Zechariah 10

Kamba (MBIVILIA ŨVOO MŨSEO)

← Chapter 9 Jump to: Chapter 11 →

1Voyai Mwĩai Ngai amũnenge mbua ya uũa. Mwĩai Ngai nĩwe ũetae matu ma mbua, nĩwe ũeteae andũ mĩoono ya mbua, na kũtuma nyeki ĩmea kĩsesinĩ kwondũ wa kĩla mũndũ.

2Mĩvw'anano ĩneenaa ndeto sya mana, na ala maaũasya maneenaa ũvũngũ; ala maotaa matavanasya ndoto sya ũvũngũ, na kũnengane wĩkwatyo wa mana. Kwoou andũ nĩmangangaa ta malondu; nĩmathĩnaa nũndũ mai na mũĩthi.

3Mwĩai Ngai easya atĩĩ, “Nĩnthatĩtw'e mũno nĩ aĩthi asu, na ngakany'a atongoi asu. Nyie Mwĩai Ngai Mwene Ũtonyi W'onthe nĩnzũvĩaa malondu makwa, mbaĩ ya Yuta, na ngamatw'ĩkĩthya ta mbalasi yakwa nzeo kaũnĩ.

4Kuma mbaĩnĩ ya Yuta kũkauma ĩvia yĩla yĩ vata mũno mwakonĩ, kũkauma kyambo kya kwamba ĩeema, kũkauma ũta wa kaũ, na kũkauma atongoi ma kĩla mũthemba.

5Andũ ma Yuta makeethĩwa mailyĩ ta ngũmbaũ kaũnĩ, maikinyangĩa amaitha moo ndakanĩ ĩla yĩ nzĩanĩ. Nũndũ nyie Mwĩai Ngai nĩ vamwe namo, makokita na kũsinda asikalĩ malĩsĩte mbalasinĩ.

6“Ngalũlũmĩĩlya andũ ma Yuta, na ngatangĩĩa nzyawa sya Yosevu. Ngamatũnga nũndũ nĩngũmew'ĩa tei, na makeethĩwa mailyĩ ta ndaamaeka; nũndũ ninyie Mwĩai Ngai, Ngai woo na ngamasũngĩa.

7Nĩvo ĩndĩ andũ ma Evalaimu meĩthĩwa me ngũmbaũ syĩ ũtonyi, na makatana ta andũ meũnyusaa ndivai. Syana syoo ikoona ũu na iitana, ngoo syoo ikatana nũndũ wakwa nyie Mwĩai Ngai.

8“Ngeeta andũ makwa na ngĩmombany'a vamwe, nũndũ nĩnĩmovoetye, na makaingĩva o tondũ mailyĩ mbeenĩ.

9O na vala nĩnamanyaĩĩkĩisye mbaĩnĩ ingĩ, o na me nthĩ sya kũasa makandilikana, na me na syana syoo makekala thayũ na maisyoka kwoo.

10Ngamatũnga mũsyĩ kuma nthĩ ya Misili, na ngĩmombany'a kuma Asuli. Ngamaete nthĩ ya Ngileati na Levanoni, nginya mausũe wĩthĩe vai vandũ mekala.

11Makesĩla ũkanganĩ wa mathĩna, na kĩuutani kya ũkanga kĩkausya, na kũla kũliku kwa Ũsĩ wa Naeli kũing'ala. Ngathĩĩo sya Asuli ikathela, na vinya wa Misili ũkathela.

12Nyie ngeekĩa andũ makwa vinya, namo makambĩw'aa na kwĩkalaa maimbendeesya. Nĩasya ũu nyie Mwĩai Ngai.”

← Chapter 9 Jump to: Chapter 11 →