bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (MBIVILIA ŨVOO MŨSEO)
/
Zechariah 11
Zechariah 11
Kamba (MBIVILIA ŨVOO MŨSEO)
← Chapter 10
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 12 →
1
We Levanoni, vingũa mĩomo yaku, nĩ kana mwaki ũvĩvye mĩtĩ yaku ya mĩkũũ!
2
Ĩthĩwa na kyeva we mũtĩ wa mũtalakwe, nũndũ mũtĩ wa mũkũũ nĩ mũvĩvye, mĩtĩ ĩsu yĩ nguma nĩ myanange! Ĩthĩwai na kyeva inyw'ĩ myalonĩ ya Mbasani, nũndũ mũtitũ mũthungu nĩ mũtemange!
3
Ĩw'ai kĩĩo kya atongoi, nũndũ nguma syoo nĩ mbanange! Ĩw'ai kũluluma kwa mĩnyambũ, nũndũ kĩtheka kĩthungu kya Ũsĩ wa Yolotani nĩ kyanange!
4
Mwĩai Ngai, Ngai wakwa nĩwambĩie atĩĩ, “Ĩtw'ĩkĩthye mũĩthi wa malondu maendete kũthĩnzwa.
5
Ala mamathooaa nĩmamathĩnzaa na mayĩkawa ũndũ, na ala mamathooasya maneenaa makasya atĩĩ, ‘Nĩataĩwe Mwĩai Ngai! Yu nĩtwathua.’ O na aĩthi mamo maimew'ĩaa tei.
6
Nyie Mwĩai Ngai nĩasya kana ndikew'ĩa tei ĩngĩ andũ ala mekalaa ĩũlũ wa nthĩ ĩno. Nyie mwene ngatuma kĩla mũndũ ethĩwa e ungu wa mũtũi wake, na kĩla mũndũ ungu wa vinya wa mũsumbĩ wake. Asumbĩ asu makathĩny'a nthĩ na ndikatangĩĩa mũndũ o na ũmwe kuma ũtonyinĩ woo.”
7
Kwoou nĩneetw'ĩkĩthisye mũĩthi wa malondu ala maendete kũthĩnzwa, nũndũ naandĩkĩtwe nĩ ala mathooasya malondu. Nĩnoosie ndata ilĩ: Nĩneetie ĩmwe, “Ũseo,” na neeta ĩla ĩngĩ, “Ngwatanĩo.” Nĩvo ĩndĩ naĩthisye malondu.
8
Kwa ĩvinda ya mwei ũmwe, nĩnavetie aĩthi atatũ. O ta ũu wũmĩĩsyo wakwa kwa malondu nĩwathelile, namo malondu mamena.
9
Kwoou nĩnaisye atĩĩ, “Ndikethĩwa mũĩthi wenyu ĩngĩ. Ũla ũkũkw'a nĩakw'e, na ũla ũkũthela nĩathele! Na ala meũtiala nĩmaye nyama sya ala angĩ matialĩte vamwe.”
10
Nĩnoosie ĩla ndata yakwa neetie, “Ũseo,” na namĩtũla kwonany'a kana ũtianĩo ũla Mwĩai Ngai watianĩie na andũ ma mbaĩ syonthe nĩwathela.
11
Kwoou ũtianĩo ũsu nĩwathelile mũthenya ũsu. Ala athoosya ma malondu manzyaĩĩsye, nĩmamanyie kana Mwĩai Ngai nũneenete kwĩsĩla mekonĩ makwa.
12
Nĩvo ĩndĩ nameie atĩĩ, “Ethĩwa mwĩona wĩ waĩlu, nengei ĩtuvi yakwa; ĩndĩ mwoona ũte waĩlu, ĩkalai nayo.” Nĩvo ĩndĩ manthimĩie ĩtuvi ya mbesa sya silĩva mĩongo ĩtatũ.
13
Mwĩai Ngai nĩwambĩie atĩĩ, “Ia silĩva isu kĩnandũnĩ kya Ĩkalũ.” Ĩtuvi yĩu nĩyo yaaĩlĩte wĩa wakwa. Nĩvo ĩndĩ noosie silĩva isu mĩongo ĩtatũ na nasia kĩnandũnĩ kya Ĩkalũ ya Mwĩai Ngai.
14
Nĩnatũlile ĩla ndata ya kelĩ ĩla neetie, “Ngwatanĩo,” kwonany'a kana nĩnaananga ngwatanĩo ya Yuta na Ĩsilaeli.
15
Nĩvo ĩndĩ Mwĩai Ngai waneenie nakwa ambĩa atĩĩ, “Yu ĩtw'ĩkĩthye mũĩthi ĩngĩ, na ĩvinda yĩĩ ũyĩtw'ĩkĩthya mũĩthi mũthũku!
16
Nũndũ nĩngũetee nthĩ ĩno mũĩthi ũngĩ ũla ũtakũlasya o na ĩlondu yooawa, kana kũmantha yĩla yau, kana kũiita yĩla ĩũmĩsye, kana kũĩthya yĩla yĩ na vinya, ĩndĩ mũĩthi ũsu akaya malondu ala manou na kũtilanga mavũngũ mamo.
17
Kyeva nĩ kwa mũĩthi wakwa mũthũku, ũla ũtiaa malondu! Ũvyũ nũtile kw'oko kwake, na itho yake ya kw'oko kwa aũme nĩyĩthong'olw'e! Kw'oko kwake nĩkwonze, na itho yake ya kw'oko kwa aũme nĩyae vyũ!”
← Chapter 10
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 12 →
All chapters:
1
2
3
4
5
6
7
8
9
10
11
12
13
14