Exodus 35

Kamba (MBIVILIA ŨVOO MŨSEO)

← Chapter 34 Jump to: Chapter 36 →

1Mwose nĩweetie andũ onthe ma Ĩsilaeli na amea, “Aa nĩmo maũndũ ala Mwĩai Ngai ũmwĩaĩe mwĩke:

2Mwĩ na mĩthenya thanthatũ ya kũtethya wĩa wenyu, ĩndĩ mũthenya wa mũonza nĩ mũthenya mũtheu, mũthenya mũnene wa kũthũmũa ũvathĩtwe kwondũ wakwa nyie Mwĩai Ngai. Mũndũ o na wĩva ũla ũkatethya wĩa mũthenyanĩ ũsu, aĩlĩte kũawa.

3Mũikaatate kũvuva mwaki mĩsyĩnĩ yenyu mũthenyanĩ ũsu wa Savato.”

4Mwose nĩweeie andũ onthe ma Ĩsilaeli atĩĩ, “Ũũ nĩw'o Mwĩai Ngai wĩaĩte mwĩke:

5Kuma syĩndũnĩ ila mwĩ nasyo, umĩsyai Mwĩai Ngai nthembo. Mũndũ ũla ũkwenda nĩaumĩsye Mwĩai Ngai nthembo ya thaavu, silĩva, mbulonzi,

6ndii sya mbuluu, ingĩ sya langi wa nzambalaũ, ingĩ ndune mũno, ndii nzeo ndũmu mbokothe, ngũa sya w'ĩa wa mbũi,

7ithuma sya ndũũme ikundĩtw'e langi mũtune, ithuma nzeo mbololo, mbwaũ sya mũtĩ wa mũea,

8mauta ma taa, syĩndũ sya kũnyungya nesa, mauta ma kwĩtĩkĩsya andũ na ma ũvani wĩ mũuke mũseo,

9mavia ma thooa mũnene metawa onekisi na angĩ ma kwendeesya ma kũtumĩĩwa ngũanĩ ya ĩũlũ ya Mũthembi ũla Mũnene, na ngusunĩ yake ya kĩthũi.

10“Andũ onthe ala me na ũmanyi wa kwaka nĩmoke meke maũndũ onthe ala Mwĩai Ngai wĩaĩte.

11Ĩeema ĩtheu ya kũkomanĩa na Mwĩai Ngai, kyandalũa kyayo na syĩndũ sya kũyĩvw'ĩka, ngolya syayo na mbwaũ sya kũyĩũngamya, mĩamba ya yo, ituĩ syayo na matina mayo;

12Ĩsandũkũ ya Ũtianĩo, mĩtĩ ya kũyĩkua, ngunĩko ya yo ĩla nĩ vandũ va Ngai va kũekeaa naĩ, na ĩla suka ya kũaany'a vala Vandũ Vatheu na vala Vatheu Mũno;

13mesa na mĩtĩ ya kũmĩkua, na mĩio ya yo yonthe na mĩkate ĩthembewe Ngai;

14kĩndũ kya kwilĩĩla taa kwondũ wa kyeni na syĩndũ syakyo; taa na mauta masyo;

15kĩthembeo kya kũvĩvĩsya ũvani na mĩtĩ yakyo ya ũkĩkua; mauta ma kwĩtĩkĩsya; ũvani wĩ mũuke mũseo; kĩtambaa kya kwĩkĩa mũomonĩ wa Ĩeema ĩtheu ya kũkomanĩa na Mwĩai Ngai,

16kĩthembeo kya nthembo sya kũvĩvw'a vamwe na kĩsungi kyakyo kĩseũvĩtw'e na mbulonzi, mĩtĩ ya ũkĩkua, na mĩio yakyo yonthe; kalaĩ ka kũthambĩa na ĩtina yako.

17Suka sya kũseũvya nza ya Ĩeema, ituĩ na matina masyo; suka ya kwĩkĩa mũvĩanĩ wa nza ĩsu,

18syambo ingĩ sya Ĩeema na ingĩ sya kũseũvya nza ya Ĩeema, na makanda;

19ngũa nzeo mbanake ila athembi meĩkĩaa yĩla meũthũkũma vala Vandũnĩ Vatheu, ngũa ntheu sya Alũni ũla mũthembi na sya ana make kwondũ wa wĩa woo wa ũthembi.”

20Andũ onthe na Ĩsilaeli nĩmaumie vala ve Mwose.

