2 Kings 21

Kalenjin Bible (BUKUIT NE TILIL)

← Chapter 20 Jump to: Chapter 22 →

1Ki bo kenyisiek taman ak aeng’ Manase ye kitau kolaitorani; ak kilaitoran kenyisiek konom ak mut eng’ Jerusalem: ak kainetab kamennyi ko ki Hepsi-ba.

2Ak kiyai yaitiet eng’ taitab Jehovah, kosub tuguk che kiwechei che bo bororiosiek, che kion Jehovah eng’ taitab lagokab Israel.

3Amu kiteech kogeny komoswek che tororen che kiga kobut Hesekia kwandanyi; ak kiteekyi Baal kapkorosusiek, ak koyai Asera ko u ye kiga yai Ahab laitoriatab Israel, ak kogutung’ji tuguk tugul che bo kipsengwet, ak koot.

4Ak kiteech kapkorosusiek eng’ gotab Jehovah ne kimwa Jehovah agobo goyoto kole, Andoi kainennyu Jerusalem.

5Ak kiteekyi kapkorosusiek tuguk tugul che bo kipsengwet eng’ seremusiek tuwai che bo gotab Jehovah.

6Ak kiigoito werinnyi kobun mat, ak kong’orso, ak koboisie bonisiet, ak kobois koboto bik che boisie oik, ak bonik: kiyai yaitiet eng’ taitab Jehovah, kotach inendet konerech.

7Ak kiinde kanamwetab Asera ne kigiwai, ne kiga koyai, got ne kiga mwachi Jehovah Daudi ak werinnyi Solomon, kolenji, Andoi kainennyu koigeny goi ak Jerusalem, ne kialewen eng’ ortinwek tugul che bo Israel:

8ama agochini kelyekab Israel koombenot kogeny koba eng’ emet ne kiagochi kwanisiekwak; ngot korib koyai ko u tugul che kiang’at ichek, ko u ng’atutiet tugul ne king’at otwogindennyu Musa ichek.

9Ago ma kas: ak kiichuut Manase ichek koyai yaitiet kosiir ne kiyai bororiosiek, che kibar Jehovah eng’ taitab lagokab Israel.

10Ak king’alal Jehovah eng’ otwogikyik maotik kole,

11Amu kogoyai Manase laitoriatab Juda tuguchu kiwechei, ak koyai yaitiet kosiir tugul che kiyai Amorik, che kimi eng’ tai, ko tom kobiit inendet, ak kogochi Juda agine koyai tengekto eng’ kanamonikyik:

12ko kamwa anyun Jehovah Kamuktaindetab Israel ko u ni kole, Keero, aibu yaitiet konyo Jerusalem ak Juda, kot kotildilyo itik tuwai eng’ chi age tugul ne kagas.

13Ak aiitoi anwetab Samaria kobun Jerusalem, koboto kit ne kikwaise ne bo gotab Ahab: ak abuchi Jerusalem ko u ye ibuchi chito sanit, ye ibuchi ak kogabui.

14Ak atoortoi che kang’et che bo borotennyu, ak ande ichek eunekab bunikwak; ak koek luulenik che luulei bunikwak tugul;

15amu kigoyai yaitiet eng’ tainnyu, ak kigotacha anerech, koboch betut ne kimong’u kwanisiekwak eng’ Misri, agoi rani.

16Ak kitumda kogeny Manase korotik che chang’ kot, che matinyei tengek, kot konyiit Jerusalem kong’eete komosta age agoi komosta age; koboto tengektanyi ne kiibeete Juda si koyai tengekto, eng’ yaitiet ne kiyai eng’ taitab Jehovah.

17Ak boisionik che ng’etunotin che bo Manase, ak tuguk tugul che kiyai, ak tengektanyi ne kiyai, ko ma sirotin eng’ bukuitab ateptab betusiek ne bo laitorinikab Juda?

18Ak kiru Manase koboto kwanisiekyik, ak kigitupchi mbaretab gonnyi, eng’ mbaretab Usa: ak kilaitoran Amon werinnyi kogeer inendet.

19Ki bo kenyisiek tiptem ak aeng’ Amon ye kitau kolaitorani; ak kilaitoran kenyisiek aeng’ eng’ Jerusalem: ak kainetab kamennyi ko ki Mesulemet cheptab Harus ne bo Jotba.

20Ak kiyai yaitiet eng’ taitab Jehovah, ko u ye kiga yai Manase kwandanyi.

21Ak kiwendote ortinwek tugul che kiwendote kwandanyi, ak koot kanamonik che kiotei kwandanyi, ak kogutung’ji:

22ak kometo Jehovah, Kamuktaindetab kwanisiekyik, ama isub ortinwekab Jehovah.

23Ak kichaam otwogikyik Amon, ak kobar otwogichoto laitoriat eng’ gonnyi.

24Ago kibar bikab emet ichek tugul che kichaamei laitoriat Amon; ak kiyai bikab emet Josia werinnyi koek laitoriat.

25Ak boisionik che ng’etunotin che bo Amon che kiyai, ko ma sirotin eng’ bukuitab ateptab betusiek ne bo laitorinikab Juda?

26Ak kigitupchi kererinnyi eng’ mbaretab Usa: ak kilaitoran Josia werinnyi kogeer inendet.

← Chapter 20 Jump to: Chapter 22 →