2 Kings 20

Kalenjin Bible (BUKUIT NE TILIL)

← Chapter 19 Jump to: Chapter 21 →

1Kimian Hesekia eng’ betusiechoto kot ko negit kome. Ak kinyo ole mi inendet Isaia maotiot weritab Amos, ak kolenji inendet, Kamwa Jehovah ko u ni kole, Rarji ket bikab gong’ung’; amu imee, mesobe.

2Kowelel anyun togennyi kogeer inat, ak kosa Jehovah, kole,

3Ee Jehovah, asain ale, ibwat ole kiatepte eng’ imanda eng’ taing’ung’, ak eng’ muguleldo ne igesunotgei, ak ayai ne mie eng’ taing’ung’. Ak kirir Hesekia eng’ ng’wanindo.

4Ak ye kitomo koit Isaia kwenutab nganaset, konyonji inendet ng’olyotab Jehovah, kolenji,

5Weege kogeny, ak ilenji Hesekia bounindetab bikyuk, Kamwa Jehovah, Kamuktaindetab kwandang’ung’ Daudi, ko u ni kole, Kaagas saeng’ung’, kaageer beeguk bo kong’: keero, asoobin: itogostoi gotab Jehovah eng’ betutab somok.

6Ak atesyini betusieguk kenyisiek taman ak mut; ak asorun koboto nganasani eng’ eunekab laitoriatab Asuria; ak aribe nganasani agobo ane, ak agobo otwogindennyu Daudi.

7Ak kile Isaia, Oib makatiat ne bo logoekab mogoonik. Koib anyun ak konde ole kimi miando ne u ondiriet, ak kisob.

8Ak kilenji Hesekia Isaia, Nee kaborunet ne iboru kole isooba Jehovah, si atogosta gotab Jehovah eng’ betutab somok?

9Ak kimwa Isaia kole, Egu kii kaborunet ne bunu Jehovah, ne iborun kole yaei Jehovah kit ne kamwa: wa uruet tai tilutik taman, anan wa let tilutik taman?

10Ak kimwa Hesekia kole, Kit ne nyamnyum eng’ uruet kwo tai tilutik taman: achicha, ingoweek uruet kwo let tilutik taman:

11Ak kirirji maotiot Isaia Jehovah: ak kiweech uruet kwo let tilutik taman, eng’ che kiga korekto eng’ kit ne kirogendoe saisiek ne bo Ahas.

12Kiiyokyi Berodak-baladan weritab Baladan, laitoriatab Babulon, baronok ak kagochinet Hesekia eng’ betusiechoto: amu kiga kogas kole kigomian Hesekia.

13Ak kigas Hesekia ichek, ak koborji ichek got tugul ne bo tugukyik che bo kamanutiet ne o, feda, ak tahabu, ak nyamdutik, ak mwanik che bo kamanutiet ne o, ak gotab karikyik che bo luget, ak tuguk tugul che kimi ole mi konoraikyik: ma ng’et kiy eng’ gonnyi anan ko bounatennyi tugul ne ma iborji Hesekia ichek.

14Konyo anyun Isaia maotiot ole mi laitoriat Hesekia, ak kolenji, Kale nee bichu? Ak kobwanei oldang’ung’ kobunu ano? Ak kile Hesekia, Kabunu emet ne loo, kobunu Babulon.

15Ak kile inendet, Kagogeer nee eng’ gong’ung’? Ak kowol Hesekia kole, Kagogeer tuguk tugul che mi gonnyu: ma ng’et kiy eng’ konoraikyuk ne ma aborji.

16Ak kilenji Isaia Hesekia, Kas anyun ng’olyotab Jehovah.

17Keero, bwanei betusiek, che tun kiibei tuguk tugul che mi gong’ung’ koba Babulon, ak tuguk tugul che kigonor kwanisieguk agoi ra: mami kiy ne ng’etu, mwaei Jehovah.

18Ak komuti alak eng’ weriguk che mong’unenen, che isiche; ak koba koek ichek che kigimoch eng’ gotab laitoriatab Babulon.

19Kolenji anyun Hesekia Isaia, Mie ng’olyotab Jehovah ne kemwa. Komwa kogeny kole, Tos ma mie koteb ko u noto, katai komi kalyet ak imanda eng’ betusiekyuk?

20Ak boisionik che ng’etunotin che bo Hesekia, ak kimnatennyi tugul, ak ole kiyaita tamboiyot ak kererjet ak koib beek koba nganaset, ko ma sirotin eng’ bukuitab ateptab betusiek ne bo laitorinikab Juda?

21Ak kiru Hesekia koboto kwanisiekyik: ak kilaitoran Manase werinnyi kogeer inendet.

← Chapter 19 Jump to: Chapter 21 →