĩwaneenie na ngoo asya, “Ũũ nĩ ũseng'yo! Nĩkĩ kakuthu kateũvya? Kwaeka nĩthengeangĩe nĩsisye.”

4Yĩla Mwĩai Ngai woonie kana Mwose nĩwathengeea asisye, nĩwamwĩtie e vau kakuthunĩ katĩ, “Mwose! Mwose!” Nake Mwose eetĩka, “Ĩĩ, ninyioo.”

5Ngai nĩwamwĩie atĩĩ, “Ndũkathengee vaa. Umya iatũ syaku nũndũ ũũngamĩte vandũ vatheu.

6Ninyie Ngai wa aaũmae maku, Ngai wa Avalaamu, Isaka na Yakovo.” Kwoou Mwose nĩwavw'ĩkie ũthyũ wake nĩkwĩthĩwa nĩwakĩie kũsisya Ngai.

7Nĩvo ĩndĩ Mwĩai Ngai wamwĩie, “Nĩnonete ũndũ andũ makwa ala me nthĩ ya Misili meũthĩnw'a, na nĩnĩw'ĩte mayĩĩa nũndũ wa kũthĩnw'a nĩ anene moo, na nĩngũmew'ĩa tei.

8Kwoou nĩnĩtheete nĩ kana nĩmavonokye kuma ũtonyinĩ wa andũ ma Misili, na ngĩmaumya nthĩ ya Misili nĩmatwae kũndũ kwĩ nthĩ nzeo na nene, nthĩ nthwii na nou, ĩla yu ĩtwĩe Akanaani, Aititi, Aamoli, Avelisi, Aivi na Ayevusi.

9Kwa w'o nĩnĩw'ĩte kĩĩo kya andũ makwa Ĩsilaeli, na o ta ũu nĩnonete ũndũ andũ ma Misili mamathĩnasya.

10Kwoou ũka ngũtũme kwa mũsumbĩ wa Misili, nĩ kana ũkatongoesye andũ makwa, nzyawa sya Ĩsilaeli, ũmaumye nthĩ yake.”

11Ĩndĩ Mwose eea Ngai, “Nyie ninyie ũũ atĩ nĩthi kwa mũsumbĩ na kũtongoesya andũ ma Ĩsilaeli nĩmaumye nthĩ ya Misili?”

12Ngai nĩwamwĩie atĩĩ, “Ngeethĩawa naku, na yĩla wĩumya andũ asu nthĩ ya Misili, mũkanthaithĩaa kĩĩmanĩ kĩĩ. Ũsu ũkeethĩwa ũĩkĩĩthyo wa kana nyie Ngai ninyie ngũtũmĩte.”

13Nĩvo ĩndĩ Mwose weeie Ngai, “Yĩla ngũthi kũla kwĩ andũ ma Ĩsilaeli na ngĩmea, ‘Ngai wa aaũmae menyu nũndũmĩte kũla mũĩ,’ namo maingũlya, ‘Etawa ata?’ Nĩthi kũmea ata?”

14Ngai amwĩa Mwose, “NINYIE ŨLA NINYIE.” Na asyoka amwĩa, “Ũũ nĩw'o wĩtavya andũ ma Ĩsilaeli: ‘Ũla wĩtawa NINYIE nũndũmĩte kũla mũĩ.’ ”

15Ngai nĩwaendeeie kũneena na Mwose amwĩa atĩĩ, “Tavya andũ ma Ĩsilaeli ũmee atĩĩ, ‘Mwĩai Ngai, Ngai wa aaũmae menyu, ũla nĩ Ngai wa Avalaamu, Isaka na Yakovo, nũndũmĩte kũla mũĩ.’ Yĩu nĩyo ĩsyĩtwa yakwa kũvika tene na tene, na nĩyo nzyawa syonthe sya ĩvinda yũkĩte ikambĩtaa.

16Enda na ũyũmbany'a atongoi ma Ĩsilaeli na ũimatavya kana nyie, Mwĩai Ngai, Ngai wa aaũmae moo, Ngai wa Avalaamu, Isaka, na Yakovo, nĩnĩkumĩlĩĩle na nakwĩa atĩĩ, ‘Nĩthĩĩtwe nĩmũsyaĩĩsye na nĩnonete ũndũ mwĩkawa mwĩ nthĩ ya Misili.

17Nĩnĩtw'ĩte kũmumya nthĩ ya Misili, vala mũthĩnĩaw'a mũno, na kũmũtwaa nthĩ nthwii na nou, ĩla yu ĩtwĩe Akanaani, Aititi, Aamoli, Avelisi, Aivi na Ayevusi.’

18“Atongoi ma Ĩsilaeli makeethukĩĩsya ũndũ wĩmatavya. Nĩvo ĩndĩ we namo mwĩthi kwa mũsumbĩ wa Misili na mũimwĩa atĩĩ, ‘Mwĩai Ngai, Ngai wa Aevelania, nĩwĩvuanĩtye kwitũ. Na yu twĩkwĩsũva ũtũnenge mwanya, tũthi kyalo kya matukũ atatũ kũu weũnĩ, tũkamũthembee Mwĩai Ngai, ũla nĩ Ngai waitũ.’

19Nĩnĩsĩ kana mũsumbĩ wa Misili ndakamũlekya mũthi, ate o e mũlasimĩthye kwĩka ũu nĩ ũtonyi mũnene.

20Ĩndĩ ngatũmĩa ũtonyi wakwa na kũmakany'a andũ ma Misili kwĩsĩla maũndũnĩ ma kũseng'ya ala nĩĩka kũu. Ĩtina wa ũu akamũlekya mũthi.

21“Ngatuma andũ ma Misili mamũnenga ndaĩa wĩthĩe yĩla andũ makwa makambĩĩa kuma kũu, maikathi mate kĩndũ.

22Kĩla mũndũ mũka wa mbaĩ ya Ĩsilaeli nũkathĩ kwa atũi make ma mbaĩ ya Misili na kwa mũndũ mũka o na wĩva wa mbaĩ ya Misili ũla wĩkalaa nake kwake na kũmwĩtya syĩndũ sya wanake sya thaavu na sya silĩva, o vamwe na ngũa. Andũ ma Ĩsilaeli nĩmakekĩa syana syoo sya ivĩsĩ na sya eĩtu syĩndũ isu na mũikua ũthwii ũsu w'onthe mũwumye kwa andũ ma Misili.”

← Chapter 2 Jump to: Chapter 4 →