Revelation 18

Kurukh (पुना गच्छरना NT (BSI))

← Chapter 17 Jump to: Chapter 19 →

1इबड़ा कत्था ही ख़ॊख़ा ऎन अउर ओन्टा मेर्ख़ा पैकासिन मेर्ख़ा ती एत्तना ईरकन। आस गे कोड़हे अदिया रहचा, अरा आसी बिल्चना ती ख़ॆख़ेल बिल्चिया केरा।

2अरा आस जॊरसरिया गड्डी सड़ा ती एन्ने बाचस, “कोहाँ नगरे बाबुलॊन खत्तरा केरा! खत्तरा केरा! आद नाद गुट्ठी ही डेरा, अरा उर्मी मलदौ बॊलता गुट्ठी ही र'अना अड्डा मंजा केरा। अरा उर्मी रकम ही मलदौ ऒड़ा ही खोता मंजा केरा। अरा उर्मी रकम ही मलदौ अरा घिनघिना मेक्‍खो ही मड़ा मंजा केरा।

3एन्‍देरगेका अदही पेहरन ही सोतरा नलख ही चिबाख़ारना ही अरखी ती उर्मी राजीतर ऊंखकानर। अरा ख़ॆख़ेल ता बॆलर अदही गने पेहरन ही सोतरा नलख नंजर। अरा ख़ॆख़ेल ता ख़ीन्दु-बीसुर अदही सुख-सौंरत ही कोड़हे चड्डे उरुब मंजर केरर।”

4फेन ऎन मेर्ख़ा ती अउर ओन्टा सड़ा एन्ने ब'अना मेंजकन, “अना एंग्‍है आलारो, आद ती उरखा बरा, होले नीम अदही पाप गुट्ठी नू मल मेस्र'ओर, अरा अदही मइय्याँ बरना सस्ती निम्‍है मइय्याँ मल बर'ओ।

5एन्‍देरगेका अदही पाप गुट्ठी मेर्ख़ा गूटी अंड़सिया केरा, अरा धर्मेस अदही गुन्हा गुट्ठिन सुरता नंजस।

6आद एकासे नन्नर गे किर्त'अर चिच्चा अन्नेम नीम अदगे किर्त'अर चि'आ। अरा अदही नंजका मलदौ नलख गुट्ठी ही लेक्खा अदगे दुई गुना किर्त'अर नना। अरा आद एकासे नन्नारिन ओन्ताचा अन्ने नीम अदही डुबहा नू दुई गुना निन्द'आ ती अदिन ओन्त'आ चि'आ।

7एवंदा आद तंगन मईन नंजा ती सुख-सौंरत गने उज्जकी र'ई, औंदम अदगे डाहरना अरा ख़ोदख़रना चि'आ, एन्‍देरगेका आद तंग्‍है जिया नू ब'ई, ‘ऎन बॆलनी मंजकी र'एन, ऎन रड़ियाही मल्लेन, ख़ोदख़रना नू इकला हूँ मल खत्र'ओन।’

8औंगे उन्दुल नुम खे'अना अरा ख़ोदख़ोरना अरा कीड़ा ही सस्ती अदही मइय्याँ अंड़सा ख़च्‍चो, आद चिच्‍ची नू बस्‍र'ओ कालो। एन्‍देरगेका अदिन नेंवई ननू धर्मे उर्बस सवंगियस र'अस।”

9फेन ख़ॆख़ेल ता बॆलर नॆ अदही गने पेहरन ही सोतरा नलख नंजका ती सुख-सौंरत उज्जना उज्जियर, इकला आर अदही ऒलना ही कुहड़न ऎरोर, आर अदगे चींख़ोर अरा कॊड़र'ओर।

10अरा आर अदही सस्ती ही इल्चिक'आ ती गेच्‍छम इज'ओर ती ब'ओर, “अनय कोहाँ नगरे बाबुलॊन, अनय बड़ियर नगरे बोख़! बोख़! इकिम घड़ी निंग्है मइय्याँ नठारना बरचा केरा।”

11अरा ख़ॆख़ेल ता ख़ीन्दु-बीसुर अदगे चींख़ोर, ओलख़ोर, एन्देरगेका आर ही जिनिसन अक्कु ती नॆ हूँ मल ख़ॆन्दोर।

12आद आर ही ती सोना, चाँदी, अरा कोड़हे दाम ही पखना गुट्ठिन, अरा मोहोर गुट्ठिन, लेपलेपे अरा लील ख़ॆंसो अरा जोरजोरआ अरा ख़ॆंसो किचरिन, अरा उर्मी रकम ही महमहरना कंकन, अरा हथी खिसा ती कमचका उर्मी रकम ही आलॊन, अरा बग्‍गे दाम ही कंकन अरा पितल अरा पन्ना अरा नॆता पखना ही उर्मी रकम ही संजगिन,

