Hebrews 1

Kamba (MBIVILIA ŨVOO MŨSEO)

Jump to: Chapter 2 →

1Naku tene Ngai nĩwaneenie na aaũmae maitũ mavinda maingĩ kwa nzĩa syĩ kĩvathũkany'o kwĩsĩla kwa athani.

2Ĩndĩ ĩvindanĩ yĩĩ ya mũthya aneenete naitũ kwĩsĩla kwa Mwana wake. Mwana ũsu nĩwe ũla kwĩsĩla kwake Ngai woombie syĩndũ syonthe na amũnyuva ethĩwe mwene wa syĩndũ syonthe.

3Nĩwe wonanasya kyeni kya ũkumyo wa Ngai, na nĩwe ũvw'ana vyũ ũndũ Ngai ũilyĩ. Nũkwatĩĩe nthĩ yonthe na ndeto yake yĩ ũtonyi. Amina kũete ũekeo kwondũ wa naĩ sya andũ, nĩwekalile nthĩ ĩtunĩ ngalĩko ya kw'oko kwa aũme kwa Ngai Mwene Ũtonyi W'onthe.

4Mwana ũsu nĩ mũnene mũno kwĩ alaĩka, o ũndũ ĩsyĩtwa yĩla ũnengetwe nĩ Ngai yĩvĩtũkĩte masyĩtwa moo.

5Nĩkwĩthĩwa Ngai ndaatavya ũmwe wa alaĩka make akamwĩa, “We wĩ Mwana wakwa; ũmũnthĩ nĩnatw'ĩka Ĩthe waku.” O na Ngai ndaaneena ĩũlũ wa ũmwe woo akasya, “Ngatw'ĩka Ĩthe wake, nake akatw'ĩka Mwana wakwa.”

6Ĩndĩ Ngai aimũtũma Mwana wake kũũ nthĩ, ũla nĩ mũsyawa wa mbee aisye, “Alaĩka makwa onthe nĩmamũthaithae.”

7Ngai aineena ĩũlũ wa alaĩka nĩwaisye, “Nĩndw'ĩkĩthasya alaĩka makwa kĩseve, na athũkũmi makwa mũĩ sya mwaki.”

8Ĩndĩ Ngai aneenete ĩũlũ wa Mwana wake akasya, “Ũsumbĩ waku we Ngai nĩ wa tene na tene! Ũsumbĩkaa andũ maku na ũw'o.

9We wendete ũlũngalu na nũmenete ũthũku. Kĩu nĩkyo kĩtumi nyie Ngai waku ngũnyuvĩte, na ngakũnenga ũtanu mwingĩ kũthonoka ũla nĩnengete ala matindanasya naku.”

10O ĩngĩ nĩwaĩtye, “We Mwĩai mwambĩlĩĩlyonĩ nue woombie nthĩ, na matu o namo nĩ wĩa wa moko maku.

11Syo ikathela, ĩndĩ we wĩkalaa tene na tene; syonthe ikakũa ta ngũa.

12Ũkaikũnza ta kanzũ, na ikaalyũka ta ngũa. Ĩndĩ we ndũalyũkaa, na we ndũkakw'a o na ĩndĩĩ.”

13Ngai ndaatavya ũmwe wa alaĩka make akamwĩa, “Ĩkala nthĩ ngalĩko ya kw'oko kwakwa kwa aũme, kũvika yĩla nĩmaia amaitha maku ungu wa ũtonyi waku.”

14Alaĩka mo no maveva matũmawa nĩ Ngai makatetheesye andũ ala meteelete kũtangĩĩwa.

Jump to: Chapter 2 →