Exodus 39

Kamba (MBIVILIA ŨVOO MŨSEO)

← Chapter 38 Jump to: Chapter 40 →

1Mbesaleli, Ooliavu na ala andũ maĩ na ũmanyi nĩmatũmĩie ila ndii sya w'ĩa wa langi wa mbuluu, ũngĩ wa langi wa nzambalaũ, na ũngĩ mũtune mũno kũseũvya ngũa nzeo ila athembi maĩlĩte kwĩkĩa yĩla meũthũkũma vala Vandũnĩ Vatheu. Nĩmaseũvisye ngũa sya kĩ-ũthembi sya Alũni kwĩanana na ũndũ Mwĩai Ngai weeaĩie Mwose.

2Nĩmaseũvisye ngũa ya ĩũlũ ya mũthembi na ndii nzeo ndũmu mbokothe sya w'ĩa wa langi wa mbuluu, ũngĩ wa langi wa nzambalaũ, na ũngĩ mũtune mũno, na ũlii wa thaavu.

3Nĩmatumbatumbie thaavu wathekeva na maũtilanga watw'ĩka tũmĩkunzu na maũtumanĩsya na ila ndii nzeo ndũmu mbokothe sya langi wa mbuluu, ũngĩ wa langi wa nzambalaũ, na ũngĩ mũtune mũno.

4Nĩmaseũvĩsye ngũa ĩsu ya ĩũlũ ikwatũ ilĩ sya ituo na maitumĩĩa ndeenĩ syayo nĩ kana yĩthĩwe ĩkwatanĩtw'e vamwe.

5Nĩmamĩtumĩĩie mũsivi ũtumĩtwe nesa na itambaa o isu nĩ kana wĩthĩwe ũkwatene kwĩanana na ũndũ Mwĩai Ngai wamwĩaĩĩte Mwose.

6Nĩmaseũvisye ala mavia ma onekisi na mamombĩĩa kĩndũnĩ kyanakavĩtw'e na thaavu na matemeleelwa ta mũulĩ masyĩtwa ĩkũmi na elĩ ma ana ma Ĩsilaeli.

7Nĩmooveeie mavia asu ila ikwatũnĩ sya ĩla ngũa ya ĩũlũ ya mũthembi methĩwe ta mavia ma ũlilikany'o wa mbaĩ ĩkũmi na ilĩ sya andũ ma Ĩsilaeli kwĩanana na ũndũ Mwĩai Ngai wamwĩaĩĩte Mwose.

8O ta ũu nĩmaseũvisye ngusu ya kwoveea kĩthũi ya Mũthembi ũla Mũnene na ũmanyi mwingĩ maitũmĩa o syĩndũ ila matũmĩĩte kũseũvya ngũa ya ĩũlũ. Mamĩseũvisye na ndii nzeo ndũmu mbokothe sya langi wa mbuluu, ingĩ sya langi wa nzambalaũ, na ingĩ ndune mũno, na ũlii wa thaavu.

9Ngusu ĩsu nĩyeanene ngalĩko syonthe syĩ inya na ĩkatũlanĩlwa kũndũ kwĩlĩ. Ũasa na ũthanthau wayo waĩ wa sendimita mĩongo ĩlĩ na ilĩ.

10Nĩmoombĩĩie ngusu ĩsu mĩthĩa ĩna ya mavia ma thooa mũnene: Mũthĩanĩ wa mbee nĩmoombĩĩie ala metawa salitũ, tovasi na nganeti;

11mũthĩanĩ wa kelĩ moombĩĩa ala metawa emelandi, savaya na ndaĩamondi;

12mũthĩanĩ wa katatũ nĩmoombĩĩie angĩ metawa Yasithi, angate, na amethisi;

13na mũthĩanĩ wa kana moombĩĩa angĩ metawa mbelili, onekisi, na yasiva. Mavia asu ĩkũmi nĩmoombĩĩiwe ĩũlũ wa syĩndũ mbanakavye sya thaavu.

14Kĩla yĩmwe ya mavia asu ĩkũmi na elĩ nĩyaandĩkĩtwe kwa kũtemeleelwa ĩsyĩtwa yĩmwe ya ana ma Yakovo nĩ kana maũngamae vandũ va mbaĩ ĩkũmi na ilĩ sya andũ ma Ĩsilaeli.

15Nĩmaseũvĩsye ngusu ĩsu nyololo sya thaavu mũthei imilanĩtw'e ta ĩkanda.

16O ta ũu nĩmaseũvisye syĩndũ ilĩ mbanakavye sya thaavu na ngome ilĩ sya thaavu na masyĩkĩa mĩthyanĩ ya ĩũlũ ya ngusu ĩsu.

17Nĩmakundĩkĩile ila nyololo ilĩ sya thaavu ngomenĩ isu ilĩ,

18na makundĩkĩla mĩthya ĩla ĩngĩ ĩlĩ ya nyololo isu sya thaavu ila syĩndũnĩ mbanakavye sya thaavu. O ta ũu, nĩmaikwatanĩlye mbee na ila ikwatũ sya ngũa ya ĩũlũ.

19Nĩvo ĩndĩ maseũvisye ngome ilĩ sya thaavu na masyoveea mĩthyanĩ ĩlĩ ya ĩtheo ya ngusu ĩsu ũtiivonĩ ũla wĩ ngalĩko ya nthĩnĩ vakuvĩ na ĩla ngũa ya ĩũlũ.

20Nĩmaseũvisye ngome ingĩ ilĩ sya thaavu na maikwatanĩlya mbee ngalĩkonĩ ya ĩtheo ya ila ikwatũ sya ngũa ya ĩũlũ vakuvĩ na mũtũlo wa ĩũlũ wa ũla mũsivi ũtumĩtwe nesa na kĩtambaa.