13दालचीनी, अरा महकारना जिनिस गुट्ठिन, धूंप, गन्‍धरस, लोबान, अंगुर रासी, इसुंग, दौ गुंडा, गहूँ, अड्डो अरा भेंडो गुट्ठिन, घोड़ो अरा रन्‍थ गुट्ठिन, जॊंख़र अरा बिट्ठी ननू जॊंख़र ही उज्जना गुट्ठिन हूँ ख़ीन्दकी रहचा।

14अरा अबड़ा ख़ीन्दु-बीसुर अदिन ब'ओर, “अनय बाबुलॊन! निंग्‍है जिया पत्तारना ख़ंजपा निंग्‍है गुस्‍ते किर्रिम बिचकी र'ई, अरा निंग्है उर्मी सुख-सौंरत अरा फबना निंग्‍है गुस्‍ते नठारा केरा, अरा अबड़ा निंगा इकला हूँ अउर मल ख़क्ख्र'ओ।”

15आ नगरे गने ख़ीन्दका-पिटका ती उरुब मंजका इबड़ा आलॊ ही ख़ीन्दु-बीसुर अदही सस्ती ही इल्चिक'आ ती गेच्‍छम इज'ओर ती चींख़नुम ओलख़नुम ब'ओर,

16“ओख़! ओख़! अनय कोहाँ नगरे बाबुलॊन! एकाद लेपलेपे अरा लील ख़ॆंसो अरा ख़ॆंसो किचरी कूरकी रहचा, अरा सोना अरा कोड़हे दाम ही पखना अरा मोहर गुट्ठी ती झबरारकी रहचा।

17इकिम घड़ी नू ई लेक्खा कोहाँ खुर्जी नठारा केरा।” कोहाँ डोंगा चलाब'उर ओर्मर, अरा कोहाँ डोंगा नू कट्टुर ओर्मर, अरा कोहाँ डोंगा नू नलख ननू ओर्मर, समुदर नू ख़ीन्दू-बीसू ओर्मर गेच्‍छम इज्‍जका र'ओर।

18अरा अदही ऒलना ही कुहड़न ईरका ती जॊरसरिया चिच्चियार'ओर ती ब'ओर, “एका नगरे ई कोहाँ नगरे लेक्‍खा र'ई?”

19अरा अबड़र रीड़ोन तम्‍है तम्है कुक्‍कु नू तप'आ ननोर ती चींख़नुम खोबरारनुम जॊरसरिया चिच्चियार'ओर ती ब'ओर, “ओख़! ओख़! अनय कोहाँ नगरे बाबुलॊन! कोहाँ डोंगा उर्बर ओर्मर इदही खुर्जी ती दिम उरुब मंजकाचर। इकिम घड़ी नू ई लेक्खा ईद नठारा केरा।

20अनय मेर्ख़ा ता आलॊ, अना नेम्‍हा आलारो अरा तइरकारो अरा धर्मेसी कत्था तिंगुरो! इदही नठारना ही चड्डे रिरयार'आ, एन्देरगेका आद एकासे निम्हा गने नंजा अन्नेम धर्मेस अदिन नेंवई नंजकादस”

21फेन ओन्टा सवंगिय मेर्ख़ा पैकस ओन्टा कोहाँ जता ही लेक्‍खा ओन्टा पखनन चॊदस ती समुदर नू हिबिड़यस ती एन्ने बाचस, “कोहाँ नगरे बाबुलॊन एन्नेम कोहाँ सवंग ती खत्रतार'ओ, अरा आद अक्कु ती इकला हूँ मल ख़क्‍ख्र'ओ।

22अस्‍सु आलर, अरा तमुर्रा अस्सुर, अरा बंसरी ऊर'उर, अरा पेंड़हे ऊर'उर ही ख़रख़ना अक्‍कु ती इकला हूँ निंग्है नू मल मेन्‍द्र'ओ। अरा एकअम नलखन ननुस निंग्‍है नू अक्‍कु ती इकला हूँ मल ख़क्‍ख्र'ओस। अरा जता ख़रख़ना ही सड़ा निंग्‍है नू अक्कु ती इकला हूँ मल मेन्‍द्र'ओ।

23अरा बिल्‍ली निंग्‍है मइय्याँ अक्कु ती इकला हूँ मल रफ'ओ। बेंजा जॊंख़ अरा बेंजा पेल्‍लो ही सड़ा निंग्है नू अक्कु ती इकला हूँ मल मेन्‍द्र'ओ। निंग्है ख़ीन्दु-बीसुर दिम ख़ॆख़ेल ता कोहाँ आलर रहचर। अरा निंग्‍है देवड़ा नन्ना ती उर्मी जाती ता आलर बेड़ारका रहचर।

24अरा धर्मेसी कत्था तिंगुर ही ख़ॆंस, अरा नेम्‍हा आलर ही ख़ॆंस, अरा ख़ॆख़ेल नू पिटरका ओर्मर ही ख़ॆंस अइय्यम ख़क्‍खरा।”

← Chapter 17 Jump to: Chapter 19 →