Exodus 38

Kamba (MBIVILIA ŨVOO MŨSEO)

← Chapter 37 Jump to: Chapter 39 →

1Mbesaleli nĩwaseũvisye kĩthembeo kya nthembo sya kũvĩvw'a na mbwaũ sya mũtĩ wa mũea. Ũasa wakyo, na ũthanthau nĩsyeanene. Kyaĩ kya ũasa wa mita ilĩ na sendimita mĩongo ĩlĩ na ũthanthau wĩanene na ũasa, na ũtũlu wa mita ĩmwe na sendimita mĩongo ĩtatũ.

2Nĩwaseũvisye mĩthya ĩũlũ wa kona inya sya kĩthembeo kĩu. Mĩthya ĩsu yakwatene na kĩthembeo kĩu. Nĩwakyũmbĩĩie kyũma kya mbulonzi.

3Nĩwaseũvisye syĩndũ syonthe sya kĩthembeo kĩu: Mbisũ sya kwĩkĩa mũu, mĩko, tũlaĩ, syĩndũ sya kũtonya nyama, na sya kwoka mwaki. Syĩndũ isu syonthe aiseũvisye na kyũma kya mbulonzi.

4Nĩwaseũvisye kĩsungi kya mbulonzi na akĩlikya mũlengonĩ wĩ katĩ wa kĩthembeo kĩu. Kĩsungi kĩu nĩkyaanĩtye kĩthembeo katĩ.

5Nĩwaseũvisye ngome inya sya kũkĩkua na asyoveea konanĩ inya sya kĩthembeo kĩu.

6Nĩwaseũvisye mĩtĩ ya ũkĩkua ya mũtĩ wa mũea na amyũmbĩĩa kyũma kya mbulonzi.

7Nĩweekĩie mĩtĩ ĩsu ila ngomenĩ syooveewe ngalĩkonĩ syelĩ sya kĩthembeo. Kĩthembeo kĩu kyaseũvĩtw'e na mbwaũ na kyaĩ na ĩima.

8Mbesaleli nĩwaseũvisye kalaĩ ka kũthamba na kyũma kya mbulonzi na o ta ũu kena ĩtina ya mbulonzi. Aseũvisye kalaĩ kau na ioo sya mbulonzi sya aka ala mathũkũmaa mũvĩanĩ wa Ĩeema ĩtheu ya kũkomanĩa na Mwĩai Ngai.

9Mbesaleli nĩwaseũvĩisye Ĩeema ĩtheu ya kũkomanĩa na Mwĩai Ngai kĩwanza. Ngalĩko ya ĩtheo yakyo yaĩ na suka syaĩ na ũasa wa mita mĩongo ĩna na inya. Suka isu syaseũvĩtw'e na ndii nzeo ndũmu mbokothe.

10Suka isu syakoleletw'e ituĩnĩ mĩongo ĩlĩ ila syaĩ na matina mĩongo ĩlĩ ma mbulonzi. Ngolya na mĩkunzu ya ituĩ isu syaseũvĩtw'e na silĩva.

11O ta ũu ngalĩko ya ĩũlũ ya kĩwanza kĩu yaĩ na suka syaĩ na ũasa wa mita mĩongo ĩna na inya, na ituĩ mĩongo ĩlĩ, na matina mĩongo ĩlĩ ma mbulonzi. Ngolya na mĩkunzu ya itũĩ isu syaseũvĩtw'e na silĩva.

12Ũthanthau wa kĩwanza kĩu ngalĩkonĩ ya ũthũĩlonĩ wa syũa waĩ na suka syaĩ na ũasa wa mita mĩongo ĩlĩ na ilĩ. Ũthanthau ũsu waĩ na ituĩ na matina masyo ĩkũmi, na syaĩ na ngolya na mĩkunzu ya silĩva.

13O ta ũu ngalĩko ya wumĩlonĩ wa syũa ya kĩwanza kĩu vala ve mũvĩa vaĩ na ũthanthau wa mita mĩongo ĩlĩ na ilĩ.

14Suka sya ngalĩko ĩmwe ya mũvĩa syaĩ na ũasa wa mita thanthatũ na sendimita mĩongo thanthatũ, na ituĩ itatũ syĩ na matina masyo.

15Ngalĩko ĩla ĩngĩ ya mũvĩa wa kũlika kĩwanzanĩ kĩu vaĩ na suka syĩ na ũasa wa mita thanthatũ na sendimita mĩongo thanthatũ, na ituĩ itatũ syĩ na matina masyo.

16Suka sya kĩwanza kĩu syaseũvĩtw'e na ndii nzeo ndũmu mbokothe.

17Matina ma ituĩ isu maseũvĩtw'e na mbulonzi, ĩndĩ ngolya, na mĩkunzu ya ituĩ isu yaseũvĩtw'e na silĩva. Ngunĩko ila syavw'ĩkĩte ituĩ isu mĩthya syaseũvĩtw'e na silĩva. Ituĩ syonthe ila syeelingĩlĩte kĩwanza kĩu syakwatanĩtw'e na mĩkunzu ya silĩva.

