Exodus 26

Kamba (MBIVILIA ŨVOO MŨSEO)

← Chapter 25 Jump to: Chapter 27 →

1Mwĩai Ngai nĩwaisye atĩĩ, “Seũvya Ĩeema ĩtheu ya kũkomanĩa na Mwĩai Ngai na suka ĩkũmi. Suka isu syĩthĩwe itumĩtwe na ndii nzeo ndũmu mbokothe sya langi wa mbuluu, ũngĩ wa langi wa nzambalaũ, na ũngĩ mũtune mũno. Syanakavye kwa nzĩa ya mwanya kwa kwitumĩĩa malaa ma syũmbe syĩ nthwau syĩtawa akelũvi.

2“Suka isu syonthe syĩthĩwe sya kĩthimo kĩmwe kĩla nĩ ũasa wa mita ĩkũmi na ilĩ na ũthanthau wa mita ilĩ.

3Tuma ũkwatany'e suka itano vamwe, na ũyĩka o ta ũu na ila ingĩ itano.

4Seũvya ikwatũ sya kĩtambaa kya mbuluu ũtiivonĩ wa nza wa suka ĩmwe ya isu itano ngwatany'e. Ĩka o ta ũu ũtiivonĩ wa suka ĩla yĩ ũtee wa ila ingĩ itano ngwatany'e.

5Tumĩĩa ikwatũ mĩongo ĩtano kĩtambaanĩ kĩmwe kya ila itano ngwatany'e na ikwatũ ingĩ mĩongo ĩtano ithimanĩte na kĩtambaa kĩla kĩ ũtee vyũ wa ila ingĩ itano ngwatany'e.

6Seũvya ngolya mĩongo ĩtano sya thaavu sya kũkwatany'a masuka asu elĩ matw'ĩke suka ĩmwe, nĩ kana Ĩeema yĩtw'ĩke kĩndũ kĩmwe.

7“Seũvya suka sya kũvw'ĩka Ĩeema yĩu na ilungu ĩkũmi na kĩmwe sya ngũa itumĩtwe na w'ĩa wa mbũi.

8Ĩseũvye syĩthĩwe syonthe syĩanene, kĩla suka wĩ na ũasa wa mita ĩkũmi na itatũ na ũthanthau wa mita ilĩ.

9Tuma ũkwatany'e suka itano vamwe, na ila ingĩ thanthatũ ũyikwatany'a vamwe. Tũlanĩla suka ya thanthatũ ngalĩkonĩ ĩla ya mbee ya Ĩeema.

10Seũvya ikwatũ mĩongo ĩtano ũtiivonĩ wa suka ĩla yĩ ũtee vyũ wa ila itano ngwatany'e. O ta ũu seũvya ikwatũ ingĩ mĩongo ĩtano ũtiivonĩ wa ila ingĩ thanthatũ ngwatany'e.

11Seũvya ngolya mĩongo ĩtano sya kyũma kya mbulonzi na kũsyĩkĩa ila ikwatũnĩ ũkwatany'e masuka asu elĩ matw'ĩke suka ĩmwe.

12Anĩka ngalĩkonĩ ya ĩtina ya Ĩeema nyusu ya suka ĩla ĩtialĩte.

13Suka isu syelĩ sya Ĩeema ikeethĩwa na ũasa wa nyusu mita ũvĩtũkĩte ũkaniina; kĩlungu kĩu kĩvĩtũkĩte kĩĩthĩwa kĩniinĩte ngalĩkonĩ isu sya Ĩeema yĩu nĩ kana kĩyĩvw'ĩke.

14“Seũvya suka ingĩ ilĩ syaũvw'ĩka Ĩeema yĩu; ĩmwe ĩseũvĩtw'e na ithuma sya ndũũme iindĩtwe langinĩ mũtune, na ĩngĩ ĩseũvĩtw'e na ithuma mbololo syĩthĩawe sya kũyĩvw'ĩka.

15Seũvya mbwaũ sya mũtĩ wa mũea sya kũũngamya Ĩeema yĩu.

16Kĩla ũvwaũ nĩwĩthĩwe na ũasa wa mita inya na ũthanthau wa sendimita mĩongo thanthatũ na thanthatũ,

17na ũyĩthĩwa na mĩthya ĩlĩ myasũvye na ĩvaasanĩte, nĩ kana mbwaũ isu ikwatanw'e vamwe. Mbwaũ isu syonthe nĩsyĩthĩwe na mĩthya ĩsu myasũvye.

18Seũvya mbwaũ mĩongo ĩlĩ sya ngalĩko ya ĩtheo ya Ĩeema yĩu,

19na ũiseũvya matina mĩongo ĩna ma silĩva ma kũũngamya mbwaũ isu ilikanĩtw'e namo, matina elĩ malikanĩtw'e na kĩla ũvwaũ nĩ kana makwatĩĩe mĩthya ĩlĩ.

