Zechariah 3

Kamba (MBIVILIA ŨVOO MŨSEO)

← Chapter 2 Jump to: Chapter 4 →

1Nĩvo ĩndĩ Mwĩai Ngai wambonisye Yosua Mũthembi Mũnene aũngamĩte mbee wa mũlaĩka wa Mwĩai Ngai. Satani nake aũngamĩte ngalĩko ya kw'oko kwa aũme kwa Yosua aimũsikata.

2Mũlaĩka wa Mwĩai Ngai nĩwaneenie na Satani amwĩa atĩĩ, “Mwĩai Ngai nĩakũkany'e we Satani! Mwĩai Ngai ũla wanyuvie Yelũsalemu nĩakũkany'e! Mwĩai Ngai avonokisye mũndũ ũũ o tondũ mũndũ ũvulasya kĩsinga kuma mwakinĩ.”

3Yosua aũngamĩte mbee wa mũlaĩka ekĩĩte ngũa syĩ ĩko.

4Mũlaĩka ũsu nĩweeie alaĩka angĩ ala maũngyĩ mbee wake atĩĩ, “Umyai Yosua ngũa syake syĩ ĩko.” Nĩwasyokie eea Yosua atĩĩ, “Nĩnavetanga naĩ yaku na nĩngũkwĩkĩa ngũa nzeo sya thooa mũnene.”

5Nĩwaisye nĩmamwove kĩtambaa kĩtheu mũtwe. Kwoou nĩmoovie Yosua kĩtambaa kĩtheu mũtwe na mamwĩkĩa ngũa. Mũlaĩka wa Mwĩai Ngai aũngamĩte vau.

6Mũlaĩka wa Mwĩai Ngai nĩwaneenie na Yosua amwĩa atĩĩ,

7“Mwĩai Ngai Mwene Ũtonyi W'onthe easya atĩĩ, ‘Waatĩĩa mĩao yakwa na ũyĩanĩsya motw'ĩo ala ngũnengete, ũkaũngamĩa nyũmba yakwa na iwanza syayo, nakwa ngatuma ũlika ũthũkũminĩ wakwa ta aa maũngamĩte vaa.

8Yu ĩndĩ we Yosua Mũthembi Mũnene, ĩthukĩĩsye, we vamwe na anyanyae maku ala mekalaa mbee waku, nũndũ andũ aa nĩ wonany'o wa maũndũ maseo ala makoka. Ngaete mũthũkũmi wakwa wĩtawa Ũvonge.

9Nĩngwia ĩvia yĩmwe yĩna ngalĩko mũonza mbee wa Yosua. Nyie Mwĩai Ngai Mwene Ũtonyi W'onthe, nĩngũyĩandĩka kwa kũyĩtemeleela, na kwa mũthenya ũmwe nĩngũvetanga naĩ ya nthĩ ĩno.

10Nyie Mwĩai Ngai Mwene Ũtonyi W'onthe nĩasya kana yĩla mũthenya ũsu wĩvika, kĩla ũmwe wenyu akathokya mũtũi wake mekale nthĩ ungu wa mũsavivũ wake, na mũtĩ wake wa mũkũyũ matanĩe mũuo na ũsũvĩo.’ ”

← Chapter 2 Jump to: Chapter 4 →