21Mũndũ ũla wendeeiw'e nĩ kwĩka maũndũ asu, nĩwaetie nthembo kwa Mwĩai Ngai ya kũseũvya Ĩeema ĩtheu ya kũkomanĩa na Mwĩai Ngai. Nĩmaetie syĩndũ syonthe ila syendekaa itũmĩwe ũthaithinĩ na kũseũvya ngũa sya kĩ-ũthembi.

22Andũ onthe, aũme na aka, ala mendeeiw'e nĩmookie maete syĩndũ sya wanake sya thaavu sya kĩla mũthemba; vĩnĩ, mĩnaĩ, mbete sya kwĩkĩa mũulĩ na masoa ma kwĩkĩa ngingo. Nĩmaumisye thaavu woo ta nthembo kwa Mwĩai Ngai.

23Mũndũ w'onthe ũla waĩ na ndii nzeo ndũmu, sya mbuluu, ingĩ sya langi wa nzambalaũ na ingĩ ndune mũno, ngũa sya w'ĩa wa mbũi; ithuma sya ndũũme iiindĩtwe langinĩ mũtune kana ithuma nzeo mbololo nĩwaietie.

24Andũ onthe ala maĩ matonya kumya silĩva kana mbulonzi, nĩmaetie nthembo yoo kwa Mwĩai Ngai, na ala maĩ na mĩtĩ ya mũea ĩla yaĩ ĩtonya kũtũmĩwa wĩanĩ o na wĩva nĩmamĩetie.

25Aka onthe ala maĩ na ũmanyi wa kwokotha ndii na moko, nĩmaetie ndii nzeo ndũmu, ingĩ sya mbuluu, ingĩ sya langi wa nzambalaũ na ingĩ ndune mũno ila maseũvĩtye.

26O ta ũu aka ala maĩ na ũmanyi na mendaa, nĩmaseũvisye ndii sya w'ĩa wa mbũi.

27Atongoi nĩmaetie mavia ma onekisi na mavia ma mĩthemba ĩngĩ ma kwĩkĩa ngũanĩ ya ĩũlũ ya mũthembi na ngusunĩ yake ya kwoveea kĩthũi.

28O ta ũu, nĩmaetie mĩtĩ inyungaa nesa na mauta ma taa, mauta ma kwĩtĩkĩsya na ma kwĩkĩa ũla ũvaninĩ ũnyungaa nesa.

29Andũ onthe ma Ĩsilaeli ala mendeeiw'e nĩmaetie nthembo syoo kwa Mwĩai Ngai kwondũ wa wĩa ũla weeaĩie Mwose ũtethw'e. Maietie syĩthĩwe ta nthembo syumĩtw'e na ngoo ya kwenda.

30Nĩvo ĩndĩ Mwose weeie andũ ma Ĩsilaeli atĩĩ, “Mwĩai Ngai nũnyuvĩte Mbesaleli, mwana wa Ũli na mwĩsũkũũe wa Uulu wa mbaĩ ya Yuta.

31Ngai nũmusũĩtye na Veva wake na akamũnenga ũtonyi, kĩlĩko, ũĩ, na ũmanyi wa kũseũvya syĩndũ sya mĩthemba yonthe.

32Mbesaleli nũtonya kũseũvya syĩndũ mbanake aitũmĩa thaavu, silĩva, na mbulonzi;

33o ta ũu, nũtonya kwasa mavia ma thooa mũnene, kwasa mbwaũ, na kũtethya mawĩa ma mĩthemba yonthe na ũĩ.

34Mwĩai Ngai nũnengete Mbesaleli e na Ooliavu mwana wa Aisamaki wa mbaĩ ya Ndani ũtonyi wa kũmanyĩsya andũ angĩ kwĩthĩwa na ũmanyi ũla menaw'o.

35Nũmanengete ũmanyi wa kũseũvya syĩndũ sya mĩthemba yonthe, kũsũanĩa na kũvanga kĩla meũseũvya, na kũtuma na ndii nzeo ndũmu, ingĩ sya w'ĩa wa langi wa mbuluu, ingĩ sya langi wa nzambalaũ na ingĩ ndune, na sya ngũa sya mĩthemba ĩngĩ. Nĩmatonya kũtethya wĩa wa kĩla mũthemba na nĩ andũ me na ũmanyi wa kũsũanĩa na kũvanga kĩla mekwenda kũseũvya.

← Chapter 34 Jump to: Chapter 36 →