21Nĩmoovanisye ngome sya ngusu ĩsu na ila sya ngũa ya ĩũlũ na ũlii wa mbuluu nĩ kana ngusu ĩsu yĩthĩwe ĩkomee ũla mũsivi ũtumĩtwe nesa na kĩtambaa ndĩkethĩwe yĩ ndeelu. Meekie ũu kwĩanana na ũndũ Mwĩai Ngai wamwĩaĩĩte Mwose.

22Nĩmaseũvisye ngũa ndaasa ĩla yĩkĩawa ungu wa ngũa ya ĩũlũ ĩla yĩtawa evoti; yaseũviw'e na w'ĩa wa langi wa mbuluu yonthe.

23Ngũa ĩsu ndaasa yaĩ na ĩima ya kũlikya mũtwe. Ũtiivo wa ĩima yĩu walũlũmĩĩlw'e kwa kũtumwa na ũlii nĩ kana ũyĩsiĩĩe kũtembũka.

24Nĩmamĩtumĩĩie mavisa ma matunda ma makũngũmanga na ndii nzeo ndũmu sya w'ĩa wa langi wa mbuluu, ũlii ũngĩ wa langi wa nzambalaũ, na ũngĩ mũtune mũno kwĩlingĩla ũtiivo wa ngũa ĩsu.

25O ta ũu nĩmaseũvisye ngengele sya thaavu mũthei na maitumĩĩa katĩ wa mavisa ma matunda asu kwĩlingĩla ũtiivo wa ngũa ĩsu.

26Nĩmatumĩĩie ngengele isu sya thaavu kĩla ĩmwe ĩatĩanĩe na ĩtunda yĩmwe ũtiivonĩ wa ĩtheo wa ngũa ĩsu ya ũthũkũmi. Meekie ũu kwĩanana na ũndũ Mwĩai Ngai wamwĩaĩĩte Mwose.

27Nĩmatumĩie Alũni na ana make kanzũ sya kĩtambaa kĩseũvĩtw'e na ndĩĩ nzeo ndũmu,

28ngovia, ngũa sya nthĩnĩ,

29na mũsivi wa ngũa ũtumĩtwe na kĩtambaa kya ũlii mũseo mũlũmu wa w'ĩa wa langi wa mbuluu, ũngĩ wa langi wa nzambalaũ, na ũngĩ mũtune mũno wanakavĩtw'e kwa kũtumĩĩwa malaa. Meekie ũu kwĩanana na ũndũ Mwĩai Ngai wamwĩaĩĩte Mwose.

30Nĩmaseũvisye kĩlaũnĩ kĩtheu kya thaavu mũthei na makĩandĩka kwa ũkĩtemeleela ndeto ii: “Mũvathe kwondũ wa Mwĩai Ngai.”

31Nĩmakundĩkĩile kĩlaũnĩ kĩu ĩla ngovianĩ na mũsivi wa mbuluu kwĩanana na ũndũ Mwĩai Ngai wamwĩaĩĩte Mwose.

32Mbesaleli na atetheesya make nĩmaminie wĩa w'onthe wa kũseũvya Ĩeema ĩtheu ya kũkomanĩa na Mwĩai Ngai. Andũ ma Ĩsilaeli nĩmeekĩte maũndũ onthe kwĩanana na ũndũ Mwĩai wamwĩaĩĩte Mwose.

33Nĩmaetie Ĩeema yĩu vala ve Mwose o vamwe na syĩndũ syayo syonthe; ngolya, mbwaũ, mĩamba, ituĩ, na matina mayo;

34syĩndũ sya kũyĩvw'ĩka iseũvĩtw'e na kĩthuma kya ndũũme kĩindĩtwe langinĩ mũtune, kĩthuma kĩngĩ kĩseo kyololo, na ĩla suka ya kũaany'a vala Vandũ Vatheu na vala Vatheu Mũno.

35Ĩsandũkũ ya Ũtianĩo yĩkĩĩtwe ala masengea ma mavia, ituĩ syayo, na ĩla ngunĩko ya yo.

36Mesa na syĩndũ syonthe syayo, na mĩkate ĩthembewe Ngai;

37kĩndũ kya kwilĩĩla taa kĩseũvĩtw'e na thaavu mũthei, taa syakyo, syĩndũ syakyo, na mauta ma taa isu;

38kĩthembeo kya thaavu, mauta ma kwĩtĩkĩsya, na ũla ũvani wĩ mũuke mũseo; suka wa kwĩkĩa mũomonĩ wa Ĩeema yĩu;

39kĩthembeo kya mbulonzi na kĩsungi kyakyo kya mbulonzi, ituĩ, na syĩndũ syonthe syakyo; kalaĩ ka kũthambĩa na ĩtina yako;

40suka sya kĩwanza na ituĩ na matina masyo; suka sya mũvĩa wa kĩwanza kĩu na makanda makyo; syambo sya Ĩeema, syĩndũ syonthe ila syatũmĩawa ũthũkũminĩ wa Ĩeema;

41ila ngũa nzeo mbanake ila athembi maĩlĩte kwĩkĩa yĩla meũthũkũma me vala Vandũnĩ Vatheu, ngũa ntheu sya Alũni ũla mũthembi na sya ana make sya kũthũkũmaa wĩanĩ wa ũthembi.

42Andũ ma Ĩsilaeli nĩmatethetye wĩa w'onthe kwĩanana na ũndũ Mwĩai Ngai wamwĩaĩĩte Mwose.

43Mwose nĩwasyaisye wĩa ũsu na oona kana nĩmaũtethetye kwĩanana na ũndũ Mwĩai Ngai wamwĩaĩĩte. Kwoou Mwose amaathima.

← Chapter 38 Jump to: Chapter 40 →