Hebrews 8

Kamba (MBIVILIA ŨVOO MŨSEO)

← Chapter 7 Jump to: Chapter 9 →

1Kĩla tũkwasya nĩ kĩĩ: Twĩ na Mũthembi Mũnene mũno ũla wĩkalaa ngalĩko ya kw'oko kwa aũme kwa kĩvĩla kya kĩ-ũsumbĩ kya Ngai ĩtunĩ.

2Athũkũmaa ta Mũthembi Mũnene vala Vandũ Vatheu Mũno, navo nĩ ĩeemanĩ ĩtheu yĩla yaw'o, yĩtakĩtwe nĩ mũndũ, ĩndĩ yakĩtwe nĩ Ngai.

3Kĩla Mũthembi Mũnene anyuvawa aumĩasye Ngai syĩndũ na nthembo sya kũawa, na kwoou o na mũthembi ũũ waitũ aĩ no nginya ethĩwe na kĩndũ kya kũthemba.

4Kethĩwa e kũũ nthĩ ndethĩwa e mũthembi, nĩkwĩthĩwa kwĩ na athembi ala maumĩasya Ngai syĩndũ kwĩanana na Mĩao ya Mwose.

5Ũthũkũmi woo ta athembi no ngelekany'o na kyuu kya ũthũkũmi ũla wĩthĩawa ĩtunĩ. Kĩu nĩkyo kyatumie Mwose, yĩla waĩ vakuvĩ kũseũvya yĩla Ĩeema ĩtheu, Ngai wamwĩie atĩĩ, “Sisya ũseũvye kĩla kĩndũ kwĩanana na ũndũ wooniw'e kĩĩmanĩ.”

6Ĩndĩ Klĩsto nũnengetwe wĩa wa ũthembi, ũla nĩ mũnene kwĩ ũla woo, o ũndũ ũtianĩo ũla waseũviw'e kwĩsĩla vala ũĩ nĩ mũseo kwĩ ũla wa tene, nĩkwĩthĩwa wathanĩte maũndũ maseo mbee.

7Kethĩwa ũtianĩo wa mbee waĩ mwĩanĩu, vayĩthĩwa vaĩ vata wa ũtianĩo ũngĩ.

8Ĩndĩ Ngai oonete andũ mate eanĩu yĩla waisye, “Ĩvinda nĩyũkĩte, easya ũu Mwĩai, yĩla ngaseũvya ũtianĩo mweũ na andũ ma Ĩsilaeli na ma Yuta.

9Ndũkethĩwa ũilyĩ ta ũla natianĩie na aaũmae moo, mũthenya ũla namakwatie kw'oko namaumya nthĩ ya Misili. Mo mayaaĩkala kwĩanana na ũndũ twatianĩĩte, na kwoou nakwa naekana namo.

10Ũũ nĩw'o ũtianĩo ũla ngaseũvya na andũ ma Ĩsilaeli ĩvindanĩ yĩu: Ngeekĩa Mĩao yakwa ilĩkonĩ syoo, na ngamĩandĩka ngoonĩ syoo. Ngeethĩwa Ngai woo, namo makeethĩwa andũ makwa. Nĩasya ũu nyie Mwĩai.

11Vaikethĩwa ĩngĩ mũndũ ũkũmanyĩsya mũtũi wake, kana mũndũ amanyĩsye mwana-a-inyia amwĩe, ‘Mũmanye Mwĩai.’ Nĩkwĩthĩwa onthe makeethĩwa mambĩsĩ, kuma ũla mũnini kũvika ũla mũnene.

12Ngamaekea mavĩtyo moo, na ndikalilikana naĩ syoo ĩngĩ.”

13Kwa kũneena ĩũlũ wa ũtianĩo mweũ, Ngai etw'ĩkĩthya ũla wa mbee kwĩthĩwa mũkũũ, na kĩndũ kyonthe kĩla kyambĩĩa ũkũa o mĩtũkĩ nĩkĩthelaa vyũ.

← Chapter 7 Jump to: Chapter 9 →