Zechariah 12

Kamba (MBIVILIA ŨVOO MŨSEO)

← Chapter 11 Jump to: Chapter 13 →

1Ũũ nĩ ũtw'ĩo wĩ vinya wa Mwĩai Ngai kwa andũ ma Ĩsilaeli. Mwĩai Ngai ũla watambũũkisye matu, na aaka myambĩlĩĩlyo ya nthĩ na anenga andũ thayũ easya atĩĩ,

2“Ngatuma ndũa ya Yelũsalemu yĩthĩwa ĩilyĩ ta kĩkombe kya ndivai; nthĩ ila imĩthyũlũlũkĩte ikanyw'a na kũlũa ta athengi. Yĩla ndũa ya Yelũsalemu yĩvithũkĩwa, o na ndũa sya Yuta syonthe o ta ũu ikavithũkĩwa.

3Mũthenya ũsu ngatuma ndũa ya Yelũsalemu yĩthĩwa ĩilyĩ ta ĩvia ĩito kwa andũ onthe; ũla wĩtata kũyũkĩlya akeeyĩũmĩsya mũno. Andũ ma nthĩ syonthe ĩũlũ wa nthĩ makoombana vamwe mamĩvithũkĩe.

4Nyie Mwĩai Ngai nĩasya kana mũthenya ũsu ngatuma kĩla mbalasi ĩkwatwa nĩ w'ĩa, na ũla ũmĩlĩsĩte akwatwa nĩ ndũũka. Ngatuma mbalasi sya andũ ma nthĩ ila ingĩ itw'ĩka ilalinda, ĩndĩ ngasũvĩa andũ ma mbaĩ ya Yuta.

5Nĩvo ĩndĩ mbaĩ sya andũ ma Yuta syĩneena syasye atĩĩ, ‘Ala matwĩe Yelũsalemu nĩmakwatĩte vinya kuma kwa Mwĩai Ngai Mwene Ũtonyi W'onthe, Ngai woo.’

6“Mũthenya ũsu, ngatuma atongoi ma andũ ma Yuta methĩwa mailyĩ ta mbisũ yakanĩte mwaki yĩ katĩ wa ngũ, na ta ũmũĩ wakanĩte katĩ wa iia. Makavĩvya nthĩ syonthe ila imathyũlũlũkĩte, ĩndĩ andũ ma Yelũsalemu makekala me ũsũvĩonĩ ndũanĩ ĩsu.

7“Nyie Mwĩai Ngai ngatuma asikalĩ ma Yuta methĩwa me ma mbee kũsinda, nĩ kana nzyawa sya Ndeviti na ala matwĩe Yelũsalemu maikone ta mo anene mbee wa andũ ala angĩ ma mbaĩ ya Yuta.

8Mũthenya ũsu nyie Mwĩai Ngai ngasũvĩa andũ ala matwĩe Yelũsalemu wĩthĩe ũla mwonzu vyũ katĩ woo e na vinya ta Mũsumbĩ Ndeviti. Nzyawa sya Ndeviti nĩsyo syĩtongoesya andũ ma Yuta ta mũlaĩka wakwa nyie Mwĩai Ngai. Ĩĩ, makeethĩwa mailyĩ takwa nyie Ngai.

9“Mũthenya ũsu ngamina mbaĩ syonthe ila ikwenda kũvithũkĩa Yelũsalemu.

10Nganenga andũ ma mũsyĩ wa Ndeviti na ala matwĩe Yelũsalemu veva wa kwĩw'anĩa tei na wa kũvoya, nĩ kana mamũsisya ũla matonyie, mamũĩĩe na kyeva ũndũ mũndũ ũĩĩaa mwana wake e ũmwe, na makĩmũĩĩa na woo mũnene ũndũ mũndũ ũĩĩaa mwana wake wa mbee.

11Mũthenya ũsu Yelũsalemu kũkeethĩwa kĩĩo kĩnenevete ta kĩĩo kĩla kyaĩ kya kũĩĩa Atati-limoni ũiĩnĩ wa Mekito.

12Nthĩ ĩkaĩa, kĩla mũsyĩ ũkaĩa wĩ w'oka, aũme me oka na iveti syĩ syoka; andũ ma mũsyĩ wa Ndeviti me oka; andũ ma mũsyĩ wa Nathani me oka;

13andũ ma mũsyĩ wa Livai me oka; andũ ma mũsyĩ wa Simei me oka;

14na mĩsyĩ ĩla ĩngĩ yĩĩthĩwa ĩtialĩte ĩkaĩa, aũme me oka na aka me oka.

← Chapter 11 Jump to: Chapter 13 →