2 Kings 13

Kalenjin Bible (BUKUIT NE TILIL)

← Chapter 12 Jump to: Chapter 14 →

1Kitoi kolaitoran Jeoahas weritab Jeu eng’ Israel eng’ Samaria, eng’ kenyitab tiptem ak somok, ne bo Joas weritab Aasia laitoriatab Juda, ak kilaitoran kenyisiek taman ak tisab.

2Ak kiyai yaitiet eng’ taitab Jehovah, ak kosub tengekwogikab Jeroboam weritab Nebat, che kiibeete Israel si koyai tengekto; ma istoegei tengekwogichoto.

3Ak kilalyo neregekab Jehovah agobo Israel, ak kiinde ichek eutab Hasael laitoriatab Suria, ak konde eutab Ben-hadad weritab Hasael, betusiek tugul.

4Ak kirirji Jeoahas Jehovah, ak kigasyi Jehovah inendet: amu kigeer nyalildab Israel, ole kiinyalildoi laitoriatab Suria.

5(Ak kiigochi Jehovah Israel yetindet, kot komanda eng’ eutab Suriek: ak kimeny lagokab Israel emaisiekwak, ko u eng’ tai.

6Ago ma istoegei tengekwogikab gotab Jeroboam, che kiibeete Israel si koyai tengekto, ago kibendate tengekwogichoto: ak kitebe Samaria Asera agine.)

7Amu ma ituukyi bik Jeoahas, kobate bik konom che lanyei mbartanyisiek, ak karisiek taman, ak bik elfusiek taman che bunei kelyek; amu kibar laitoriatab Suria ichek, ak koyai koigei metetek che mi ole kiborse.

8Ak boisionik che ng’etunotin che bo Jeoahas, ak tuguk tugul che kiyai, ak kimnatennyi, ko ma sirotin eng’ bukuitab ateptab betusiek ne bo laitorinikab Israel?

9Ak kiru Jeoahas koboto kwanisiekyik; ak kigitub inendet eng’ Samaria: ak kilaitoran Joas werinnyi kogeer inendet.

10Kitoi kolaitoran Jeoas weritab Jeoahas eng’ Israel eng’ Samaria, eng’ kenyitab sosom ak tisab ne bo Joas laitoriatab Juda, ak kilaitoran kenyisiek taman ak lo.

11Ak kiyai yaitiet eng’ taitab Jehovah; ma istoegei tengekwogik tugul che bo Jeroboam weritab Nebat, che kiibeete Israel si koyai tengekto: ago kiwendate tengekwogichoto.

12Ak boisionik che ng’etunotin che bo Joas, ak tuguk tugul che kiyai, ak kimnatennyi ne kibaregei ak Amasia laitoriatab Juda, ko tos ma sirotin eng’ bukuitab ateptab betusiek ne bo laitorinikab Israel?

13Ak kiru Joas koboto kwanisiekyik; ak kitebe Jeroboam ng’echerennyi ne bo laitornatet: ak kigitupchi Joas Samaria koboto laitorinikab Israel.

14Ak kinam Elisha miando ne kibar inendet: Ak kichorgei Joas laitoriatab Israel konyo ole mi inendet, ak korir agobo inendet, ak kole, Baba, baba, karitab Israel ak bik che lanyei mbartanyisiekyik!

15Ak kilenji Elisha inendet, Nam kwanget ak kipchabonik: konam anyun inendet kwanget ak kipchabonik.

16Ak kilenji laitoriatab Israel, Kersach: ak kigersach. Ak kiigonoor Elisha eunekyik eunekab laitoriat.

17Ak kilenji, Yat tirisiet ne tokyingei kong’asis: ak kiyat. Ak kile Elisha, Mwokte: ak kimwokto. Ak kimwa Elisha kole, Kipchabetab Jehovah ne bo katerteret, kipchabetab katerteret ne itertere Suriek: amu ibare Suriek eng’ Apek, kot igesu ichek.

18Ak kilenji, Nam kipchabonik: ak kinam. Ak kilenji laitoriatab Israel, Kwer ng’ony: ak kikwer konyil somok, kobagach.

19Ak kinerekyi chitab Kamuktaindet inendet, kolenji, Kaga nyoljin ikwer konyil mut anan ko lo, ko kata ibare Suriek kot igesu: ago nguno ibare Suriek konyil somok kityo.

20Ak kime Elisha, ak kigitub inendet. Ak kiibok lugosiekab Moabik kobwa emet eng’ taunetab kenyit.

21Ak ye kitubei ichek chito, ogeero, kogeer luget; ak kiwirji chichoto kereritab Elisha: ak kingotiiny chichoto kowekab Elisha, kosob ak kong’eet.

22Ak kiinyalil Hasael laitoriatab Suria Israel eng’ betusiek tugul che bo Jeoahas.

23Ago kiiborji Jehovah mieindanyi ichek, ak korire ichek ak kogonyit ichek, amu kayomisennyi ne kiiyomisgei ak Abraham, ak Isak, ak Jakobo, ko ma cham kobar ichek, anan koon ichek eng’ tainnyi agoi rani.

24Kome anyun Hasael laitoriatab Suria; ak kilaitoran Ben-hadad werinnyi kogeer inendet.

25Ak kiiweech Jeoas weritab Jeoahas nganasok eng’ eutab Ben-hadad weritab Hasael che kiga ib eng’ eutab Jeoahas kwandanyi eng’ luget. Kiiterter Joas inendet konyil somok, ak kiiweech nganasokab Israel.

← Chapter 12 Jump to: Chapter 14 →