Hebrews 7

Kamba (MBIVILIA ŨVOO MŨSEO)

← Chapter 6 Jump to: Chapter 8 →

1Melikisendeki aĩ mũsumbĩ wa Salemu na mũthembi wa Ngai Ũla wĩ Ĩũlũ Mũno. Nĩwamũthaũie Avalaamu aumĩte kaũnĩ vala waĩ anasinda asumbĩ na amũathima,

2nake Avalaamu amũnenga kĩlungu kya ĩkũmi kya syĩndũ syonthe ila watavĩte. Mbee, ũalyũlo wa ĩsyĩtwa yĩĩ Melikisendeki nĩ, “Mũsumbĩ wa ũlũngalu,” na ĩndĩ kwĩthĩwa mũsumbĩ wa Salemu, ũalyũlo wayo nĩ, “Mũsumbĩ wa mũuo.”

3Vai vandũ vawetete kana e ĩthe kana nyinyia kana aaũmae, na kana e mwambĩlĩĩlyo kana mũminũkĩlyo. Avw'ana Mwana wa Ngai: Nĩ mũthembi tene na tene.

4Kwoou kwa sisyai ũndũ wanenevete! Avalaamu ũmae waitũ mũnene nĩwamũnengie kĩlungu kya ĩkũmi kya syĩndũ syonthe ila watavĩte kaũnĩ.

5Kwĩanana na Mĩao, nzyawa sya Livai ala nĩ athembi, me na mwĩao wa kwosaa kĩlungu kya ĩkũmi kuma kwa andũ ma nthĩ yoo, andũ ma Ĩsilaeli, o na kau asu namo no nzyawa sya Avalaamu.

6Ĩndĩ mũndũ ũũ ũtaĩ wa ũsyao wa Livai, nĩwoosie kĩlungu kya ĩkũmi kuma kwa Avalaamu, na amũathima ũsu wathĩtwe maũndũ nĩ Ngai.

7Vate nzika mũndũ ũla mũnene nĩwe ũathimaa ũla mũnini.

8Ngalĩkonĩ ĩmwe, kĩlungu kya ĩkũmi kyoosawa nĩ andũ me na mwĩkalĩle wa kũkw'a, ĩndĩ ngalĩkonĩ ĩla ĩngĩ, kyoosiwe nĩ mũndũ kwĩĩtwe ndakusaa.

9Nĩtũtonya kwasya Livai, ũla nzyawa syake syoosaa kĩlungu kya ĩkũmi, o nake nowaumisye kĩlungu kya ĩkũmi yĩla Avalaamu waumasya.

10Nũndũ Livai aĩ o nthakamenĩ ya Avalaamu ũmae wake, yĩla wathaũiwe nĩ Melikisendeki.

11Andũ ma Ĩsilaeli makwatie Mĩao kumana na ũthembi wa Alivai. Kethĩwa ũthembi wa Alivai waĩ ũtonya kũtw'a andũ kwĩthĩwa eanĩu, vayĩthĩwa na vata wa kumĩla kwa ũthembi ũngĩ wĩ kĩvathũkany'o, ũilyĩ ta ũla wa Melikisendeki eka ũsu wa Alũni.

12Nĩkwĩthĩwa yĩla ũthembi waalyũka, o ta ũu no nginya mĩao ĩkaalyũka.

13Mwĩai waitũ ũla maũndũ aa meũneena ĩũlũ wake aĩ wa mbaĩ ĩngĩ, na vai mũndũ wa mbaĩ ĩsu waathũkũma ta mũthembi.

14Nĩkwĩthĩwa nĩtwĩsĩ kana Mwĩai waitũ aĩ wa mbaĩ ya Yuta, na Mwose ndaawetanĩsya mbaĩ ĩsu na maũndũ ma ũthembi.

15Kĩla tũũneena ĩũlũ wakyo yu nĩmũtonya kũkĩelewa nesa, kwa kwĩthĩwa nĩvaumĩlĩte mũthembi ũngĩ ũilyĩ ta Melikisendeki.

16Ndaatw'ĩka mũthembi kumana na mĩao ĩla ĩwetete aĩlĩte kuma mũsyĩ wĩkũ, ĩndĩ kumana na ũtonyi wa thayũ ũla ũtũaa tene na tene.

17Nĩkwĩthĩwa Maandĩko Matheu maĩtye, “We ũkeethĩwa mũthembi wa tene na tene, o tondũ Melikisendeki wailyĩ.”

18Kwoou mwĩao ũla wa tene nĩmũvete, nĩkwĩthĩwa ndũtethya na nĩ wa mana.

19Mĩao ndyaatw'ĩkĩthya ũndũ o na wĩva kwĩthĩwa mwĩanĩu, ĩndĩ yu nĩkũnenganĩtwe wĩkwatyo wa ũndũ mũseo mbee, ũla wĩtũtonyethya kũthengeanĩa na Ngai.

20Ĩũlũ wa ũu, vaa ve na kwĩvĩta kwa Ngai! Athembi ala angĩ matw'ĩkie athembi vate wĩvĩto.

21Ĩndĩ Yesũ atw'ĩkie mũthembi kumana na wĩvĩto wa Ngai ũla wamwĩie; “Mwĩai nĩweevĩtie na ndakaalyũka, ‘We ũkeethĩwa mũthembi wa tene na tene.’ ”

22Kwoou kĩvathũkany'o kĩĩ kĩtw'ĩkĩthĩtye Yesũ kwĩthĩwa mũĩkĩĩthya wa ũtianĩo mũseo mbee.

23Ũndũ ũngĩ, athembi asu angĩ maĩ methĩwe me aingĩ nĩkwĩthĩwa nĩmakusaa, na mayaĩ matonya kũendeea kũthũkũma ta athembi.

24Ĩndĩ Yesũ athũkũmaa ta mũthembi tene na tene nũndũ ndakakw'a.

25Kwondũ wa ũu nũtonya kĩla ĩvinda kũtangĩĩa andũ onthe ala mokaa kwa Ngai kwĩsĩla vala ũĩ, nũndũ ekalaa thayũ mavinda onthe aimavoyea kũla kwĩ Ngai.

26Mũthembi Mũnene wa mũthemba ũsu nĩwe ũtwĩanĩasya mavata maitũ; mũthembi mũtheu ũtaweteka ũndũ mũthũku, ũte ũvuku, ũvathanĩtw'e na avĩtany'a, na waneneviw'e kwa kwambatw'a ĩtunĩ.

27Nde na vata ta athembi ala angĩ anene, wa kumya nthembo kĩla mũthenya kwondũ wa naĩ syake mwene, na kwondũ wa naĩ sya andũ ala angĩ. Aumisye nthembo o ĩmwe tũ atakaumya ĩngĩ, yĩla weeyumisye we mwene.

28Mĩao nĩyavathaa andũ me na wonzu matw'ĩke athembi anene. Ĩndĩ kwĩvĩta kwa Ngai kũla kweethĩiwe ĩtina wa Mĩao, kwanyuvie Mwana wake ũla watwiwe kwĩthĩwa mwĩanĩu tene na tene.

← Chapter 6 Jump to: Chapter 8 →