bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (MBIVILIA ŨVOO MŨSEO)
/
Hebrews 10
Hebrews 10
Kamba (MBIVILIA ŨVOO MŨSEO)
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 11 →
1
Mĩao ya Kĩyuti yaĩ ngelekany'o ya syĩndũ nzeo ila ikoka, na o na ti mũvw'ano wa syĩndũ isu, na kwoou ndĩtonya o na ĩndĩĩ kwĩsĩla nthembonĩ o ila syumaw'a kĩla mwaka, kũtw'ĩkĩthya andũ ala mokaa kũthaitha kwĩthĩwa ethĩanu.
2
Kethĩwa andũ asu mamũthaithaa Ngai nĩmatheaw'a naĩ syoo kwa w'o, mayĩthĩwa mew'aa me o na naĩ, na nthembo isu no ieke kumw'a vyũ.
3
Ĩndĩ kumw'a kwa nthembo isu kĩla mwaka, kũlilikanasya andũ kana me o na naĩ.
4
Nĩkwĩthĩwa nthakame ya tũsalũ na ya mbũi, ndĩtonya kũvetea andũ naĩ.
5
Kwa kĩtumi kĩu Klĩsto ayũka kũũ nthĩ nĩweeie Ngai atĩĩ, “Ndwaaenda nthembo na syĩndũ ila syumaw'a, ĩndĩ nũnengete mwĩĩ.
6
Ndwaaendeew'a nĩ nthembo sya kũvĩvw'a, na nthembo ila syumaw'a kwondũ wa naĩ.
7
Nĩvo ĩndĩ nakwa naisye, ‘Ninyioo, we Ngai, nĩnooka kwĩka kwenda kwaku, o tondũ kũandĩkĩtwe ĩũlũ wakwa ĩvukunĩ ya Mĩao.’ ”
8
Yĩla waisye mbeenĩ, “Ndwendaa o na ndwendeeaw'a nĩ nthembo na syĩndũ ila syumaw'a, kana nthembo sya kũvĩvw'a na nthembo ila syumaw'a kwondũ wa naĩ,” aneenie ũu o na kau nthembo isu syumaw'a kwĩanana na mĩao.
9
Nĩvo ĩndĩ waisye atĩĩ, “Ninyioo, nĩnooka kwĩka kwenda kwaku.” Kwoou Ngai avetie nthembo ila sya tene syonthe, na eekĩa nthembo ya Klĩsto vandũ vasyo.
10
Yesũ Klĩsto eekie kwenda kwa Ngai, na kwoou ithyonthe nĩtũtheetw'e naĩ sitũ nũndũ wa kwĩthemba we mwene o ĩmwe atakethemba ĩngĩ.
11
Kĩla mũthembi wa Ayuti atethasya wĩa wake kĩla mũthenya, na kumya nthembo ya mũthemba o ũmwe mavinda maingĩ, ĩndĩ nthembo isu iitonya kũvetea andũ naĩ.
12
Ĩndĩ Klĩsto eeyumisye we mwene ta nthembo o ĩmwe tũ kwondũ wa naĩ, nthembo ĩtũaa tene na tene, na ekala nthĩ ngalĩko ya kw'oko kwa aũme kwa Ngai.
13
Eĩkala vau kũvika yĩla Ngai ũkaia amaitha make ungu wa nyaĩĩ syake.
14
Kwoou kwa nthembo o ĩmwe, nĩwatw'ĩkĩthisye andũ ala matheetw'e naĩ syoo kwĩthĩwa ethĩanu mavinda onthe.
15
Veva Mũtheu o nake nũkũkũsĩĩa ũndũ ũsu: Mbee nĩwaĩtye,
16
“Ũũ nĩw'o ũtianĩo ũla ngatianĩa namo ĩvinda yĩla yũkĩte, easya ũu Mwĩai: Ngeekĩa mĩao yakwa ngoonĩ syoo, na ngamĩandĩka ilĩkonĩ syoo.”
17
O ta ũu nũsyokete akasya, “Ndikalilikana naĩ syoo na mothũku moo ĩngĩ.”
18
Kwoou naĩ syamina kũekewa, vai vata wa kumya nthembo ĩngĩ kwondũ wa ũekeo wa naĩ.
19
Kwoou ĩndĩ mbaitũ, kwondũ wa kĩkw'ũ kya Yesũ twĩ na ũthasyo mũnene wa kũlika vala Vandũ Vatheu Mũno.
20
We nĩwatũvingũĩie nzĩa nzaũ yĩ thayũ kwĩsĩla kĩtambaanĩ kĩla kyatilanĩtye, naw'o nĩ mwĩĩ wake.
