2 Kings 23

Kalenjin Bible (BUKUIT NE TILIL)

← Chapter 22 Jump to: Chapter 24 →

1Ak kiiyokto laitoriat, kiyumji inendet boisiek tugul che bo Juda ak che bo Jerusalem.

2Ak kitogosta laitoriat gotab Jehovah, koboto bik tugul che bo Juda ak bik tugul che kimenyei Jerusalem, ak tisiik, ak maotik, koboto bik tugul, che mengech ak che eechen: ak kisoman ng’alek tugul che bo bukuitab arorutiet ne kiginyoru eng’ gotab Jehovah.

3Ak kitonon laitoriat eng’ ye bo toloita, ak koyai arorutiet eng’ taitab Jehovah, kosub Jehovah, ak korib ng’atutikyik, ak baornatosiekyik, ak kayomisutikyik, eng’ muguleldanyi tugul, ak sobondanyi tugul, kogimit ng’alekab arorutioni che kigisirji bukuini: ak kitononso bik tugul koyan arorutionoto.

4Ak king’at laitoriat Hilkia tisiindet ne o, ak tisiik che rubei ne bo tai, ak ribikab kurget, koib komong’ eng’ hekalutab Jehovah terenik tugul che kigiyachin Baal, ak che bo Asera, ak che bo tuguk tugul che bo kipsengwet: ak kibeel eng’ Jerusalem sang’ eng’ mbaretab Kidron, ak koib orek koba Bet-el.

5Ak kiisto tisiikab kanamonik, che kiga konde laitorinikab Juda, kobeelei nyamdutik eng’ komoswek che tororen eng’ nganasokab Juda, ak eng’ komoswek che kiyiem Jerusalem, koboto ichek che kibeeljin Baal nyamdutik, ak asista, ak arawet, ak kecheik che eechen, ak tuguk tugul che bo kipsengwet.

6Ak kiib Asera komong’ eng’ gotab Jehovah, koib komanda eng’ Jerusalem, agoi kererutab Kidron, ak kobeel eng’ kererutab Kidron, ak kotuatui komengegitu koek busbusik, ak koseer koba kererisiekab bik.

7Ak kibut gorikab sodomik, che kimi gotab Jehovah, ole kiyae kwonyik ngoroik che songinindos che bo Asera.

8Ak kiimut inendet tisiik tugul komong’ eng’ nganasokab Juda, ak kong’wanit komoswek che tororen ole kibeele tisiik nyamdutik, koboch Geba agoi Beer-seba; ak kibut komoswek che tororen che bo ormarichok che kimi ye kimandoe eng’ ormarichetab Josua bounindetab nganaset, che kimi komostab katam eng’ ormarichetab nganaset.

9Ago ma togos tisiikab komoswek che tororen kobwa ye mitei kaptisisietab Jehovah eng’ Jerusalem, ago kiamei makatinik che ma kinde mermerek eng’ kwenutab tupchosiekwak.

10Ak kiing’wanit Topet, ne mi atebwetab lagokab Hinom, si ma igoito chi werinnyi anan ko cheptanyi kobun mat kogochi Molek.

11Ak kiisto mnbartanyisiek che kiga kogochi laitorinikab Juda asista, eng’ ye kimandoe kebendi gotab Jehovah, ye negite gotab Natan-melek ribindet, ne mi serem; ak kibeel karisiek che bo asista eng’ mat.

12Ak kibut laitoriat kapkorosusiek, che kimi got barak eng’ got ne tabonu barak ne bo Ahas, che kiga koyai laitorinikab Juda, ak kapkorosusiek che kiga koyai Manase eng’ seremusiek tuwai che bo gotab Jehovah ak kotuatui koturur, ak koseer koba kererutab Kidron.

13Ak kiing’wanit laitoriat komoswek che tororen che kimi taitab Jerusalem, che kimi eutab tai ne bo tulwetab ng’emisiet, ne kiga teekyi Solomon laitoriatab Israel Astoret ne kiwechei ne bo Sidonik, koboto Kemos ne kiwechei ne bo Moab, ak Milkom ne kiwechei ne bo lagokab Amon.

14Ak kituatui tolochik, ak koeb Aserik koluul, ak kiinyiit oloto kowekab bik.

15Ak kibut kapkorosut ne kimi Bet-el, ak komosta ne toror ne kiga koyai Jeroboam weritab Nebat, ne kiigochi Israel koyai tengekto, kibut kapkorosunoto ak komosta ne toror; ak kibeel komosta ne toror, ak kotuatui koek busbusik, ak kobeel Asera.

16Ak kingowelelgei Josia, kogeer kererisiek che kimi tulwet; ak koyokto bik koba koib kowek eng’ kererisiechoto, konyo kobeel eng’ kapkorosunoto, ak kong’wanit, ko u ng’olyotab Jehovah ne kimwaita chitab Kamuktaindet, ne kimwaitoi tuguchoto.

