Exodus 40

Kamba (MBIVILIA ŨVOO MŨSEO)

← Chapter 39 Jump to:

1Mwĩai Ngai nĩwaneenie na Mwose amwĩa atĩĩ,

2“Ĩtukũ yĩmwe ya mwei wa mbee wĩamba Ĩeema ĩtheu ya kũkomanĩa na Mwĩai Ngai.

3Nthĩnĩ wa Ĩeema yĩu ũkeekĩa yĩla Ĩsandũkũ ya Ũtianĩo yĩkĩĩtwe ĩla Mĩao ĩkũmi na ũyĩkĩa suka wa kũyĩvithany'a mbee wayo.

4Wĩete ĩla mesa vamwe na syĩndũ syayo nthĩnĩ wa Ĩeema, na o ta ũu ũiete kĩla kĩndũ kya kwilĩĩla taa na ũyilĩĩla taa ĩũlũ wakyo.

5Wĩia kĩla kĩthembeo kya thaavu kya kũvĩvĩsya ũvani vau mbee wa Ĩsandũkũ ya Ũtianĩo na ũyĩkĩa suka mũomonĩ wa Ĩeema.

6Wĩia kĩthembeo kya nthembo sya kũvĩvw'a mbee wa Ĩeema ĩtheu ya kũkomanĩa na Mwĩai Ngai.

7O ta ũu, wĩia kalaĩ ka kũthambĩa katĩ wa Ĩeema na kĩthembeo kya nthembo sya kũvĩvw'a na ũikekĩa kĩw'ũ.

8Wĩĩkĩa ũla wiio wĩlingĩlĩte kĩwanza kĩla kĩ nza wa Ĩeema na ũyĩkĩa suka mũvĩanĩ wa kĩwanza kĩu.

9“Wĩosa ala mauta ma kwĩtĩkĩsya na ũyĩtĩkĩsya Ĩeema na syĩndũ syonthe ila syĩ nthĩnĩ wayo na kũyĩvatha yĩthĩwe yĩ ĩtheu.

10O ta ũu wĩĩtĩkĩsya mauta kĩthembeo kya nthembo sya kũvĩvw'a o vamwe na syĩndũ syayo ũkĩvathe na kĩkeethĩwa kĩ kĩtheu vyũ.

11Wĩsyoka wĩtĩkĩsye mauta kala kalaĩ ka kũthambĩa na ĩtina yako na kũkavatha.

12“Wĩmũete Alũni na ana make mũomonĩ wa Ĩeema ĩtheu ya kũkomanĩa na Ngai na kũmathambya na kĩla kĩw'ũ.

13Wĩmwĩkĩa Alũni ila ngũa ntheu sya kĩ-ũthembi na kũmwĩtĩkĩsya mauta ũmũvathe, nĩ kana anthũkũmae ta mũthembi.

14Wĩete ana ma Alũni, o ta ũu, na ũimekĩa kanzũ.

15Wĩmetĩkĩsya mauta o ta ĩthe woo, nĩ kana o namo manthũkũmae ta athembi. Kũmetĩkĩsya mauta kũu kũkamatw'ĩkĩthya athembi tene na tene.”

16Mwose nĩweekie maũndũ onthe kwĩanana na ũndũ Mwĩai Ngai wamwĩaĩie.

17Kwoou ĩtukũ yĩmwe ya mwei wa mbee mwakanĩ wa kelĩ ĩtina wa andũ ma Ĩsilaeli kuma Misili, Mwose nĩwambie Ĩeema ĩtheu ya kũkomanĩa na Mwĩai Ngai.

18Nĩwaiie matina mayo, aũngamya mbwaũ syayo, akwatany'a mĩamba ya yo, na aũngamya ituĩ syayo.

19Nĩwooveeie kyandalũa Ĩeemanĩ na ayĩvw'ĩka kwĩanana na ũndũ Mwĩai Ngai wamwĩaĩĩte.

20Nĩvo ĩndĩ woosie ala masengea elĩ ma mavia na amekĩa yĩla Ĩsandũkũnĩ ya Ũtianĩo. Nĩweekĩie ĩla mĩtĩ ya kũyĩkua ngomenĩ syayo na ayilĩĩla ĩla ngunĩko.

