Revelation 14

Kurukh (पुना गच्छरना NT (BSI))

← Chapter 13 Jump to: Chapter 15 →

1इदही ख़ॊख़ा ऎन ईरकन ख़ने, ऎरा, भेंडो ख़द्द मसीस सीयॊन परता नू इज'आ लगियस, अरा आसी गने ओन लाक चौवालीस हजार आलर रहचर, नॆख'आ कपड़े नू आसी नामे अरा तम्‍बासी नामे लिख्रकी रहचा।

2आ बारी ऎन मेर्ख़ा ती ओन्टा सड़न मेंजकन। आद कोड़हे बग्गे अम्मु बाहना ही ख़रख़ना अरा जॊर मुर्रना ही ख़रख़ना लेक्‍खा रहचा। अरा ऎन मेंजका सड़ा तमुर्रा अस्सुर तम्है तमुर्रन अस्‍सना ती बरना ख़रखना लेक्‍खा रहचा।

3अरा आर बॆल-गदिया ही मुन्दहारे अरा चरियो उज्‍जना आलॊ ही मुन्दहारे अरा सेयान आलर ही मुन्दहारे ओन्टा पुना डंडी पाड़ा लगियर। अरा ख़ॆख़ेल ती नाड़रका ओन लाक चौवालीस हजार आलारिन अम्‍बर नॆ हूँ आ डंडीन सिख्र'आ पोल्‍ला लगियर।

4ईर मुक्कर ती तमन सोतरा मल मंजकर हिकनर, अरा डिंडर हिकनर। ईर भेंडो ख़द्द मसीस एसन एसन कालदस असन असन आसी गने गुड़ियार'ऊ हिकनर। ईर धर्मेस गे अरा भेंडो ख़द्द मसीस गे आलर ती नाड़रका पहिल ख़ंजपा लेक्खा र'अनर।

5अरा ईर ही बई ती कहियों ठकवा कत्‍था मल उरखकी रहचा। ईर बिगर बदी ही हिकनर।

6इदही ख़ॊख़ा ऎन अउर ओन्टा मेर्ख़ा पैकासिन मझी मेर्ख़ा नू उढियारना ईरकन। आसी गुसन ख़ॆख़ेल नू र'ऊ उर्मी राजी अरा गोतोर अरा भखा अरा आल खोंड़हा ता आलर गे मेन्त'आ गे जनमजुग ही दौ कत्‍था रहचा।

7अरा आस जॊरसरिया सड़ा ती एन्ने बाचस, “धर्मेसिन एल्‍चा, अरा आसिन महबा नना, एन्‍देरगेका आसी नेंवई नन्ना ही बेड़ा अंड़सकी र'ई। अरा नॆ मेर्ख़न अरा ख़ॆख़लन अरा समुदरन अरा अम्मु ही पझरा गुट्ठिन कमचस, आसिन महबा नना।”

8फेन अउर ओन्टा मेर्ख़ा पैकस पहिल मेर्ख़ा पैकासी ख़ॊख़ा ख़ॊख़ा बरचस ती एन्ने बाचस, “बिड़्रिया केरा! आ कोहाँ नगरे बाबुलॊन बिड़्रिया केरा! एकाद तंग्है पेहरन ही सोतरा नलख ही फुली अरखिन उर्मी राजी ता आलारिन ओन्ताचकी र'ई।”

9फेन अउरिम ओन्टा मेर्ख़ा पैकस पहिल दुई मेर्ख़ा पैकर ही ख़ॊख़ा ख़ॊख़ा बरचस ती जॊरसरिया सड़ा ती एन्ने बाचस, “नीकईम आ मेक्‍खो अरा अदही मूर्तिन महबा नन्दस ती तंग्‍है कपड़े मलता ख़ेक्खा नू आ मेक्‍खो ही मरकन हो'अदस होले,

10धर्मेस आसी मइय्याँ कोड़हे कैर मनोस ती बग्गे दंडे चि'ओस। अरा आस नेम्‍हा मेर्ख़ा पैकर ही मुन्दहारे अरा भेंडो ख़द्द मसीसी मुन्दहारे चिच्‍ची अरा गन्धक ही डाहरनन भोग'ओस।

11अरा आर ही डाहरना ही कुहड़ा हुल्‍लो ती हुल्‍लो गूटी मइय्याँ चो'अना बारी र'ई। अरा नॆ आ मेक्‍खो अरा अदही मूर्ती ही महबा नन्नर, अरा नॆ अदही नामे ही मरकन हो'अनर, आर गे उल्‍ला अरा माख़ा सल्‍ल मल ख़क्ख्र'ओ।”

12इदही मने ईद हिके का धर्मेसी पॆसका गुट्ठिन पॆस्रका ती येसुसी मइय्याँ ता पत्त'अना नू ठिमठिमने र'ऊ नेम्हा आलर खतिर गने सहना र'ई।

13फेन ऎन मेर्ख़ा ती ओन्टा सड़ा एन्ने ब'अना मेंजकन, “इदन लिख'आ चि'आ, नॆ उर्बस नू खे'अनर आर अक्‍कु ती आसीस ख़क्‍खू र'अनर।” नेम्हा बॊलतस बाचस, “हाँ, आर तम्है अर्ज'अना ती ख़न्न ऎख़ोर, एन्‍देरगेका धर्मेस मानिम नू आर ही दौ नलख गुट्ठी गे इनाम चि'ओस।”

14इदही ख़ॊख़ा ऎन ईरकन ख़ने, ऎरा, ओन्टा पंडरु बदाली अरा आ बदाली नू मनवा ख़द्दस लेक्‍खा ओर्तोस उक्का ईरकन। आसी कुक्‍कु नू सोना ही मुकुट अरा आसी ख़ेक्खा नू धारे ताँतर रहचा।

15फेन अउर ओन्टा मेर्ख़ा पैकस मन्दिर ती उरखस ती नॆ बदाली नू उक्‍काचस आसिन जॊरसरिया सड़ा ती चिच्चियारनुम बाचस, “ख़ॆख़ेल ही ख़ोयना पंज ख़च्‍चकी र'ई, ख़ोयना ही बेड़ा अंड़सकी र'ई, औंगे निंग्‍है ताँतरन हो'अरकी ख़ोया।”

16औंगे नॆ बदाली नू उक्‍काचस आस तंग्‍है ताँतरन ख़ॆख़ेल मइय्याँ लमा बाचस, ख़ने ख़ॆख़ेल ख़ोयरा केरा।

17फेन अउर ओन्टा मेर्ख़ा पैकस मेर्ख़ा ता मन्दिर ती उरखस। आस हूँ ओन्टा धारे ताँतर धरचका रहचस।

18अरा अउर ओन्टा मेर्ख़ा पैकस गोड़हा ती उरखस। आस गे चिच्‍ची मइय्याँ अदिया रहचा। आस नॆ धारे ताँतरन धरचका रहचस आसिन जॊरसरिया सड़ा ती बाचस, “ख़ॆख़ेल ही अंगुर ख़ंजपा पंज ख़च्चका ती ख़ोयना गे सपड़ारकी र'ई। औंगे निंग्‍है धारे ताँतरन हो'अरकी ख़ॆख़ेल ही अंगुर ख़ंजपा ही झोता गुट्ठिन खंडा चि'आ।”

19ख़ने आ मेर्खा पैकस तंग्‍है ताँतरन ख़ॆख़ेल मइय्याँ लमा बाचस ती ख़ॆख़ेल ही अंगुर ख़ंजपा ही झोता गुट्ठिन खंडियस ती धर्मेसी कोड़हे खींस ही अंगुर रासी ही कोहाँ कुंड़ा नू सज्‍जस चिच्‍चस।

20अबड़ा अंगुर नगरे ही बहरी ता रासी कुंड़ा नू पीख़तारा, अरा कुंड़ा ही बहरी बहड़ी लेक्‍खा ख़ॆंस उरखा ती घोड़ो गुट्ठी ही लगाम गूटी मेच्छा अंड़सिया ती तीन सौ किलो मीट्टर गेच्छा गूटी बाहचा।

← Chapter 13 Jump to: Chapter 15 →