17Ak kiteeb kole, Nee kio bo kabwatet no ogeere? Ak kimwachi bikab nganaset inendet kolenji, Kereritab chitab Kamuktaindet, ne kibunu Juda, ne kinyo komwaita tuguchuto kaiyai iyachi kapkorosutab Bet-el.

18Ak kile, Obagakte; amat koisto chi kowekyik. Kobagakta anyun kowekyik, koboto kowekab maotiot ne kibunu Samaria.

19Ak kiisto Josia gorik tugul che bo komoswek che tororen che kimi nganasokab Samaria, che kiga koteech laitorinikab Israel kotage Jehovah konerech, ak koyachi choto ko u tugul che kiga koyachi che kimi Bet-el.

20Ak kibar tisiik tugul che bo komoswek che tororen che kimi yoto, eng’ kapkorosusiek, ak kobeel kowekab bik eng’ baragunywa; ak koweek kwo Jerusalem.

21Ak king’at laitoriat bik tugul kolenji, Oripchi Jehovah Kamuktaindeng’wong’ paska, ko u ye kigisir eng’ bukuini bo arorutiet.

22Iman, kimata keyai paska ne u noto koboch betusiekab kiruogik che kiiruokyin Israel, anan eng’ betusiek tugul che bo laitorinikab Israel, anan che bo laitorinikab Juda;

23ago kigiyai paska nito eng’ kenyitab taman ak sisiit ne bo laitoriat Josia, keyachi Jehovah eng’ Jerusal

24Ago kiisto Josia ichek che kiboisie oik, ak bonik, ak terapik, ak kanamonik, ak tuguk tugul che kiwechei che kigigeerei eng’ emetab Juda ak eng’ Jerusalem, si kobiit kogimit ng’alekab Ng’atutik che kiga kisir eng’ bukuit ne kinyor Hilkia tisiindet eng’ gotab Jehovah.

25Ak kima biit eng’ tai laitoriat ne kergei ak inendet, ne kiisub Jehovah eng’ muguleldanyi tugul, ak eng’ sobondanyi tugul, ak eng’ kamugennyi tugul, ko u Ng’atutik tugul che bo Musa; amata kobiit eng’ let laitoriat age ne u inendet.

26Agot nganda u noto ko ma meto Jehovah koromnatetab neregekyik che eechen, che kiga nerekyine Juda, amu tagisiet tugul ne kitach Manase inendet.

27Ak kile Jehovah, Aistoi Juda agine eng’ tainnyu, ko u ye kiaiste Israel, ak amete nganasani kialewen, Jerusalem, koboto got ne kiale, Tebe kainennyu yoto.

28Ak boisionik che ng’etunotin che bo Josia, ak tuguk tugul che kiyai, ko ma sirotin eng’ bukuitab ateptab betusiek ne bo laitorinikab Juda?

29Kitogosta Parao-neko laitoriatab Misri eng’ betusiekab Josia kobokyi laitoriatab Asuria, eng’ ainetab Euprate: ak kwo laitoriat Josia kwo kobargei ak inendet; ak kibar laitoriandanato Josia eng’ Megido, ye kingogeer inendet.

30Ak kila inendet otwogikyik eng’ karit eng’ Megido ko kagome, ak koloo inendet konyo Jerusalem, ak kotupchi inendet kererinnyi. Ak kiimut bikab emet Jeoahas weritab Josia, ak koiil inendet, ak koyai inendet koek laitoriat, kogeer kwandanyi.

31Ki bo kenyisiek tiptem ak somok Jeoahas ye kitau kolaitorani; ak kilaitoran arawek somok eng’ Jerusalem: ak kainetab kamennyi ko ki Hamutal cheptab Jeremia ne bo Libna.

32Ak kiyai yaitiet eng’ taitab Jehovah ko u tugul che kiga yai kwanisiekyik.

33Ak kirat Parao-neko inendet eng’ Ribla eng’ emetab Hamat, si malaitoran eng’ Jerusalem, ak king’at emet kogon aisurut, talentaisiek bogol che bo feda, ak talentait agenge ne bo tahabu.

34Ak kiyai Parao-neko Eliakim weritab Josia koek laitoriat kogeer Josia kwandanyi, ak kiwal kainennyi koek Jeoiakim: ago kiimut Jeoahas koisto, ak kinyo Misri, ak kinyo kome eng’ oloto.

35Ak kiigochi Jeoiakim feda ak tahabu Parao; ago king’at emet kogon fedaisiek ko u ng’atutietab Parao: kimage feda ak tahabu bik che bo emet, chi age tugul ko u ye kiging’at, si kogochi Parao-neko.

36Ki bo kenyisiek tiptem ak mut Jeoiakim ye kitau kolaitorani; ak kilaitoran kenyisiek taman ak agenge eng’ Jerusalem: ak kainetab kamennyi ko ki Sebida cheptab Pedaia ne bo Ruma.

37Ak kiyai yaitiet eng’ taitab Jehovah, ko u tugul che kiga yai kwanisiekyik.

← Chapter 22 Jump to: Chapter 24 →