2 Kings 25

Kalenjin Bible (BUKUIT NE TILIL)

← Chapter 24 Jump to:

1Ak eng’ kenyitab sogol ne bo laitornatennyi, eng’ arawetab taman, eng’ betutab taman ne bo arawanato, konyo Nebukadnesar laitoriatab Babulon, inendet ak lugennyi tugul, kobokyi Jerusalem, ak koteech kotokyigei nganaset; ak kiteech ichek irimoik koyiem.

2Koyiem anyun nganaset agoi kenyitab taman ak agenge ne bo laitoriat Sedekia.

3King’wanit rubet eng’ nganaset eng’ betutab sogol ne bo arawetab ang’wan, ne kima komi amitwogik che amei bik eng’ emet.

4Kobut anyun bik irimetab nganaset, ak kimwei murenik tugul che bo luget kemoi kobun oretab ormarichet ne kimi kwenutab inatusiek aeng’, ye kimi ole negite seremutab laitoriat: (kiga yiem Kaldeik nganaset:) ak kibun laitoriat oretab Araba.

5Ago kion lugetab Kaldeik laitoriat, ak kinam inendet eng’ warengosiekab Jeriko: ak kiiyesta lugennyi tugul kometo inendet.

6Komut anyun laitoriat, ak komut kwo ole mi laitoriatab Babulon eng’ Ribla; ak kiiruokyi inendet.

7Ak kibar werikab Sedekia kogeerei inendet, ak kobar konyekab Sedekia, ak korat inendet eng’ sirimwek, ak komut kwo Babulon.

8Ak kinyo Jerusalem Nebusaradan kiptaiyatab ribik, otwogindetab laitoriatab Babulon, eng’ arawetab mut, betutab tisab, ne ki kenyitab taman ak sogol ne bo laitoriat Nebukadnesar, laitoriatab Babulon:

9ak kibeel gotab Jehovah, ak gotab laitoriat; ak gorik tugul che bo Jerusalem, got age tugul ne o, ko kibeel eng’ mat.

10Ak kibut luget tugul ne bo Kaldeik ne kimi koboto kiptaiyatab ribik, irimosiekab Jerusalem komoswek tugul.

11Ak kiimut koluul Nebusaradan kiptaiyatab ribik, bik che kiga ng’et eng’ nganaset, ak che kiga chililso, che kiigochigei laitoriatab Babulon, ak bikab tuiyet che kiga ng’et.

12Ago kibagakta kiptaiyatab ribik, bik che kibananok mising’ eng’ emet, koek ribikab sabibuk ak koek semberik.

13Ak kitui Kaldeik tolochikab sugunonik che kimi gotab Jehovah, ak ng’echerok che kitebe ak nyanjet ne bo sugunwet che kimi gotab Jehovah, ak koib sugunonikab tuguchoto koba Babulon.

14Ak kiib terenik, ak kechigosiek che eechen, ak magasisiek che kitile ole lalei eng’ taisiek, ak kechigosiek, ak terenik tugul che bo sugunonik che kiboisie.

15Ak tuguk che kiibe mat, ak tabok; ak kiib kiptaiyatab ribik tuguk che kigiyae tahabu, ko tahabu, ak tuguk che kigiyae feda, ko feda.

16Tolochichoto aeng’, koboto nyanjanato agenge, ak ng’echerok che kitebe, che kiga yachi Solomon gotab Jehovah; ma kimuch kenai nyigisindab sugononikab tuguchuto tugul.

17Koindab tononetab toloita agenge ko ki kakwautik taman ak sisiit che bo eut, ak kimi metitab sugunwet baragunnyi; ak koindab tononetab metoto ko ki kakwautik somok che bo eut; koboto karik che regerotin ak logoek che kimi metoto komoswek tugul, che ki bo tugul sugunonik: ak kitinyei toloita ne bo aeng’ tuguk che u choto, koboto karik che regerotin.

18Ak kiimut kiptaiyatab ribik Seraia tisiindet ne o ak Sepania tisiindet ne bo aeng’ ak ribik somok che kiribei kurget:

19ak kiimut eng’ nganaset kiptaiyat ne kibou murenikab luget; ak bik mut eng’ ichek che kigeerei togetab laitoriat, che kimi nganaset; ak sirindet, kiptaiyatab luget, ne kiiyumi bikab emet; ak bik tamanwogik lo che bo emet, che kiginyorji nganaset.

20Ak kiimut Nebusaradan kiptaiyatab ribik bichoto, komutyi laitoriatab Babulon eng’ Ribla.

21Ak kibir laitoriatab Babulon bichoto ak kobar eng’ Ribla eng’ emetab Hamat. Kigimut anyun Juda keluul komanda eng’ emennyi.

22Kiyai Nebukadnesar Kedalia weritab Aikam weritab Sapan koek bounindetab bik che kiga ng’et eng’ emetab Juda, che kiga bagakta Nebukadnesar laitoriatab Babulon.

23Ak kingogas kiptainik tugul che bo lugosiek, icheget ak bikwak, kole kogoyai laitoriatab Babulon Gedalia koek bounindet, kobwa ole mi Gedalia eng’ Mispa, choto ko ki Ismael weritab Netania, ak Johanan weritab Karea, ak Seraia weritab Tanumet Netopatindet, ak Jaasania weritab Maakatindet, icheget ak bikwak.

24Ak kiiyosiechi ichek Gedalia ak koyosiechi bikwak, kolenji, Amoiywei amu otwogikab Kaldeik: omeny emet ak oot laitoriatatab Babulon, si komieit eng’ okwek.

25Ago kinyo eng’ arawetab tisap Ismael weritab Netania, weritab Elisama, ne bo keswekab gab laitoriat, ak kibwa ak bik taman, ak kobar Kedalia kome. Koboto Yahudik ak Kaldeik che kimi koboto inendet eng’ Mispa.

26Ak king’eetyo bik tugul che mengech ak che eechen, ak kiptainikab luget, ak kobwa Misri: amu kiiywei Kaldeik.

27Ak eng’ kenyitab sosom ak tisab ne bo luuletab Jeoiakin laitoriatab Juda, eng’ arawetab taman ak aeng’, eng’ betutab tiptem ak tisab ne bo arawanato, kotiach Ebil-merodak laitoriatab Babulon, eng’ kenyit ne kitau kolaitorane, Jeoiakin laitoriatab Juda komong’ eng’ korgoret;

28ak king’alalji inendet eng’ rirenetab ge, ak konde ng’echerennyi ne bo laitornatet kotororit eng’ che bo laitorinik che kimi Babulon koboto inendet.

29Ak kiwal ngoroikyik che bo korgoret, ak kiamis eng’ tainnyi kotugul eng’ betusiek tugul che bo sobennyi.

30Ak kiigochi laitoriat inendet kotugul kebebertanyi ne bo amitwogik, kiigochin betut age tugul kebeberta ne yamei, eng’ betusiek tugul che bo sobennyi.

← Chapter 24 Jump to: