Hebrews 5

Kamba (MBIVILIA ŨVOO MŨSEO)

← Chapter 4 Jump to: Chapter 6 →

1Kĩla Mũthembi Mũnene anyuvawa kuma andũnĩ, na kwiwa athũkũmae Ngai vandũ voo maũndũnĩ ala mamũkonetye Ngai, aumasye syĩndũ na nthembo kwondũ wa naĩ.

2Na nũndũ we mwene e mawonzu ala make, nũtonya kũmĩanĩsya na andũ ala matesĩ na mekaa naĩ.

3Na nũndũ wa kwĩthĩwa nĩ mwonzu, nĩwaĩlĩte kumya nthembo kwondũ wa naĩ syake mwene, o ayumya kwondũ wa naĩ sya andũ ala angĩ.

4Vai mũndũ ũtonya kwĩtw'ĩkĩthya we mwene Mũthembi Mũnene; mũndũ etawa nĩ Ngai atw'ĩke Mũthembi Mũnene o tondũ Alũni weetiwe.

5Kwoou Klĩsto o nake ndaaĩnenevya we mwene aketw'ĩkĩthya Mũthembi Mũnene. Anyuviwe nĩ Ngai ũla wamwĩie, “We wĩ Mwana wakwa, ũmũnthĩ nĩnatw'ĩka Ĩthe waku.”

6O ta ũu nũneenete vandũ vangĩ akasya, “We wĩ mũthembi wa tene na tene, o tondũ Melikisendeki wailyĩ.”

7Ĩvinda ya thayũ wake kũũ nthĩ, Yesũ nĩwavoyie na kĩthing'ĩĩsyo kwa Ngai ũla ũtonya kũmũvonokya kuma kĩkw'ũnĩ; avoyie na wasya mũnene o vamwe na kũĩa, nake Ngai amũsũngĩa nũndũ wa wĩnyivyo wake wĩ ndaĩa kwa Ngai.

8Ĩndĩ o na kau aĩ Mwana wa Ngai, nĩweethĩiwe e mwĩwi kwĩsĩla mathĩnanĩ.

9Amina kwĩanĩĩsya kĩla waĩ eke kyonthe, nĩwatw'ĩkie yu nũtonya kũtangĩĩa tene na tene andũ ala mamwĩw'aa,

10nake Ngai amũtw'a Mũthembi Mũnene o tondũ Melikisendeki wailyĩ.

11Twĩ na maũndũ maingĩ ma kũneena ũndũnĩ ũũ, ĩndĩ ve na vinya kũmũelesya nũndũ mũeleawa kavola.

12Yu mwaĩlĩte kwĩthĩwa mũtw'ĩkĩte amanyĩsya, ĩndĩ o na yu mwĩ na vata wa kũmanyĩw'a ĩngĩ nĩ mũndũ momanyĩsyo ma mbee ma ũvoo wa Ngai. Mwĩenda o ĩia vandũ va lĩu mũmũ!

13Mũndũ ũla ũnyusaa ĩia ta yo lĩu wake ethĩawa e o kana, ndesĩ ũlũngalu nĩ kyaũ.

14Ĩndĩ lĩu mũmũ nĩ wa andũ aima, ala kwa kũtũmĩa kĩlĩko, nĩmatonya kũvathũkany'a ũseo na ũthũku.

← Chapter 4 Jump to: Chapter 6 →