Revelation 9

Kurukh (पुना गच्छरना NT (BSI))

← Chapter 8 Jump to: Chapter 10 →

1पांचवाँ मेर्ख़ा पैकस पेंड़हे ऊरचस ख़ने, ऎन ओन्टा बीनकोन मेर्ख़ा ती ख़ॆख़ेल नू खत्रना ईरकन, अरा आस गे भयभयान ख़ोड़ख़ा गड्डी ही बली ही कुची चीरा।

2अरा आस आ भयभयान ख़ोड़ख़ा गड्डी ही बलिन तिसकस ख़ने, अइय्या ती कोहाँ भठा ती चो'अना कुहड़ा लेक्‍खा कुहड़ा चॊचा। अरा ख़ोड़ख़ा गड्डी ता कुहड़ा ती बीड़ी अरा ताका ऊख़ा मंजा केरा।

3अरा आ कुहड़ा ती बोक्‍खो गुट्ठी उरखा ती ख़ॆख़ेल मइय्याँ बरचा। अरा अबड़ा गे ख़ॆख़ेल ता बिछी गुट्ठी ही सवंग लेक्‍खा सवंग चीतारा।

4अरा अबड़ा गे एन्ने बातारा का, ख़ॆख़ेल ता लट्टिन महले एकअम हरियर ख़ोप्पन महले एकअम मन्नन अमके नठाब'आ, लिकिन नॆख'आ कपड़े नू धर्मेसी मरका मल्‍ला अबड़ा आलारिन लेका नठाब'आ।

5अबड़ा बोक्‍खो गे आलारिन पिटा ख़च्‍चा गे मला, लिकिन पाँच महिना गूटी आरिन डाहर'आ गे अदिया चीतारा। बिछी दग'ई ख़ने आलर गे नुंजना मनी अदही लेक्खा अबड़ा बोक्खो परमना ती बरना नुंजना रहचा।

6अरा अबड़ा उल्ला नू आलर खे'आ बेद्दोर, लिकिन अदन मल ख़क्‍खोर, अरा खे'आ गे चीबाख़ार'ओर, लिकिन खे'अना आर ती बोंगो।

7अबड़ा बोक्‍खो ही ऎथ्रना लड़ाई गे सपड़ाचका घोड़ो लेक्‍खा ईथ्र'ई। अरा अबड़ा ही कुक्कु गुट्ठी नू सोना ही मुकुट बेसे इन्द्रिइम रहचा, अरा अबड़ा ही मुंही आलर ही मुंही लेक्‍खा रहचा।

8अरा अबड़ा ही कुक्कु ता चुट्टी मुक्‍कर ही कुक्कु ता चुट्टी लेक्‍खा रहचा, अरा अबड़ा ही पल्‍ल लकड़ा ही पल्ल लेक्‍खा रहचा।

9अरा अबड़ा गे पन्ना ही झिलम लेक्खा झिलम रहचा। अरा अबड़ा ही डेना ही ख़रख़ना लड़ाई गे बग्‍गे घोड़ो पुन्दका रन्‍थ गुट्ठी ही जॊर बोंगना ही ख़रख़ना लेक्‍खा रहचा।

10अरा अबड़ा ही ख़ॊला अरा टुटी बिछी ही लेक्‍खा रहचा। अरा अबड़ा ही ख़ॊला नू आलारिन पाँच महिना गूटी दुक्‍खे सारत'अना ही सवंग रहचा।

11भयभयान ख़ोड़ख़ा गड्डी ही मेर्ख़ा पैकस दिम अबड़ा ही मइय्याँ बॆलस रहचस। आसी नामे इब्रानी भखा नू अबद्दॊन अरा युनानी भखा नू अप्‍पोल्लयॊन हवे।

12पहिल सस्ती कट्टिया केरा। ऎरा, इबड़ा ही ख़ॊख़ा अउर नन्ना दुई गोट सस्ती मन्ना र'ई।

13फेन छैवाँ मेर्ख़ा पैकस पेंड़हे ऊरचस ख़ने, सोना ही गोड़हा एकदा धर्मेसी ही मुन्दहारे र'ई अदही चार मरग ती बरचका ओन्टा सड़न मेंजकन।

14पेंड़हे धरचका छैवाँ मेर्ख़ा पैकासिन आ सड़ा एन्ने बाचा का, “एका चरियो मेर्ख़ा पैकर युफराटॆस कोहाँ ख़ाड़ गुसन हॆंरकानर आरिन कोल्‍ला चि'आ।”

15ख़ने अबड़ा चरियो मेर्ख़ा पैकर कोल्‍लतारर केरर। आर ई बेड़ा गेम, अरा ई उल्‍ला गेम, अरा ई महिना गेम, अरा ई चाँन गेम आलर ही तीन ती ओन भागन पिटा गे सपड़तारका रहचर।

16अरा ऎन घोड़ो फउदर ही गनतिन मेंजकन। आद बीस करोड़ रहचा।

17अरा ऎन देखार नू घोड़ो गुट्ठिन अरा अइय्या अरगुरिन ईरकन। अबड़र ही झिलम गुट्ठी चिच्‍ची ख़ॆंसो रंग लेक्‍खा अरा मोख़ारो गने भेटांगो ऎख़र'आ रंग लेक्‍खा अरा गन्धक ही बाल ऎख़र'आ रंग लेक्‍खा रहचा। अरा अबड़ा घोड़ो ही कुक्‍कु लकड़ा गुट्ठी ही कुक्कु लेक्‍खा रहचा, अरा अबड़ा ही बई गुट्ठी ती चिच्‍ची अरा कुहड़ा अरा गन्धक उरखा लगिया।

18अबड़ा ही बई ती उरखका इबड़ा तिनियों खिलपत चिच्‍ची अरा कुहड़ा अरा गन्धक ती आलर ही तीन ती ओन भाग पिटतारर।

19अबड़ा घोड़ो ही सवंग गा अबड़ा ही बई नू अरा ख़ॊला नू रहचा। अबड़ा ही ख़ॊला गा कुक्कु र'अना नेर्रे गुट्ठी ही लेक्‍खा रहचा, अरा अबड़ा आलर गे नेर्रे कुक्कु गुट्ठी तिम खिलपत चि'आ लगिया।

20इबड़ा सस्ती ती मल पिटतारर, अबड़ा बछ्रका आलर अक्कु गूटी हूँ तम्‍है पाप गुट्ठी ती जियन मल किर्ताचर। आर नाद गुट्ठिन अरा मूर्ती गुट्ठिन ऒड़ लग्गनन मल अम्बियर। आर ऎरा पोलना महले मेना पोलना महले ऎका पोलना सोना अरा चाँदी अरा पितल अरा पखना अरा कंक गुट्ठी ती कमचका मूर्ती गुट्ठिन लेका ऒड़ नंजर।

21आर तम्है आल पिटना पाप गुट्ठी ती महले तम्है गुरुमना पाप गुट्ठी ती महले तम्है पेहरन ही सोतरा नलख ती महले तम्है खड़ना नुड़ना गुट्ठी ती जियन मल किर्ताचर।

← Chapter 8 Jump to: Chapter 10 →