2 Kings 17

Kalenjin Bible (BUKUIT NE TILIL)

← Chapter 16 Jump to: Chapter 18 →

1Kitoi kolaitoran Hosea weritab Ela eng’ Samaria eng’ Israel, eng’ kenyitab taman ak aeng’ ne bo Ahas laitoriatab Juda, ak kilaitoran kenyisiek sogol.

2Ak kiyai yaitiet eng’ taitab Jehovah, ago ma ko u laitorinikab Israel che kiindoune inendet.

3Kitogos Salmaneser laitoriatab Asuria kobargei ak inendet; ak kiek Hosea otwogindennyi, ak kiipchi inendet kagochinoik.

4Ak kinai laitoriatab Asuria kole chaamsei Hosea; amu kiga koyokto bik koba oldab So laitoriatab Misri, ama igochi kagochinet laitoriatab Asuria, ko u ye kicham koyaei kenyit age tugul: eng’ noto anyun koger inendet laitoriatab Asuria, ak korat eng’ korgoret.

5Yeityo kotogos laitoriatab Asuria konyo kowendot eng’ emet komugul ak kitogosta kwo Samaria, ak kiyiem kotebi kenyisiek somok.

6Kinam laitoriatab Asuria Samaria, eng’ kenyitab sogol ne bo Hosea, ak komut Israel koba Asuria, ak kwo konde ichek Hala, ak Habor, eng’ ainetab Gosan, ak nganasokab Medek.

7Ak kiyaak ko u noto, amu kiga yachi lagokab Israel tengekto Jehovah Kamuktaindenywa, ne kiimutu ichek komong’ eng’ emetab Misri, komong’une eutab Parao laitoriatab Misri, ak kiga koiywei kanamonik,

8ak kobendate ng’atutikab bororiosiek, che kiga on Jehovah koba eng’ taitab lagokab Israel, ak eng’ taitab laitorinikab Israel che kiga yai ichek.

9Ak kiyai lagokab Israel eng’ ung’ot tuguk che ma lititen koyachi Jehovah Kamuktaindenywa, ak kiteekyigei komoswek che tororen eng’ nganasokwak tugul, koboch teekset ne koi ne bo ribik kot koit nganaset ne ng’otat.

10Ak kilumda tolochik ak Aserik eng’ tulwet age tugul ne koi, ak eng’ kelutab ketit age tugul ne tuon:

11ak kibeele yoto nyamdutik eng’ komoswek tugul che tororen, ko u ye kiyaei bororiosiek che kion Jehovah eng’ tainywa; ak koyai tuguk che yaachen kotach Jehovah konerech:

12ak kiot kanamonik, che kiga mwachi Jehovah, kolenji, Amat oyai kiito.

13Ago kibaorian Jehovah kora agobo Israel, ak agobo Juda, eng’ maotiot age tugul, ak keerindet age tugul kolenji, Oweege eng’ ortinwekwok che yaachen, ak orib ng’atutikyuk ak kayomisutikyuk, ko u Ng’atutiet tugul ne kiang’at kwanisiekwok, ak che kiayokwok eng’ eunekab otwogikyuk maotik.

14Ago ma cham kogas kora, ago kiiuuiit kaatwekwak ko u kaatwekab kwanisiekwak, che kima iyan Jehovah Kamuktaindenywa.

15Ak kiesio ng’atutikyik, ak kayomisennyi ne kiiyomisgei ak kwanisiekwak, ak baornatosiekyik che kibaorian agobo ichek; ak kiisub tuguk che bo buch, ak kiek buch, ak kiisub bororiosiek che kiga yiem ichek, che kiga ng’at Jehovah ichek agobo bichoto, kolenji, amat oyai ko u ye yaei icheget.

16Ak kimeto ng’atutik tugul che bo Jehovah Kamuktaindenywa, ak koyachigei kanamonik che kigitany, moek aeng’, ak kiyai Asera, ak kogutung’ji tuguk tugul che bo kipsengwet, ak koot Baal.

17Ak kiigoito werikwak ak tibikwak kobun mat, ak kiboisie ng’orset ak bonisosiek, ak koaldagei koyai yaitiet eng’ taitab Jehovah, kotach inendet konerech.

18Konerekyi anyun Jehovah Israel mising’, ak kong’eeto ichek eng’ tainnyi: ma ng’et agot agenge kobate oretab Juda inegei.

19Ma rib agine Juda ng’atutikab Jehovah Kamuktaindenywa, ago kibendate konetisiosiekab Israel che kiyai.

