Revelation 16

Kurukh (पुना गच्छरना NT (BSI))

← Chapter 15 Jump to: Chapter 17 →

1इदही ख़ॊख़ा ऎन मन्दिर ती ओन्टा जॊरसरिया सड़ा अबड़ा सतियो मेर्ख़ा पैकारिन एन्ने ब'अना मेंजकन, “कला, धर्मेसी खींस ही सतियो डुबहन ख़ॆख़ेल नू तुन्दा चि'आ।”

2ख़ने पहिल मेर्ख़ा पैकस केरस ती तंग्‍है डुबहन ख़ॆख़ेल नू तुन्दियस चिच्‍चस। ख़ने नॆख'आ मइय्याँ मेक्‍खो ही मरका लक्‍की रहचा अरा नॆ अदही मूर्तिन ऒड़ नंजर आर ही मइय्याँ घिनघिना नुंजना फूड़ी गुट्ठी उरखा।

3फेन दुसर मेर्ख़ा पैकस तंग्‍है डुबहन समुदर नू तुन्दियस चिच्‍चस। ख़ने समुदर केच्‍कर ही ख़ॆंस लेक्‍खा मंजा केरा, अरा समुदर ता उर्मी उज्‍जना आलॊ केच्‍चा केरा।

4फेन तिसर मेर्ख़ा पैकस तंग्‍है डुबहन ख़ाड़ गुट्ठी नू अरा अम्मु ही पझरा गुट्ठी नू तुन्दिसय चिच्चस। ख़ने अबड़ा ख़ॆंसो मंजा केरा।

5फेन ऎन ओर्मा अम्मु ही मइय्याँ अदिया उइय्यू मेर्ख़ा पैकासिन एन्ने ब'अना मेंजकन, “अना नेम्हाय, अरा नॆ र'अदय, अरा नॆ रहचकय, नीन उजगो हिकदय, एन्देरगेका नीन एन्ने लेक्खा इबड़ा नेंवई गुट्ठिन तइय्कादय।

6ईर निंग्है नेम्‍हा आलर अरा धर्मेसी कत्था तिंगुर ही ख़ॆंसन बाहताचर, औंगे नीन आरिन ख़ॆंसन ओन्ताचकय। आर तम्‍हैं नंजका ही डंडे भोग'आ लगनर।”

7फेन ऎन गोड़हा ती एन्ने आनाकिर्त'अनन मेंजकन, “हाँ, अना उर्मी ती सवंगिय धर्मे उर्बायो, निंग्‍है नेंवई गुट्ठी मानी अरा उजगो र'ई।”

8फेन चौथा मेर्ख़ा पैकस तंग्‍है डुबहन बीड़ी नू तुन्दियस चिच्‍चस। ख़ने बीड़ी गे आलारिन चिच्ची ती ओलत'आ चि'आ गे अदिया चीरा।

9ख़ने आलर कोड़हे बिड़ना झोला ती झोलरर केरर। अन्नु हूँ आर इबड़ा सस्ती गुट्ठी ही मइय्याँ अदिया उइय्यू धर्मेसी नामेन हींड़चर, अरा आर जियन मल किर्ताचर अरा आसिन महबा मल नंजर।

10फेन पाँचवा मेर्ख़ा पैकस तंग्‍है डुबहन आ मेक्‍खो ही बॆल-गदिया नू तुन्दियस चिच्‍चस। ख़ने अदही राजी ऊख़ा मंजा केरा, अरा आलर डाहरना ती तम्है ततख़न चबर'आ हेलरर।

11अरा तम्‍है डाहरना गुट्ठी अरा फूड़ी गुट्ठी ही चड्डे मेर्ख़ा ता धर्मेसिन हींड़चर, अरा तम्‍है नंजका मलदौ नलख गुट्ठिन अम्बना ती धर्मेस तरा मल किर्रियर।

12फेन छठवा मेर्ख़ा पैकस तंग्‍है डुबहन युफराटॆस कोहाँ ख़ाड़ नू तुन्दियस चिच्‍चस। ख़ने पुरुब तरती बरना बॆलर गे डहरे सपड़ारत'आ गे अइय्या ता अम्मु बत्तिया केरा।

13फेन ऎन आ डेना र'ऊ नेर्रे ही बई ती, अरा आ मेक्‍खो ही बई ती, अरा ठकवा धर्मेसी कत्था तिंगुसी बई ती मूंख़ा लेक्‍खा तीन गोटा मलदौ बॊलतन उरखना ईरकन।

14इबड़ा अजगुत नलख गुट्ठी ही चिन्‍हा ईद'ऊ नाद ही बॊलता गुट्ठी हवे। इबड़ा उर्मी ती सवंगिय धर्मेसी कोहाँ उल्‍ला नू मन्ना लड़ई गे सौंसे ख़ॆख़ेल ता बॆलारिन ख़ॊजा गे क'ई।

15उर्बस ब'अदस, “ऎरा, ऎन ख़लबर लेक्‍खा आचका बरदन। नॆ एज्रका र'अदस, अरा तंग्है किचरी कुट्ठिन अत्तका र'अदस का लंगड़ा अम्‍बोस कुद्दा, अरा आलर आसिन लंगड़ा अम्‍बोर ऎरा, आस आसीस ख़क्ख'ऊ र'अदस।”

16फेन अबड़ा मलदौ बॊलता बॆलारिन इब्रानी भखा नू हरमगेदोन बारना अड्डा नू ख़ॊंड़चा।

17फेन सातवाँ मेर्ख़ा पैकस तंग्‍है डुबहन ताका नू तुन्दियस चिच्‍चस। ख़ने मन्दिर नू ती बॆल-गदिया ती ओन्टा जॊरसरिया गड्डी सड़ा एन्ने बाचा, “मंजा केरा।”

18तहाँ लवका लौकारना गुट्ठी, अरा ख़रख़ना गुट्ठी, मुर्रना चाड़ना गुट्ठी अरा कोहाँ ख़ॆख़ेल नुक्रना मंजा। इकला ख़ॆख़ेल मइय्याँ आलर ही गढ़्रना मंजा अउला ती एन्ने ख़ॆख़ेल नुक्रना इकला हूँ मल मंजकी रहचा। ई लेक्खा ई ख़ॆख़ेल नुक्रना नगदे कोहाँ रहचा।

19अरा कोहाँ नगरे बाबुलॊन तीन भाग मंजा केरा, अरा राजी गुट्ठी ही नगरे गुट्ठी खत्तरा केरा। अरा कोहाँ बाबुलॊन नगरे मइय्याँ ता धर्मेसी कोड़हे कैर ती आस अदगे नगदे दंडे चि'आ गे धर्मेसी मुन्दहारे सुरता नन्तारा केरा।

20अरा उर्मी टापू गुट्ठी गुच्‍छरा केरा, अरा परता गुट्ठी छप मंजा केरा।

21अरा मेर्ख़ा ती आलर ही मइय्याँ कोहाँ आली खत्रा। ओन्टा ओन्टा आली पखना मलागूटी पचास किलो ओत्था रहचा। अरा आ आली ही सस्ती ही चड्डे आलर धर्मेसिन हींड़चर, एन्‍देरगेका ई सस्ती नगदे कोहाँ रहचा।

← Chapter 15 Jump to: Chapter 17 →