Zechariah 13

Kamba (MBIVILIA ŨVOO MŨSEO)

← Chapter 12 Jump to: Chapter 14 →

1“Mũthenyanĩ ũsu kũkaumĩla nthongo ya kũthesya andũ ma mũsyĩ wa Ndeviti na ala matwĩe Yelũsalemu naĩ syoo na ũvuku woo.

2“Mũthenyanĩ ũsu, nyie Mwĩai Ngai Mwene Ũtonyi W'onthe nĩasya kana ngavetanga masyĩtwa ma ngai sya mĩvw'anano kuma nthĩ, na maikalilikanwa ĩngĩ. O ta ũu ngavetanga athani na maveva mavuku kuma nthĩ.

3Ethĩwa mũndũ o na wĩva akeeyumĩlya ĩngĩ ta mwathani, ĩthe na nyinyia makamwĩa, ‘No nginya ũkw'e nũndũ wĩneena ũvũngũ ĩsyĩtwanĩ ya Mwĩai Ngai.’ Nĩvo ĩndĩ ĩthe na inyia wake memũtonya mũkuthũ akyathana.

4Mũthenyanĩ ũsu kĩla mwathani akeekĩĩthw'a nthoni nĩ mawoni make yĩla ũkwathana; ndakekĩa ngũa sya w'ĩa nĩ kana akenge andũ,

5ĩndĩ akasya atĩĩ, ‘Nyie ndi mwathani, nĩ mũĩmi, nũndũ nĩthĩĩtwe ngĩĩma mũũnda matukũ onthe kuma nĩ wa mũika.’

6Ethĩwa mũndũ akamũkũlya atĩĩ, ‘Nasyo itau ii syĩ mũongo ũneekie ata?’ Akasũngĩa asye, ‘Itau ii nĩnaikwatĩie nyũmba kwa anyanyawa.’ ”

7Mwĩai Ngai Mwene Ũtonyi W'onthe easya atĩĩ, “Amũka we ũvyũ! Ũkĩla ũvithũkĩe mũĩthi wakwa, mũndũ ũla wĩ vakuvĩ nakwa! Kũna mũĩthi, na malondu nĩmekũnyaĩĩka; nĩngũtambũũkya kw'oko kwakwa, nĩvithũkĩe tũla tũnini.

8Nyie Mwĩai Ngai nĩasya, andũ elĩ katĩ wa kĩla andũ atatũ nĩmekũvetangwa na maiminwa, no mũndũ ũmwe katĩ wa kĩla atatũ ũkũtiala.

9Andũ asu makatiala ngamekĩa mwakinĩ, na kũmathesya ũndũ mũndũ ũtheasya silĩva, na kũmatata ũndũ thaavu ũtatawa kana nĩ thaavu wa w'o. Makambĩkaĩla, nakwa ngamasũngĩa. Nganeena nasye, ‘Aa nĩ andũ makwa,’ namo makaneena masye, ‘Mwĩai Ngai nĩwe Ngai waitũ.’ ”

← Chapter 12 Jump to: Chapter 14 →