Exodus 30

Kamba (MBIVILIA ŨVOO MŨSEO)

← Chapter 29 Jump to: Chapter 31 →

1Mwĩai Ngai nĩwaneenie na Mwose amwĩa atĩĩ, “Seũvya kĩthembeo na mũtĩ wa mũea kya kũvĩvĩsya ũvani.

2Ngalĩko syakyo inya syĩthĩwe syĩanene. Kĩthĩwe na ũasa wa sendimita mĩongo ĩna na itano na ũthanthau wa sendimita mĩongo ĩna na itano na ũtũlu wa sendimita mĩongo kenda. Mĩthya yakyo ĩna yĩthĩwe ikwatanĩte nakyo.

3Ũmbĩĩa kĩthembeo kĩu ĩũlũ wakyo, na ngalĩkonĩ syakyo inya vamwe na mĩthya yakyo na thaavu mũthei. Ĩkĩa ndeenĩ syakyo thaavu ũkĩlingĩlĩte.

4Seũvĩsya kĩthembeo kĩu ngome ilĩ sya thaavu sya ũkĩkuaa na ũisyoveea ĩtheo wa ũla thaavu ũkĩlingĩlĩte ngalĩko syelĩ. Ngome isu nĩ sya ũkwatĩĩa mĩtĩ ya kũkĩkua.

5Seũvya mĩtĩ ĩsu ya ũkĩkua na mũtĩ wa mũea na ũimyũmbĩĩa thaavu mũthei.

6Ia kĩthembeo kĩu nza wa suka ĩla ĩniinĩte mbee wa Ĩsandũkũ ya Ũtianĩo, mbee wa ĩla ngunĩko vala nĩ wĩkalo wa Ngai wa kũekeaa naĩ. Vau nĩvo nĩkomanĩa naku.

7Kĩla kĩoko yĩla Alũni wooka kũseũvya ila taa no nginya avĩvĩsye ũvani wĩ na mũuke mũseo kĩthembeonĩ kĩu.

8No nginya eke ũu yĩla ũkũkwatya taa wĩoo. Nthembo ĩno ya ũvani ĩendeeae vate kĩsiĩĩi ĩvinda yonthe yĩla yũkĩte.

9Ndũkaumĩsye nthembo ya ũvani ũtemwĩtĩkĩlye kĩthembeonĩ kĩu, kana nthembo ya nyamũ kana ya ngetha ya mbaa mbeke. Ndũkatulũle nthembo ya ndivai kĩthembeonĩ kĩu.

10Ĩvinda yĩmwe kwa mwaka, Alũni no nginya athesye kĩthembeo kĩu kwa kũvaka mĩthyanĩ yakyo nthakame ya nyamũ ĩthembetwe kwondũ wa ũekeo wa naĩ. Ũndũ ũũ wa kĩla mwaka ũkeekawa kĩla ĩvinda. Kĩthembeo kĩu nĩ kĩtheu nũndũ nĩkĩvathĩtwe kwondũ wakwa.”

11Mwĩai Ngai nĩmaneenie na Mwose amwĩa atĩĩ,

12“Yĩla ũkwosa ũtalo wa andũ ma Ĩsilaeli kwa kũmatala, kĩla mũndũ no nginya aĩve kĩndũ kwakwa nyie Mwĩai Ngai kyovosye thayũ wake nĩ kana ndakakwatwe nĩ ũndũ ũthũku o na wĩva yĩla ũtalo wa andũ ũendee na kwoswa.

13Mũndũ ũla ũkwĩthĩwa aitalwa no nginya aĩve mbesa ila syathĩĩwe kũĩvwa, kwĩanana na kĩthimo kĩla kĩtũmĩawa Ĩeemanĩ ĩtheu. Kĩla mũndũ no nginya aĩve mbesa isu ta nthembo kwakwa.

14Ũla ũkũtalwa ũtalonĩ ũsu, wĩ na ũkũũ wa myaka mĩongo ĩlĩ na mbee no nginya ambumĩsye nthembo ĩsu.

15Mũthwii ndaĩlĩte kũĩva mbesa ivĩtũkĩte, kana ngya kũĩva mbesa iteanĩe yĩla mekũĩva mbesa isu kwondũ wa kwovosya mathayũ moo.

16Osa mbesa isu kuma andũnĩ ma Ĩsilaeli na kũitũmĩa kwondũ wa ũthũkũmi wa kũsũvĩa Ĩeema ĩtheu ya kũkomanĩa na Ngai. Mbesa isu syĩthĩwe ndĩvi kwondũ wa mathayũ moo nakwa nyie Mwĩai Ngai ngamasũvĩaa.”

17Mwĩai Ngai nĩwaneenie na Mwose amwĩa atĩĩ,

18“Seũvya kalaĩ ka kyũma kya mbulonzi ka kũthambĩa, na o ta ũu kena ĩtina ya mbulonzi. Ia kalaĩ kau katĩ wa Ĩeema ĩtheu ya kũkomanĩa na Ngai na kĩthembeo, na ũikekĩa kĩw'ũ.