21Nĩwalikilye Ĩsandũkũ yĩu Ĩeemanĩ na akolelya ĩla suka ya kũyĩvitha kwĩanana na ũndũ Mwĩai Ngai wamwĩaĩĩte.

22Nĩwalikilye ila mesa, Ĩeemanĩ na amia ngalĩko ya ĩũlũ ya Ĩeema yĩu nza wa ĩla suka ya kũvithany'a Ĩsandũkũ ya Ũtianĩo.

23Nĩwailĩĩle mesanĩ ĩsu mũkate ũla ũthembeawa Mwĩai Ngai kwĩanana na ũndũ Mwĩai Ngai wamwĩaĩĩte.

24Nĩweekĩie kĩla kĩndũ kya kwilĩĩla taa Ĩeemanĩ ngalĩkonĩ ya ĩtheo kĩthimanĩte na mesa,

25na akwatya taa syakyo mbee wa Mwĩai Ngai kwĩanana na ũndũ Mwĩai Ngai wamwĩaĩĩte.

26Nĩwalikilye kĩla kĩthembeo kya thaavu Ĩeemanĩ akia mbee wa ĩla suka ya kũvithany'a Ĩsandũkũ ya Ũtianĩo.

27Nĩwavĩvĩisye ũla ũvani wĩ mũuke mũseo kĩthembeonĩ kĩu, kwĩanana na ũndũ Mwĩai Ngai wamwĩaĩĩte.

28Nĩwakoleilye suka mũononĩ wa Ĩeema yĩu ya kũmbanĩa.

29Nĩwaiie kĩla kĩthembeo kya nthembo sya kũvĩvw'a vakuvĩ na mũomo wa Ĩeema. Nĩwaumĩisye kĩthembeonĩ kĩu nthembo sya kũvĩvw'a na ingĩ sya ngetha ya mbaa mbeke kwĩanana na ũndũ Mwĩai Ngai wamwĩaĩĩte.

30Nĩwaiie kala kalaĩ ka kũthambĩa katĩ wa Ĩeema ĩtheu ya kũkomanĩa na Ngai na kĩthembeo kĩu. Nĩwakekĩie kĩw'ũ kya kũthamba.

31Mwose, Alũni na ana make nĩmathambaa moko na maũũ kĩw'ũnĩ kĩu,

32kĩla ĩvinda mekũthi kũlika Ĩeemanĩ kana mekũthi vakuvĩ na kĩthembeo. Meekaa ũu kwĩanana na ũndũ Mwĩai Ngai weeaĩĩte Mwose.

33Mwose nĩwaseũvisye kĩwanza kyeelingĩlĩte Ĩeema yĩu ya kũkomanĩa na Mwĩai Ngai vamwe na kĩthembeo. Nĩwakoleilye suka mũvĩanĩ wa kĩwanza kĩu. Kwoou Mwose nĩwaminie kũtethya wĩa ũsu.

34Nĩvo ĩndĩ ĩtu yavw'ĩkie Ĩeema na ũtheu mũtisu wa Mwĩai Ngai wausũa Ĩeemanĩ yĩu.

35Mwose ndaĩ atonya kũlika Ĩeemanĩ ĩtheu ya kũkomanĩa na Ngai nũndũ ĩtu yĩu nĩyavw'ĩkĩte Ĩeema yĩu, na ũtheu mũtisu wa Mwĩai Ngai ũkausũa Ĩeemanĩ yĩu.

36Andũ ma Ĩsilaeli nĩmookĩlaa makambĩĩa kyalo kya kũthi vandũ vangĩ o yĩla ĩtu yĩu yookĩla kuma Ĩeemanĩ.

37Ĩndĩ ĩtu yalea kũkĩlw'a, mayaendaa kyalo nginya yĩla yĩkokĩlw'a.

38Kwoou ĩvindanĩ yonthe yĩla andũ ma Ĩsilaeli meethĩawa kyalonĩ, nĩmoonaa ĩtu yĩu ya Mwĩai Ngai yĩ ĩũlũ wa Ĩeema mũthenya, na ũtukũ mayona mwaki wakanĩte ĩũlũ wayo.

← Chapter 39 Jump to: