Zechariah 5

Kamba (MBIVILIA ŨVOO MŨSEO)

← Chapter 4 Jump to: Chapter 6 →

1Woninĩ ũngĩ nĩnoonie ĩvuku ĩkũnze yĩũlũkĩte kĩsevenĩ!

2Ũla mũlaĩka nĩwangũlilye atĩĩ, “Wĩona kyaũ?” Nakwa namũsũngĩa namwĩa, “Nĩona ĩvuku ĩkũnze yĩũlũkĩte kĩsevenĩ. Ũasa wayo nĩ mita kenda na ũthanthau wayo nĩ mita inya na nyusu.”

3Nĩvo ĩndĩ wambĩie atĩĩ, “Ĩvuku yĩu ĩkũnze yĩandĩkĩtwe kĩumo kĩla kĩkwata nthĩ yonthe. Ngalĩko ĩmwe yĩandĩkĩtwe kana ing'ei syonthe ikalũngw'a ĩũlũ wa nthĩ, na ngalĩko ĩla ĩngĩ yĩandĩkĩtwe kana ala onthe mevĩtaa na ũvũngũ o namo makalũngw'a ĩũlũ wa nthĩ.

4Mwĩai Ngai Mwene Ũtonyi W'onthe easya, ‘Nyie mwene ngatũma kĩumo kĩu kĩthi kĩkalike nyũmbanĩ ya kĩng'ei, na nyũmbanĩ ya mũndũ ũla wĩvĩtaa na ũvũngũ aitũmĩa ĩsyĩtwa yakwa. Kĩkekala vau nginya kĩmine nyũmba ĩsu yonthe vyũ, mbwaũ syayo na mavia mayo.’ ”

5Ũla mũlaĩka waneenete nakwa nĩwookie na ambĩa atĩĩ, “Kwa sisya wone kĩla kyũkĩte.”

6Nakwa namũkũlya, “Kĩu nĩ kyaũ?” Nĩwanzũngĩie ambĩa atĩĩ, “Nĩ kĩkavũ, nakyo nĩ wonany'o wa mavĩtyo ma nthĩ yonthe.”

7Nĩvo ĩndĩ ngunĩko ya kĩkavũ kĩu, ĩla yaseũvĩtw'e na kyũma kĩũmu yakunũiwe. Kĩkavũnĩ kĩu nthĩnĩ vekalĩte mũndũ mũka.

8Mũlaĩka nĩwambĩie atĩĩ, “Mũndũ mũka ũũ nĩ wonany'o wa ũthũku.” Mũlaĩka ũsu nĩwavinyĩĩie mũndũ mũka ũsu kĩkavũnĩ ĩngĩ na akĩkunĩka na ĩla ngunĩko.

9Nĩvo ĩndĩ nookĩlilye metho na noona aka elĩ maũlũkĩtw'e nĩ kĩseve melekele kũla nĩĩ me na nthwau syĩ na vinya ta sya ĩsaũ. Aka asu nĩmookĩlilye kĩla kĩkavũ ĩũlũ yayayanĩ.

10Nĩnakũlilye ũla mũlaĩka waneenaa nakwa atĩĩ, “Matwaĩte kĩkavũ kĩu va?”

11Nĩwanzũngĩie ambĩa, “Maendete kũkyakĩa nyũmba nthĩ ya Sinali. Mamina kwaka nĩmekwia kĩkavũ kĩu nthĩ vala kĩseũvĩw'e kiwe.”

← Chapter 4 Jump to: Chapter 6 →