20Seũvya mbwaũ mĩongo ĩlĩ sya ngalĩko ya ĩũlũ ya Ĩeema yĩu,

21na ũiseũvya matina ma silĩva mĩongo ĩna ma kũũngamya mbwaũ isu, matina elĩ malikanĩtw'e na ũvwaũ ũmwe.

22Ĩtina wa Ĩeema ngalĩkonĩ ya ũthũĩlonĩ wa syũa, seũvya mbwaũ thanthatũ,

23na mbwaũ ingĩ ilĩ sya konanĩ ngalĩko ya ĩtina ya Ĩeema.

24Mbwaũ isu syĩkĩĩtwe konanĩ syĩthĩwe ikwatanĩtw'e nthĩ kũthi kũvika ĩũlũ. Mbwaũ isu ilĩ syĩkĩĩtwe konanĩ iseũvw'e kwa nzĩa ĩsu.

25Kwoou vethĩwe mbwaũ nyanya syĩ na matina ĩkũmi na thanthatũ ma silĩva; matina elĩ malikanĩtw'e na kĩla ũvwaũ.

26“O ĩngĩ seũvya mĩamba ya mũtĩ wa mũea: Mĩamba ĩtano kwondũ wa mbwaũ ila syĩ ngalĩko ĩmwe ya Ĩeema;

27ĩtano kwondũ wa ngalĩko ĩla ĩngĩ, na ĩtano kwondũ wa mbwaũ ila syĩ ngalĩko ya ũthũĩlonĩ wa syũa, mbĩlĩlo wa Ĩeema yĩu.

28Mũamba wa katĩ ũvĩtĩle kuma ngalĩko ĩmwe kũthi ĩla ĩngĩ ya Ĩeema wĩsĩlĩte katĩ wa mbwaũ isu.

29Ũmbĩĩa mbwaũ isu thaavu na ũisyoveea ngome sya thaavu sya ũkwatĩĩa mĩamba ĩsu. O nayo mĩamba ĩsu myũmbĩĩe thaavu.

30Aka Ĩeema yĩu kwĩanana na mũseũvĩlye ũla nĩnakwonisye wĩ kĩĩmanĩ.

31“Seũvya suka ĩtumĩtwe na ndii nzeo ndũmu mbokothe sya langi wa mbuluu, ũngĩ wa langi wa nzambalaũ, na ũngĩ mũtune mũno. Wanakavye kwa nzĩa ya mwanya kwa kũtumĩĩa malaa ma syũmbe syĩ nthwau syĩtawa akelũvi.

32Kolelya suka ĩsu ituĩnĩ inya sya mũtĩ wa mũea syũmbĩĩwe thaavu, syĩ na ngolya sya thaavu. Ituĩ isu iũngamw'e matinanĩ ana ma silĩva.

33Kolya suka ĩsu ungu wa mũthya wa ngolya ila syĩ kĩalanĩ kya Ĩeema, na ĩtina wa suka ĩsu ũyia yĩla Ĩsandũkũ ya Ũtianĩo yĩkĩĩtwe ala masengea ma mavia. Suka ĩsu ĩkaany'a vala Vandũ Vatheu na vala Vatheu Mũno.

34Ilĩĩla ĩla ngunĩko ĩũlũ wa Ĩsandũkũ ya Ũtianĩo yĩla yĩ vala Vandũ Vatheu Mũno.

35Ia ĩla mesa nza wa suka ĩsu, ngalĩko ya ĩũlũ ya Ĩeema, na ũyia kĩla kĩndũ kya kwilĩĩla taa ngalĩko ya ĩtheo Ĩeemanĩ yĩu.

36“Seũvya kĩtambaa kya kwĩkĩa mũomonĩ wa Ĩeema, kĩseũvĩtw'e na ndii nzeo ndũmu mbokothe sya langi wa mbuluu, ũngĩ wa langi wa nzambalaũ, na ũngĩ mũtune mũno, kyanakavĩtw'e nĩ mũtumi mũseo wa ndii.

37Seũvya kwondũ wa kĩtambaa kĩu ituĩ itano sya mũtĩ wa mũea syũmbĩĩwe thaavu na ikekĩwa ngolya sya thaavu. Seũvya matina atano ma kyũma kya mbulonzi kwondũ wa ituĩ isu.”

← Chapter 25 Jump to: Chapter 27 →

Recommended Reading

Commentary Exodus Commentaries → Devotional Exodus Devotional Guide → Get This Bible Kamba (MBIVILIA ŨVOO MŨSEO) Study Bible →