Revelation 17

Kurukh (पुना गच्छरना NT (BSI))

← Chapter 16 Jump to: Chapter 18 →

1फेन एका सतियो मेर्ख़ा पैकर गुसन सात गोटा सोना ही डुबहा रहचा, अबड़र ती ओर्तोस बरचस ती एंगन एन्ने बाचस, “बरा, ऎन बग्गे अम्मु गुट्ठी नू उक्‍का र'अना आ कोहाँ बेस्वा गे ख़क्ख्रना डंडेन ऎद'ओन चि'ओन।

2ख़ॆख़ेल ता बॆलर अदही गने पेहरन ही सोतरा नलख नंजर, अरा ख़ॆख़ेल ता र'ऊ उर्मी आलर अदही पेहरन ही सोतरा नलख ही अरखी ती उंखियर केरर।”

3इदही ख़ॊख़ा नेम्हा बॊलतस एंगन तंग्है आकुस नू नंजस, अरा आ मेर्ख़ा पैकस एंगन टोड़ंग तरा होच्‍चस। अरा असन ऎन ओन्टा आलिन ओन्टा ख़ॆंसो मेक्‍खो नू उक्‍का ईरकन। आ मेक्‍खो ही गोट्टा मॆद नू धर्मेसी हींड़ना कत्‍था गुट्ठी लिख्रकी रहचा। अरा अदही सात गोटा कुक्कु अरा दस गोटा मरग रहचा।

4अरा आ आली भेटांगो ऎख़र'आ अरा ख़ॆंसो किचरी कूरकी रहचा। अरा आद सोना ती अरा मड़ी पखना गुट्ठी ती अरा मोती गुट्ठी ती सिंगरारकी रहचा। अरा आद तंग्है ख़ेक्खा नू ओन्टा सोना ही डुबहा धरचकी रहचा। आ डुबहा घिनघिना नलख गुट्ठी ती अरा अदही पेहरन ही सोतरा नलख ही मलदौ गुट्ठी ती निंदकी रहचा।

5अरा अदही कपड़े नू ओन्टा गम ही नामे लिख्रकी रहचा, “कोहाँ बाबुलॊन! बेस्वार अरा ख़ॆख़ेल ता उर्मी घिनघिना नलख गुट्ठी ही तंगियो।”

6अरा आ आली नेम्हा आलर ही ख़ॆंस ती अरा येसुसी गोवाह आलर ही ख़ॆंस ती उंखका ईरकन। अरा ऎन अदिन ईरकन ख़ने, कोड़हे अनचकरकन केरकन।

7ख़ने आ मेर्ख़ा पैकस एंगन बाचस, “नीन एन्‍देरगे अनचकरकय? ई आली ही अरा ईद उक्‍का र'अना आ सात गोटा कुक्कु अरा दस गोटा मरग र'अना मेक्‍खो ही गम आबोन तेंग्गोन।

8एका मेक्‍खोन नीन ईरका र'अदय, आद गा मुन्द रहचा, लिकिन अक्‍कु मल्‍ला। अन्नु हूँ आद भयभयान ख़ोड़ख़ा गड्डी ती मइय्याँ अरगू र'ई, फेन आद नठार'ओ कालो। अरा ख़ॆख़ेल ता र'ऊ आलर, नॆख'आ नामे ख़ॆख़ेल गढ़्रना ही बेड़ा ती उज्‍जना ही पुथी नू नामे मल लिख्रकी र'ई, आर ई मेक्‍खो ही दसन ऎरोर ती हैकट मनोर, एन्देरगेका आद मुन्द रहचा, अरा अक्कु मलकी, अरा अउरिम बर'ओ।

9इदिन बुझ्र'आ गे लूर र'ऊ जिया ही चाड़ र'ई। अबड़ा सतियो कुक्‍कु सात गोटा परता हवे, एकइय्या आ आली उक्‍की र'ई। अरा अबड़ा सतियो बॆलर हूँ हवे।

10अबड़र नू ती पाँच बॆलर नठार ख़च्चिका र'अनर, अरा ओर्तोस अक्‍कु र'अस, अरा ओर्तोस अक्‍कु गूटी अरगस बर'आ। अरा आस बरदस ख़ने, जोक्‍क बेड़ा लेका राजी ननोस।

11अरा मुन्द रहचा अरा अक्कु मलकी आ मेक्‍खो दिम आठवा बॆलस हवे। अन्नु हूँ आस अबड़ा सतियो बॆलर ती ओर्तोस हिकदस, अरा आस नठार'ओस।

12एका दस गोटा मरग आबोन नीन ईरकय, अबड़ा दस बॆलर हवे। आर अक्‍कु गूटी राजी मल ख़क्‍खियर। लिकिन आर आ मेक्खो गने ओन घड़ी गे बॆलर ही लेक्‍खा अदिया ख़क्‍खोर।

13इबड़ा ओर्मा बॆलर ओन्टा सोच नू र'ओर, अरा तम्‍है सवंग अरा अदिया आबोन आ मेक्‍खो गे चि'ओर।

14इबड़र भेंडो ख़द्द मसीस गने लड़ई ननोर। लिकिन भेंडो ख़द्द मसीस अरा आसी गने गुड़ियार'उर आरिन जित'ओर। एन्‍देरगेका भेंडो ख़द्द मसीस उर्बर ही उर्बस अरा बॆलर ही बॆलस हिकदस। अरा आसी गने गुड़ियार'उर धर्मेस ती मॆख़्रका अरा चज्रका अरा पत्त'ऊ आलर हिकनर।”

15फेन आस एंगन बाचस, “एका अम्मु गुट्ठी नू आ बेस्वा उक्‍का ईरकय, अबड़ा आल खोंड़हा गुट्ठी, अरा गोंहड़ा गुट्ठी, अरा राजी गुट्ठी, अरा भखा गुट्ठी हवे।

16अरा आ मेक्‍खो अरा एका दस मरग आबोन नीन ईरकय, अबड़ा आ बेस्वन ख़ाँड़'ओ। अरा अबड़ा अदिन लंगड़ी ननो ती लज्जे मॊख़त'ओ। अरा अबड़ा अदही अहड़न मॊख़ो अरा अदिन चिच्‍ची नू बस्‍सो चि'ओ।

17एन्देरगेका धर्मेस तंग्है मनेन पूरा नना गे ई सोच आबोन आर ही जिया नू चिच्चस। औंगेम आर ओर्मर तम्है राजी नन्ना ही अदियन आ मेक्खो गे चि'आ गे मन्चर। धर्मेसी कत्‍था गुट्ठी पूरा मन्ना गूटी आर ही गच्छरना एन्ने र'ओ।

18एका आलिन नीन ईरकय, आद कोहाँ नगरे हवे, एकाद ख़ॆख़ेल ता बॆलर मइय्याँ राजी ननी।”

← Chapter 16 Jump to: Chapter 18 →