Exodus 27

Kamba (MBIVILIA ŨVOO MŨSEO)

← Chapter 26 Jump to: Chapter 28 →

1Mwĩai Ngai nĩwaneenie na Mwose amwĩa atĩĩ, “Seũvya kĩthembeo kya kumĩsya nthembo sya kũvĩvw'a ũitũmĩa mbwaũ sya mũtĩ wa mũea. Ũasa na ũthanthau syĩthĩwe syĩanene; ũasa wa mita ilĩ na sendimita mĩongo ĩlĩ na o ta ũu ũthanthau wa mita ilĩ na sendimita mĩongo ĩlĩ, na kĩyĩthĩwa na ũtũlu wa mita ĩmwe na sendimita mĩongo ĩtatũ.

2Seũvya mĩthya ĩũlũ wa kona inya. Mĩthya ĩsu yĩthĩwe ĩkwatene na kĩthembeo kĩu, na syonthe ũisyũmbĩĩa kyũma kya mbulonzi.

3Seũvya mbisũ sya kwĩkĩa mũu wa kĩthembeo kĩu, mĩko, tũlaĩ, syĩndũ sya kũtonya nyama, na sya kwoka mwaki. Isu syonthe iseũvye na kyũma kya mbulonzi.

4Seũvya kĩsungi kya mbulonzi na ũikĩkĩa ngome inya sya mbulonzi konanĩ syakyo sya ũkĩkua.

5Likya kĩsungi kĩu mũlengonĩ wĩ katĩ nĩ kana kĩsungi kĩu kĩthĩwe kĩaanĩlye kĩthembeo katĩ.

6Seũvya mĩtĩ ya mũea kwondũ wa kĩthembeo na ũimyũmbĩĩa kyũma kya mbulonzi.

7Mĩtĩ ĩsu yĩkĩwe ngomenĩ nĩ kana yĩthĩawe yĩ ngalĩko syelĩ sya kĩthembeo yĩla kĩkuĩtwe.

8Seũvya kĩthembeo kĩu na mbwaũ, kĩna ĩima katĩ kwĩanana na mũseũvĩlye ũla nĩnakwonisye wĩ kĩĩmanĩ.

9“Seũvĩsya Ĩeema yĩu kĩwanza. Ngalĩko ya ĩtheo yakyo yĩthĩwe na suka syĩ na ũasa wa mita mĩongo ĩna na inya itumĩtwe na ndii nzeo ndũmu mbokothe.

10Kĩwanza kĩu kĩthĩwe na ituĩ mĩongo ĩlĩ sya mbulonzi syĩ na matina mĩongo ĩlĩ ma mbulonzi. Ngolya na mĩkunzu ya ituĩ isu yĩthĩwe yĩ ya silĩva.

11O ta ũu ngalĩkonĩ ya ĩũlũ ya kĩwanza kĩu vethĩwe suka syĩ na ũasa wa mita mĩongo ĩna na inya, na vayĩthĩwa na ituĩ mĩongo ĩlĩ na matina ma mbulonzi mĩongo ĩlĩ. Ngolya na mĩkunzu ya ituĩ isu yĩthĩwe yĩ ya silĩva.

12Naw'o ũthanthau wa kĩwanza kĩu ngalĩkonĩ ya ũthũĩlonĩ wa syũa wĩthĩwe na suka syĩ na ũasa wa mita mĩongo ĩlĩ na ilĩ, na ũyĩthĩwa na ituĩ ĩkũmi na matina masyo ĩkũmi.

13Ngalĩko ya wumĩlonĩ wa syũa ya kĩwanza kĩu, vala ve mũvĩa, o ta ũu vethĩwe na ũthanthau wa mita mĩongo ĩlĩ na ilĩ.

14Suka sya ngalĩko ĩmwe ya mũvĩa syĩthĩwe na ũasa wa mita thanthatũ na sendimita mĩongo thanthatũ, na ituĩ itatũ syĩ na matina masyo.

15Ngalĩko ĩla ĩngĩ ya mũvĩa suka isu syĩthĩwe na ũasa wa mita thanthatũ na sendimita mĩongo thanthatũ, na ituĩ itatũ syĩ na matina masyo.

16Mũvĩa nĩwĩthĩwe na suka wĩ na ũasa wa mita kenda, ĩtumĩtwe na ndii nzeo ndũmu mbokothe sya langi wa mbuluu, ũngĩ wa langi wa nzambalaũ, na ũngĩ mũtune mũno. Suka ĩsu yĩthĩwe yanakavĩtw'e mũno kwa kũtumĩĩwa malaa. Yĩthĩwe yambĩtwe ituĩnĩ inya syĩ na matina masyo ana.

17Ituĩ syonthe ila ithyũlũlũkĩte kĩwanza kĩu syĩthĩwe ikwatanĩtw'e na mĩkunzu ya silĩva, na ngolya syasyo iseũvĩtw'e na silĩva, na matina masyo maseũvĩtw'e na mbulonzi.

18Ũasa wa kĩwanza kĩu wĩthĩwe mita mĩongo ĩna na inya, na ũthanthau wa mita mĩongo ĩlĩ na ilĩ na ũtũlu ta mita ilĩ na sendimita mĩongo ĩlĩ. Suka sya kĩwanza kĩu syĩthĩwe itumĩtwe na ndii nzeo ndũmu mbokothe, na matina ma ituĩ mayĩthĩwa maseũvĩtw'e na kyũma kya mbulonzi.

19Mĩio yonthe ĩla ĩkũtũmĩwa Ĩeemanĩ yĩu na syambo syayo, na syambo sya kĩwanza syĩthĩwe iseũvĩtw'e na mbulonzi.

20“Meaĩe andũ ma Ĩsilaeli makũetee mauta ala maseo ma mũtĩ wa mũthata nĩ kana taa wakanae kĩla ĩvinda.

21Alũni na ana make makwatasye taa ũsu Ĩeemanĩ ĩtheu ya kũkomanĩa na Ngai, nza wa suka ĩla yĩ mbee wa Ĩsandũkũ ya Ũtianĩo. Vau mbee wakwa taa ũsu ũkakanaa kuma wĩoo nginya kũkakya. Mwĩao ũsu wĩanĩaw'e ĩvinda yonthe nĩ andũ ma Ĩsilaeli na nzyawa syoo.”

← Chapter 26 Jump to: Chapter 28 →