18Suka wa mũvĩa wa kĩwanza kĩu waseũvĩtw'e na ndii nzeo ndũmu mbokothe sya w'ĩa wa langi wa mbuluu, ũlii ũngĩ wa langi wa nzambalaũ, na ũngĩ mũtune mũno. Suka ũsu watumĩtwe ũkanakavw'a, na waĩ na ũasa wa mita kenda na ũtũlu wa mita ilĩ ta ũla wa ila suka sya kĩwanza.

19Suka ũsu wakoleletw'e ituĩnĩ inya syĩ na matina ana ma mbulonzi. Ngolya, mĩkunzu, na ngunĩko sya ituĩ isu syaseũvĩtw'e na silĩva.

20Syambo syonthe sya Ĩeema yĩu na ila syeelingilĩte kĩwanza kyayo syaseũvĩtw'e na mbulonzi.

21Ũũ nĩw'o ũtalo wa syĩndũ ila syatũmĩkie kũseũvya Ĩeema ĩtheu ya kũkomanĩa na Mwĩai Ngai, vala nĩvo vaiawa ala masengea elĩ ma mavia, ala maandĩkĩtwe ĩla Mĩao ĩkũmi. Mwose nĩwe weeaĩte ũtalo ũsu woswe na waseũvw'a nĩ Alivai ala mathũkũmaa me ungu wa ũtongoi wa Ĩthamali mwana wa mũthembi Alũni.

22Mbesaleli mwana wa Ũli, mwĩsũkũũe wa Uulu wa mbaĩ ya Yuta nĩwaseũvisye syĩndũ syonthe ila Mwĩai Ngai weeaĩĩte Mwose.

23Nĩwatetheeiw'e nĩ Ooliavu mwana wa Aisamaki ũla waĩ na ũmanyi wa kũseũvya syĩndũ sya mĩthemba yonthe, kũsũanĩa na kũvanga kĩla ũkũseũvya, na ũmanyi wa kũtuma na ndii nzeo ndũmu mbokothe sya w'ĩa wa mbuluu, ũngĩ wa langi wa nzambalaũ, na ũngĩ mũtune mũno.

24Thaavu w'onthe ũla waumĩtw'e kwondũ wa kwaka Ĩeema ĩtheu ya kũkomanĩa na Ngai waĩ na ũito wa kĩlo ngili ĩmwe kwĩanana na kĩthimo kĩla kyatũmĩawa ĩvindanĩ yĩu.

25Silĩva ũla wakwatĩkanie kumana na kwĩtala kwa andũ waĩ na ũito wa kĩlo ngili itatũ, maana ana na mĩongo ĩtatũ, kwĩanana na kĩthimo kĩla kyatũmĩawa ĩvindanĩ yĩu.

26Kĩthimo kĩu kya silĩva kyeanene na silĩva w'onthe ũla waĩviwe nĩ andũ ĩtina wa kwoswa kwa ũtalo woo. Kĩla mũndũ aumasya kĩla kyendekaa kwĩanana na kĩthimo kĩla kyatũmĩawa ĩvindanĩ yĩu. Vaĩ aũme ngili maana thanthatũ na itatũ, maana atano na mĩongo ĩtano ala maĩ na ũkũũ wa myaka mĩongo ĩlĩ na mbee ala ũtalo woo woosiwe.

27Kĩlo ngili itatũ na maana ana sya silĩva syatũmĩiwe kũseũvya ala matina ĩana ma Ĩeema ĩtheu ya kũkomanĩa na Ngai; kĩlo mĩongo ĩtatũ na inya syaseũvasya ĩtina yĩmwe.

28Mbesaleli nĩwatũmĩie kĩlo mĩongo ĩtatũ sya silĩva ũla watialile kũseũvya mĩkunzu, ngolya sya ituĩ, na ila ngunĩko sya ituĩ isu.

29Andũ nĩmaumisye mbulonzi ya kĩlo ngili ilĩ maana ana na mĩongo ĩlĩ na itano, na mamĩnengane kwa Mwĩai Ngai.

30Mbesaleli nĩwatũmĩie mbulonzi ĩsu kũseũvya matina ma mũvĩa wa Ĩeema ĩtheu ya kũkomanĩa na Mwĩai Ngai, kĩla kĩthembeo kya kyũma kya mbulonzi na kĩsungi kyakyo, na syĩndũ syonthe sya kĩthembeo.

31O ta ũu, nĩwatũmĩie mbulonzi ĩsu kũseũvya matina ma kĩwanza kĩla kyathyũlũlũkĩte Ĩeema na ma mũvĩa wa kĩwanza kĩu, o vamwe na syambo syonthe sya Ĩeema na sya kĩwanza kĩu kyayĩthyũlũlũkĩte.

← Chapter 37 Jump to: Chapter 39 →