Revelation 4

Kurukh (पुना गच्छरना NT (BSI))

← Chapter 3 Jump to: Chapter 5 →

1इबड़ा कत्था ही ख़ॊख़ा ऎन मेर्ख़ा नू ओन्टा तिसगरका बलिन ईरकन। अरा ऎन मुन्द एंग्है गने कछनख्रका मेंजका पेंड़हे ही ख़रख़ना लेक्‍खा सड़न मेंजकन। आद बाचा, “मइय्याँ इसन बरा। इबड़ा कत्था ही ख़ॊख़ा एन्‍देर एन्देर मन्ना र'ई, अबड़न ऎन निंगन ऎद'ओन।”

2आ बारिम ऎन नेम्‍हा बॊलतासी आकुस नू मंजकन। ऎरा, मेर्ख़ा नू ओन्टा बॆल-गदिया उइरकी रहचा, अरा आ बॆल-गदिया नू ओर्तस उक्‍का रहचस।

3अरा अइय्या नॆ उक्‍का रहचस आस यसब अरा मानिक पखना ही बिलचना लेक्‍खा ऎथ्रदस। अरा बॆल-गदिया ही ओनबेंड़र'आ मरकत ती कमचका लेक्‍खा ओन्टा सोखाबोरा रहचा।

4आ बॆल-गदिया ही चरियो तरा चौबीस गोट बॆल-गदिया रहचा। अरा इबड़ा बॆल-गदिया नू चौबीस सेयान आलर पंडरू किचरी अत्तका ती उक्‍का रहचर। अरा आर ही कुक्‍कु नू सोना ही मुकुट रहचा।

5अरा अबड़ा बॆल-गदिया ती लवका लौकारना गुट्ठी अरा ख़रख़ना गुट्ठी अरा मुर्री चाड़ी गुट्ठी बर'आलिया। अरा बॆल-गदिया ही मुन्दहारे चिच्ची ही सात गोट बिल्‍ली लघ्र'आ लगिया, इबड़ा दिम धर्मेसी सात गोट बॊलता हवे।

6अरा बॆल-गदिया ही मुन्दहारे काँच ही समुदर लेक्खा ओन्टा रहचा, एकदा बिल्लौर लेक्खा फटफट ने रहचा। बॆल-गदिया ही मझी अरा चरियो तरा चार गोटा उज्जना आलॊ रहचा। अबड़ा ही ख़ॊख़ा दरा मुन्दहारे ख़न्न ख़न्न ती निंदकी रहचा।

7पहिल उज्जना आलॊ ओन्टा लकड़ा लेक्‍खा रहचा, अरा दोसर उज्जना आलॊ ओन्टा साँड़ लेक्‍खा रहचा, अरा तिसर उज्जना आलॊ गे आलासी लेक्खा मुही रहचा, चौथा उज्जना आलॊ ओन्टा उढियारना गरूंड़ लेक्‍खा रहचा।

8अरा चरियो उज्जना आलॊ गे ओर्त ओर्त गे छै छै गोट डेना रहचा, अरा भितरी बहरी ख़न्न ख़न्न ती निंदकी रहचा। अरा अबड़ा उल्‍ला अरा माख़ा बिगर ठकरका एन्ने ब'अतेम र'आ लगिया, “उर्मी ती सवंगिय धर्मे उर्बस नेम्‍हा र'अस, नेम्‍हा र'अस, नेम्‍हा र'अस, नॆ रहचस, अरा र'अदस, अरा बर'ऊ र'अदस।”

9एका एका बारी अबड़ा उज्‍जना आलॊ बॆल-गदिया नू उक्‍का हुल्‍लो ती हुल्‍लो गूटी उज्‍जुसी महबा, अरा मईन, अरा धन्‍यवाद ननी,

10आ बारी आ बारी चौबीसो सेयान आलर बॆल-गदिया नू उक्कुसी मुन्दहारे ख़ेडमूली खत्रनर ती, हुल्‍लो ती हुल्‍लो गूटी उज्‍जुसी महबा नन्नर। अरा एन्ने ब'अनुम बॆल-गदिया ही मुन्दहारे तम्है मुकुट आबोन ओक्‍त'अनर चि'अनर,

11“अना एम्‍है धर्मे उर्बायो! नीन महबा अरा मईन अरा सवंग ख़क्खना ही जॊगे र'अदय, एन्‍देरगेका नीनिम उर्मिन गढ़चकय, अरा निंग्है मने तिम अबड़ा गढ़्रका ती उज्जी।”

← Chapter 3 Jump to: Chapter 5 →