21
Nayu nũndũ twĩ na Mũthembi Mũnene ũla ũũngamĩe nyũmba ya Ngai,
22
nĩtũthengee Ngai na ngoo ya w'o na mũĩkĩĩo mũlũmu, twĩ na ngoo itheetw'e, itekwĩw'a syĩ na naĩ, na tũthambĩtw'e na kĩw'ũ kĩtheu.
23
Nĩtũlũmye tũtekũthingithw'a wĩkwatyo witũ ũla tũkũsĩaa, nĩkwĩthĩwa we ũla wathanĩte nĩ wa kũĩkĩĩwa.
24
Nĩtũsisyei mũno ũndũ tũtonya kũthangaasya kĩla ũmwe waitũ onanasye wendo na kwĩkaa maũndũ maseo.
25
Tũikaekane na kĩmanyĩo kitũ kya kũmbanaa ũndũ andũ amwe mekwĩka. Vandũ va ũu nĩtũthangaany'e mũno, nĩkwĩthĩwa Mũthenya wa kũka ĩngĩ kwa Mwĩai wĩ vakuvĩ.
26
Ethĩwa tũkaendeea kwĩka naĩ na ngũlũ ĩtina wa kũmanya ũla w'o, nĩtũmanye kana vai nthembo ĩngĩ ĩkaumw'a kwondũ wa naĩ.
27
Vandũ va ũu kĩla kĩtiele nĩ kweteela ũsilĩlo wa ũkĩwa na mwaki mũnene mũno, ũla ũkavĩvya vyũ andũ ala maleanaa na Ngai.
28
Mũndũ atũla Mĩao ya Mwose ooaawa atekwĩw'ĩwa tei, ethĩwa ve ũkũsĩ wa andũ elĩ kana atatũ.
29
Kwoou mwĩona mũndũ ũla ũvũthasya Mwana wa Ngai, akosa nthakame ya ũtianĩo wa Ngai ĩla yamũtheisye naĩ syake ta kĩndũ kya mana, na ũumaa Veva Mũtheu ũla ũnenganae mumo ta ũkakwata ũsilĩlo ũthũkĩte ata?
30
Nũndũ nĩtũmwĩsĩ ũla waisye, “Ũĩvanĩsyo nĩ wakwa; ninyie ngaĩvanĩsya,” na o ta ũu ũla waisye, “Mwĩai akasilĩla andũ make.”
31
Kwa w'o nĩ kĩndũ kya kũkĩwa mũno kũsilĩlwa nĩ Ngai ũla wĩ thayũ.
32
Kwa lilikanai ũndũ kwailyĩ kwenyu navu mbeenĩ yĩla mwaminie kũkwata kyeni kya Ngai. O na kau ĩvindanĩ yĩu nĩmwakwatiwe nĩ mathĩna maingĩ, nĩmwoomĩĩisye na mũyaakw'a ngoo.
33
Mavinda amwe nĩmwaumangawa na kũthĩnw'a mwĩ mbee wa andũ, na mavinda angĩ nĩmweethĩawa vamwe na andũ ala mathĩnaw'a mũthemba ũsu.
34
Nĩmwathĩnaa vamwe na andũ ala me yela, na yĩla mwavenwa syĩndũ syenyu nĩmweanĩawa nĩ ũu mwĩ na ũtanu, nĩkwĩthĩwa nĩmweesĩ mwaĩ na kĩndũ kĩseo mbee kĩla kĩkalaa tene na tene.
35
Kwoou mũikasye ũkũmbaũ wenyu, nĩkwĩthĩwa ũkatuma mũkwata mũthĩnzĩo mũnene.
36
Mwĩ na vata wa kwĩthĩwa na wũmĩĩsyo, nĩ kana mũtonye kwĩka kwenda kwa Ngai na mũikwata kĩla wathanĩte.
37
Nĩkwĩthĩwa o tondũ Maandĩko Matheu maĩtye, “Vatiele kavinda kanini ũla wũkĩte oke, na ndeĩkala.
38
Mũndũ ũla wakwa mũlũngalu, akekala thayũ kwondũ wa mũĩkĩĩo; ĩndĩ aeka kũndĩkĩĩa, nyie nakwa ndikendeew'a nĩwe.”
39
Ithyĩ tũi katĩ wa andũ ala maasya mũĩkĩĩo na kwaa; twĩ katĩ wa ala me na mũĩkĩĩo na mekũtangĩĩwa.
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 11 →
All chapters:
1
2
3
4
5
6
7
8
9
10
11
12
13