2 Kings 22

Kalenjin Bible (BUKUIT NE TILIL)

← Chapter 21 Jump to: Chapter 23 →

1Ki bo kenyisiek sisiit Josia ye kitau kolaitorani; ak kilaitoran kenyisiek sosom ak agenge eng’ Jerusalem: ak kainetab kamennyi ko ki Jedida cheptab Adaia ne bo Boskat.

2Ak kiyai ne mie eng’ taitab Jehovah, ak kowendote ortinwek tugul che bo Daudi kwandanyi, ama masta kwo tai anan ko katam.

3Ak eng’ kenyitab taman ak sisiit ne bo Josia, koyokto laitoriat Sapan weritab Asalia, weritab Mesulam, sirindet, kwo gotab Jehovah, kolenji,

4Togoste oldab Hilkia, tisiindet ne o, ilenji koiit fedaisiek che kigeib kobwa gotab Jehovah che kigoyum eng’ bik ribikab kurget:

5ak ingogochi kiboitinikyik che boisiei eng’ gotab Jehovah, che ribei: ak ingogochi kiboitinik che mi gotab Jehovah, si koteech ole kigobutok eng’ got;

6ak kogochi musogik che bo baoinik, ak teegik, ak bik che waei koik; ak koalei baoinik ak koik che waatin, che kiteege got ole kigobutok.

7Ago ma kiit fedaisiek che kiga kigochi bichoto; amu kiboisiei eng’ imanda.

8Ak kilenji Hilkia tisiindet ne o Sapan sirindet, Koanyoru bukuitab Ng’atutik eng’ gotab Jehovah. Ak kiigochi Hilkia Sapan bukuinoto, ak kisoman.

9Ak kinyo Sapan sirindet oldab laitoriat, ak koipchi laitoriat ng’olyot kogeny, ak kole, Kogogesta otwogiguk fedaisiek che kimi got, ak kogochi kiboitinik che ribei gotab Jehovah.

10Ak kimwachi Sapan sirindet laitoriat, kolenji, Kagona Hilkia tisiindet bukuit. Ak kisoman Sapan eng’ taitab laitoriat.

11Ak kingogas laitoriat ng’alekab bukuitab Ng’atutik, kogerer ngoroikyik.

12Ak king’at laitoriat Hilkia tisiindet, ak Aikam weritab Sapan, ak Akbor weritab Mikaia, koboto Sapan sirindet, ak Asaia otwogindetab laitoriat, kolenji,

13Oba, oteebwa eng’ Jehovah, ak agobo bik, ak agobo Juda komugul, agobo ng’alekab bukuini kaginyor: amu eechen neregekab Jehovah che laldos agobo achek, amu ma kas it kwanisiekyok ng’alekab bukuini, koyai ko u tugul che kigisir agobo achek.

14Koba anyun Hilkia tisiindet, ak Aikam, koboto Akbor, ak Sapan, ak Asaia, oldab Hulda ne maotiot, osotiotab Salum weritab Tikba, weritab Haras, ne ribei ngoroik; (kimenyei kwonyoto Jerusalem kebebertab aeng’;) ak king’alal ichek koboto inendet.

15Ak kimwachi ichek kolenji, Kamwa Jehovah, Kamuktaindetab Israel, ko u ni kole, Olenji chicho kaiyokwok obwa oldanyua,

16Kamwa Jehovah ko u ni kole, Keero, aibu yaitiet konyo koroni, ak konyonji bik che menyei koronito, ee, ng’alek tugul che bo bukuinoto kasomani laitoriatab Juda:

17amu kimetaa, ak kobeelji nyamdutik cheptalelisiek, si kotacha anerech eng’ boisionikwak tugul che bo eunekwak; eng’ noto anyun, kolaldos neregekyuk agobo koroni, ama kimisi.

18Ago omwachini laitoriatab Juda, ne kaiyokwok obwa oteepse Jehovah, olenjini, Kale Jehovah, Kamuktaindetab Israel: agobo ng’alecho kegas,

19amu kang’arng’arit muguleldang’ung’, ak iming’inge eng’ taitab Jehovah, ye kangigas kit ne kiamwa agobo koroni, ak agobo bik che menyei koronito, ale egu karaita ak chubet, ak amu kegerer ngoroiguk ak irir eng’ tainnyu; kaagasin agane, mwaei Jehovah.

20Ara anyun, keero, ayumin iwe ole mi kwanisieguk, ak kiyumin iwe ketering’ung’ eng’ kalyet, ama keerei konyeguk yaitionoto tugul aipchini koroni. Ak kiipchi ng’olyot laitoriat kogeny.

← Chapter 21 Jump to: Chapter 23 →