Zechariah 1

Kamba (MBIVILIA ŨVOO MŨSEO)

Jump to: Chapter 2 →

1Mweinĩ wa nyanya, mwakanĩ wa kelĩ wa kũsumbĩka kwa Ndalio, Mwĩai Ngai nĩwaneenie na mwathani Nzekalia mwana wa Mbelekia, mwĩsũkũũe wa Ito amwĩa atĩĩ,

2“Nyie Mwĩai Ngai nĩnathatiw'e mũno nĩ aaũmae menyu,

3kwoou enda ũkee andũ kana nyie Mwĩai Ngai Mwene Ũtonyi W'onthe nĩasya atĩĩ, ‘Nzyokeai nakwa nĩngũmũsyokea.’

4Mũikethĩwe mũilyĩ ta aaũmae menyu. Tene nĩmataviw'e nĩ athani ala maĩ mbee kana nyie Mwĩai Ngai Mwene Ũtonyi W'onthe, nĩasya nĩmaekane na nzĩa syoo nthũku na meko moo mathũku. Ĩndĩ nĩmaleile kũmbĩw'a kana kũatĩĩa ũndũ nameie nyie Mwĩai Ngai.

5Nĩkũlya atĩĩ, aaũmae menyu maĩva? Namo athani nĩmekalaa thayũ tene na tene?

6Nĩnanengie aaũmae menyu ndeto syakwa na myamũlo yakwa kwĩsĩla kwa athũkũmi makwa athani. Ĩndĩ aaũmae menyu nĩmaleanile nayo na makwata ũĩvĩthyo nũndũ wa ũu. Kwoou nĩmaumbũlile na masya atĩĩ, ‘Mwĩai Ngai Mwene Ũtonyi W'onthe nĩweekana naitũ kwĩanana na nzĩa sitũ na meko maitũ, o tondũ wavangĩte kwĩka.’ ”

7Mũthenyanĩ wa mĩongo ĩlĩ na inya wa mwei wa ĩkũmi na ũmwe, ũla nĩ mwei wa Sevati, mwakanĩ wa kelĩ wa kũsumbĩka kwa Ndalio, Mwĩai Ngai nĩwaneenie nakwa nyie Nzekalia mwana wa Mbelekia mwĩsũkũũe wa Ito woninĩ.

8Ũtukũ nĩnoonie mũndũ alĩsĩte mbalasinĩ ndune. Nĩwaũngamĩte mĩtĩnĩ yĩ matũ mathungu yaĩ vandũ mwandanĩ. Ĩtina wake vaĩ mbalasi ingĩ ndune, ingĩ syĩ ĩumbĩ na ingĩ nzaũ.

9Nĩvo ĩndĩ namũkũlilye atĩĩ, “Mũnene wakwa, mbalasi ii syĩonany'a ata?” Mũlaĩka ũla waneenie nakwa nĩwambĩie atĩĩ, “Nĩngũkwony'a kĩla ikwonany'a.”

10Kwoou ũla mũndũ waũngamĩte mĩtĩnĩ yĩ matũ mathungu nĩwambĩie atĩĩ, “Aa nĩmo ala Mwĩai Ngai ũtũmĩte moke kwanganga maisisya nthĩ.”

11Nĩmeeie ũla mũlaĩka wa Mwĩai Ngai waũngamĩte mĩtĩnĩ yĩ matũ mathungu atĩĩ, “Nĩtwanganga twakomanĩsya nthĩ yonthe na tweethĩa ĩuĩtye na ĩthũmũĩte.”

12Nĩvo ĩndĩ mũlaĩka wa Mwĩai Ngai wakũlilye atĩĩ, “Mwĩai Ngai Mwene Ũtonyi W'onthe, wĩendeea kwĩthĩwa ũtekwĩw'ĩa tei ndũa ya Yelũsalemu na ndũa sya Yuta nginya ĩndĩĩ? Wĩthĩĩtwe ũthatĩĩte ndũa isu vandũ va ĩvinda ya myaka mĩongo mũonza.”

13Mwĩai Ngai nĩwasũngĩie mũlaĩka ũsu ũsũngĩo mũseo na wa kũkiakisya.

14Nĩvo ĩndĩ mũlaĩka ũla waneenaa nakwa wambĩie nĩneene na wasya mũnene nasye kana Mwĩai Ngai Mwene Ũtonyi W'onthe easya atĩĩ, “Nĩnendete ndũa ya Yelũsalemu mũno, ĩĩ, nĩnendete Kĩĩma kya Saioni.

15Nĩnthatĩtw'e mũno nĩ nthĩ ila ikwĩw'a syĩ ũsũvĩonĩ. O na kau nĩnathatĩĩte Ĩsilaeli vanini, nthĩ isu nĩsyaendeeie kwongeleela andũ makwa thĩna.

16Kwoou nyie Mwĩai Ngai Mwene Ũtonyi W'onthe, nĩasya nĩngũsyokea ndũa ya Yelũsalemu nĩ kana nĩmĩw'ĩe tei. Ĩkalũ yakwa nĩyĩkwakwa ĩngĩ na ndũa ĩsu ĩyakwa ĩngĩ.”

17Mũlaĩka ũsu nĩwambĩie nĩendee kũneena nasye kana Mwĩai Ngai Mwene Ũtonyi W'onthe easya atĩĩ, “Ndũa syakwa ikaendeea nesa vyũ ĩngĩ, na nyie Mwĩai Ngai ngakiakisya Saioni na ngĩnyuva Yelũsalemu ĩngĩ.”

18Woninĩ ũngĩ nĩnoonie mbya inya!

19Nĩnakũlilye mũlaĩka ũla waneenaa nakwa atĩĩ, “Mbya ii syĩonany'a ata?” Nĩwanzũngĩie ambĩa, “Ii nĩ mbya ila syanyaĩĩkisye Yuta, Ĩsilaeli na Yelũsalemu.”

20Nĩvo ĩndĩ Mwĩai Ngai wambonisye atwii ana ma syũma.

21Nĩnakũlilye atĩĩ, “Aa mokĩte kwĩka ata?” Nĩwanzũngĩie ambĩa, “Ii nĩsyo mbya ila syanyaĩĩkisye Yuta, weethĩa vai mũndũ ũtonya kwĩka ũndũ. Atwii aa ma syũma mooka kũtelemya, na kũmina vinya wa nthĩ ila syookie kũvithũkĩa nthĩ ya Yuta na syanyaĩĩkya andũ mayo.”

Jump to: Chapter 2 →