19Alũni na ana make makathambĩaa moko na maũũ kalaĩnĩ kau.

20Matanamba kũlika Ĩeemanĩ ĩtheu ya kũkomanĩa na Ngai, kana yĩla meũthengeea vakuvĩ na kĩthembeo manthembee nyie Mwĩai Ngai nthembo ya kũvĩvw'a, makathambaa na kĩw'ũ nĩ kana maikakw'e.

21Makathambaa moko na maũũ moo nĩ kana maikakw'e. Ũsu ũkeethĩwa mwĩao wa kĩla ĩvinda kwoo o na kwa Alũni, na kwa nzyawa syake tene na tene.”

22Mwĩai Ngai nĩwaneenie na Mwose amwĩa atĩĩ,

23“Osa syĩndũ ii syumĩtw'e mĩtĩnĩ yĩ mũuke mũseo mũno; kĩlo thanthatũ sya mauta matweku metawa manemane, kĩlo itatũ sya angĩ me mũuke mũseo metawa sinamoni, na kĩlo itatũ sya angĩ maumĩtw'e ĩkangaanĩ yĩnyungaa nesa.

24O ta ũu osa kĩlo thanthatũ sya mũtĩ ũnyungaa nesa wĩtawa kalavuu. Ongela lita inya sya mauta ma mũthata.

25Syĩndũ isu syonthe ũkaivulany'a ũseũvye mauta matheu ma kwĩtĩkĩsya, mauta maseo maseũvĩtw'e na ũĩ wa mũndũ ũla ũseũvasya mauta. Makeethĩwa mauta matheu ma kwĩtĩkĩsya.

26Ĩtĩkĩsya mauta asu Ĩeema ya Kũkomanĩa na Ngai na Ĩsandũkũ ya Ũtianĩo.

27O ta ũu metĩkĩsye ĩla mesa, na mĩio ya yo, kĩla kĩndũ kya kwilĩĩla taa na mĩio yakyo, kĩla kĩthembeo kya kũvĩvĩsya ũvani,

28kĩthembeo kya nthembo sya kũvĩvw'a, vamwe na mĩio yakyo na kala kalaĩ ka kũthambĩa na ĩtina yako.

29Ũkaithesya nĩ kana syĩthĩwe syĩ ntheu vyũ. Kĩndũ o na kĩva kĩla kĩkaikiita kĩkaanangwa nĩ ũtonyi wa ũtheu wasyo.

30Nĩvo ĩndĩ wĩmetĩkĩsya Alũni na ana make mauta, na kũmavatha nĩ kana manthũkũmae ta athembi.

31Ũkaneena na andũ ma Ĩsilaeli na kũmea atĩĩ, ‘Aa makeethĩwa mauta makwa matheu ma kwĩtĩkĩsya ĩvindanĩ yonthe yĩla yũkĩte.

32Mauta asu maĩketĩkĩw'e mũndũ ũte mũthembi. O na vaikaseũvw'e angĩ mavulanĩtw'e na ithimo iilyĩ ta sya asu. Nĩ mauta matheu, na o ta ũu makeethĩwa me matheu kwenyu.

33Mũndũ o na wĩva ũla wĩseũvya mauta mailyĩ ta asu, kana kũmatũmĩa kwa mũndũ ũte mũthembi, ũsu ndakethĩwa atalwa ta ũmwe wa andũ makwa.’ ”

34Mwĩai Ngai nĩwaneenie na Mwose amwĩa atĩĩ, “Osa ithimo syĩanene sya mĩtĩ yĩna mũuke mũseo yĩtawa sitakiti, onuka, ngalivani, na ĩngĩ yĩtawa ũvumba.

35Tũmĩa mĩtĩ ĩsu kũseũvya ũvani, ũvulanĩtw'e ta mauta me mũuke mũseo. Ongela mũnyũ nĩ kana ũvani ũsu wĩkale wĩ mũseo na mũtheu.

36Tumba tumba ũmwe wa ũvani ũsu wĩthĩwe wĩ mũvinyu vyũ, na ĩiũtwaa Ĩeemanĩ ĩtheu ya kũkomanĩa na Ngai na mbee wa Ĩsandũkũ ya Ũtianĩo vala nĩkomanĩa naku. Ũkeethĩwa ũvani mũtheu mũno kwenyu.

37Mũikaatũmĩe ithimo ta ĩsu kũseũvya ũvani ũilyĩ ta ũsu kwondũ wenyu. Ũvani ũsu ũkeethĩwa kĩndũ kĩtheu kwenyu, na kĩvathĩtwe kwondũ wakwa nyie Mwĩai Ngai.

38Mũndũ o na wĩva ũla wĩseũvya ũvani ũilyĩ ta ũsu na kũũtũmĩa ta mauta me mũuke mũseo, ũsu ndakethĩwa atalwa ta ũmwe wa andũ makwa.”

← Chapter 29 Jump to: Chapter 31 →