20Ak kiesio Jehovah keswek tugul che bo Israel, ak konyalil ichek, ak konde eunekab bik che kiluul ichek, agoi kong’eeto ichek koba eng’ tainnyi.

21Amu kibut Israel eng’ gotab Daudi; ak koyai Jeroboam weritab Nebat koek laitoriat: ak kiimaas Jeroboam Israel si maisub Jehovah, ak kogochi ichek koyai tengekto ne o.

22Ak kibendate lagokab Israel tengekwogik tugul che bo Jeroboam che kiyai; ma istoegei;

23agoi kong’eeto Jehovah Israel eng’ tainnyi, ko u ye kimwa eng’ otwogikyik tugul, maotik. Kimut anyun Israel eng’ emenywa koba emetab Asuria, agoi ra.

24Ak kiimut laitoriatab Asuria bik eng’ Babulon, ak Kuta, ak Aba, ak Hamat, ak Separbaim, ak konde ichek nganasokab Samaria kogeer lagokab Israel: ak kibunji ichek Samaria, ak komeny nganasokyik.

25Ak ma iywei Jehovah eng’ taunetab meng’enywa ne bo oloto: koyokyi anyun Jehovah ichek ng’etunyik, che kibar alak eng’ ichek.

26Komwachi anyun laitoriatab Asuria, kolenji, Maingen bororiosiechu koimutu inyo inde nganasokab Samaria kit ne u Kamuktaindetab emonoto: eng’ noto anyun, ko kogoyokyi ichek ng’etunyik, ak keero, barei ng’etunyik ichek, amu maingen kit ne u Kamuktaindetab emonoto.

27Kong’at anyun laitoriatab Asuria kole, Omut age eng’ tisiik che kiomutu eng’ oloto; ak ongoba komeny oloto; ak konet ichek agobo kit ne u Kamuktaindetab emonoto.

28Konyo anyun age eng’ tisiik che kiga kimut koba eng’ Samaria, ak konyo komeny Bet-el, ak konet ichek ole kanyol koiyweita Jehovah.

29Nganda kiga yai bororiet age tugul kanamonikwak, ak konde gorikab komoswek che tororen che kiga teech Samarik, bororiet age tugul eng’ nganasokwak che kimenyei.

30Ak kiyai bikab Babulon Sukot-benot, koyai bikab Kut Nergal, koyai Hamat Asima,

31ak kiyai Abik Nibas ak Tartak, ak kibeel Separbaik lagokwak kobeelji Adramelek ak Anamelek kanamonikab Separbaim.

32Koiywei ichek anyun Jehovah, ak kolewenjigei eng’ bichoto tisiik che bo komoswek che tororen, che kieng’jin tiseiywek eng’ gorikab komoswek che tororen.

33Kiiywei Jehovah ak koot kanamonikwak, ko u ye kiiyweitoi bororiosiek eng’ ole kigiuune ichek kobwa.

34Yaei kora ko u atebosiek che ki bo tai agoi ra; maiywei Jehovah, amaisubi konetisiosiekwak, anan ko kotigonutikwak, anan ng’atutiet, anan kayomiset, che king’at Jehovah lagokab Jakobo, ne kiguure inendet Israel;

35ne kiga koyomisgei Jehovah ak inendet, ak king’at ichek kolenji, Amoiywei kanamonik, anan ong’urukyi, anan oot, anan oeng’ji tiseiywot:

36ago oiywei Jehovah ne kiimutwak otogosu eng’ emetab Misri eng’ kimnatet ne o, eng’ eut ne chuulat, ak ong’urukyi inendet, ak oeng’ji tiseiywot:

37ak orib oyai eng’ betusiek tugul agoi, konetisiosiek ak kotigonutik, ak ng’atutiet, ak kayomiset, che kisirwak; amat oiywei kanamonik:

38amat outie kayomiset ne kigiyomisge kobotok; anan oiywei kanamonik:

39ago oiywei Jehovah Kamuktaindeng’wong’; si kosoruok inendet eng’ eunekab bunikwok tugul.

40Ago ma kas, kiyai ko u atebosiekwak che ki bo tai.

41Kiiywei anyun bororiosiechuto Jehovah, ak kootei kanamonikwak che kigiwai; kiyai ko u noto lagokwak, ak lagokab lagokwak, ko u ye kiyai kwanisiekwak, koyaei ko u noto agoi ra.

← Chapter 16 Jump to: Chapter 18 →