Zechariah 14

Kamba (MBIVILIA ŨVOO MŨSEO)

← Chapter 13 Jump to:

1Mũthenya wa Mwĩai Ngai nĩwũkĩte, yĩla syĩndũ ila syataviwe kuma kwenyu syĩaanwa mũsyaĩĩsye.

2Mwĩai Ngai akoombany'a mbaĩ syonthe nĩ kana ivithũkĩe ndũa ya Yelũsalemu. Ndũa ĩsu ĩkooswa na syĩndũ ila syĩ nyũmbanĩ syenyu iitavwa, na aka menyu maikwatwa na vinya. Nyusu ya ala mekalaa ndũanĩ ĩsu makakwatwa matwawe nthĩ ya ũeninĩ, ĩndĩ nyusu ĩla yĩtiala ndĩkaumw'a ndũanĩ ĩsu.

3Nĩvo ĩndĩ Mwĩai Ngai wĩũka na ayũkita na mbaĩ isu ũndũ wĩkaa ĩvindanĩ yĩla kwĩ kaũ.

4Mũthenyanĩ ũsu, Mwĩai Ngai akaũngama Kĩĩmanĩ kya Mĩthata kĩla kĩ ngalĩko ya wumĩlonĩ wa syũa wa ndũa ya Yelũsalemu. Kĩĩma kĩu kya Mĩthata kĩkaatũkanĩla katĩ, na mwanda mũnene mũno ũyuma ngalĩko ya wumĩlonĩ wa syũa nginya ũthũĩlonĩ wa syũa. Nyusu ĩmwe ya kĩĩma kĩu ĩkathi ngalĩko ya ĩũlũ na nyusu ĩla ĩngĩ ĩithi ngalĩko ya ĩtheo.

5Inyw'ĩ mũkasemba mũkĩe mwĩsĩlĩte mwandanĩ wa kĩĩma kyakwa nũndũ ũkaendeea nginya Aseli. Mũkakĩa ũndũ mwakĩie ĩvindanĩ ya kũthingitha kwa nthĩ, yĩla Usia wasumbĩkĩte Yuta. Nĩvo ĩndĩ Mwĩai Ngai, Ngai wakwa wĩũka, na atheu onthe vamwe nake.

6Mũthenyanĩ ũsu, kũikethĩwa kyeni, mbevo kana mbevo yĩna ĩa.

7Mũthenya ũkaendeea vate kĩvindu kĩkũka; ĩvinda yĩu yĩsĩwe no Mwĩai Ngai e weka. Kũikethĩwa mũthenya kana ũtukũ, nũndũ o na ĩa mawĩoo kũkeethĩwa kyeni.

8Mũthenyanĩ ũsu, kĩw'ũ kya thayũ kĩkauma Yelũsalemu; nyusu ĩmwe ya kĩw'ũ kĩu ĩkathi ũkanganĩ ũla wĩ ngalĩko ya wumĩlonĩ wa syũa, na nyusu ĩla ĩngĩ ĩithi ũkanganĩ ũla wĩ ngalĩko ya ũthũĩlonĩ wa syũa. Kĩw'ũ kĩu kĩkaendeea kuma ĩvindanĩ ya thano o ũndũ kyaumaa ĩvindanĩ ya mbua.

9Nĩvo ĩndĩ Mwĩai Ngai wĩtw'ĩka mũsumbĩ wa nthĩ yonthe. Akeethĩwa nowe Mwĩai Ngai e ũmwe, na ĩsyĩtwa yake nĩyo yĩkawetawa yĩ yoka.

10Nthĩ yonthe ĩkatw'ĩka ũiĩ kuma Ngeva nginya Limoni ngalĩko ya ĩtheo ya Yelũsalemu. Ĩndĩ ndũa ya Yelũsalemu ĩkookĩlw'a na kwĩkala vala yĩĩ kuma Mũvĩanĩ wa Mbengyameni nginya kĩsionĩ kya Mũvĩa wa Mbee, o na kũthi kũvika Mũvĩanĩ wa Konanĩ, na kuma Mwakonĩ Mũtũlu wa Ananeli nginya ivivĩonĩ sya ndivai ya mũsumbĩ.

11Ndũa ya Yelũsalemu ĩkatũwa nĩ andũ nũndũ ndĩkanangwa ĩngĩ; ĩkeethĩwa yĩ ũsũvĩonĩ.

12Ũũ nĩw'o ũwau mũthũku ũla Mwĩai Ngai wĩetee andũ ala meũka kũkita na Yelũsalemu: Mĩĩ yoo ĩkoa me o thayũ, metho moo makoa me o maimanĩ ma metho, na nĩmĩ syoo ikoa syĩ o makanyw'anĩ moo.

13Mũthenyanĩ ũsu, makakwatwa nĩ w'ĩa mũnene kuma kwa Mwĩai Ngai, nginya mũndũ akwate mũtũi wake na mayũkita.

14O na andũ ma Yuta makokita na ala ma Yelũsalemu. Ũthwii wa nthĩ syonthe ila ithyũlũlũkĩte nthĩ ya Yuta ũkoombanw'a: Thaavu, silĩva na ngũa. Ĩĩ, syĩndũ mbingĩ mũno.

15Ũwau mũthũku ta ũsu ũkakwata mbalasi, nyũmbũ, ngamĩle, mang'oi na nyamũ ingĩ syonthe ila syĩĩthĩwa maeemanĩ ma amaitha.

16Nĩvo ĩndĩ andũ onthe ala makatiala kuma mbaĩnĩ ila syavithũkĩie Yelũsalemu makaendaa kũu Yelũsalemu kĩla mwaka, kũthaitha Mwĩai Ngai Mwene Ũtonyi W'onthe, ũla nĩwe Mũsumbĩ, na kũtanĩa Mboka ya Tũsũmba twa Matũ.

17Ethĩwa andũ ma mbaĩ o na yĩva ĩũlũ wa nthĩ makalea kũthi Yelũsalemu kũthaitha Mwĩai Ngai Mwene Ũtonyi W'onthe, ũla nĩwe Mũsumbĩ, nthĩ yoo ndĩkaua mbua.

18Andũ ma nthĩ ya Misili malea kũtanĩa Mboka ya Tũsũmba twa Matũ, Mwĩai Ngai akamaetee ũwau ũsu mũthũku, ũla wĩkwata mbaĩ ila syĩlea kũthi kũtanĩa mboka ĩsu.

19Ũsu nĩw'o wĩĩthĩwa ũkany'o wa nthĩ ya Misili, na mbaĩ ila syĩlea kũthi kũtanĩa Mboka ya Tũsũmba twa Matũ.

20Mũthenyanĩ ũsu, ngengele sya mbalasi ikaandĩkwa, “Mũvathe kwondũ wa Mwĩai Ngai.” Mbisũ ila syĩ Ĩkalũnĩ ya Mwĩai Ngai ikeethĩwa iilyĩ mbakũli ila syĩ kĩthembeonĩ.

21Mbisũ syonthe sya kũua ila syĩ Yelũsalemu na Yuta ikathew'a kwondũ wa Mwĩai Ngai Mwene Ũtonyi W'onthe, nĩ kana onthe ala mokĩte kumya nthembo masyose na kũtheũkya nyama sya kumya nthembo nasyo. Mũthenya ũsu, vaikethĩwa mũndũ o na ũmwe ũkũthoosya syĩndũ Ĩkalũnĩ ya Mwĩai Ngai Mwene Ũtonyi W'onthe.

← Chapter 13 Jump to: