Revelation 15

Kurukh (पुना गच्छरना NT (BSI))

← Chapter 14 Jump to: Chapter 16 →

1इदही ख़ॊख़ा ऎन मेर्ख़ा नू अउर ओन्टा कोहाँ अरा अजगुत चिन्हन ईरकन। सात गोटा मेर्ख़ा पैकर सात गोटा सस्ती गने इज्जर। इबड़ा छेद्दे सस्ती हवे, एन्‍देरगेका इबड़ा ही मंजका ती धर्मेसी कोड़हे खींस मुंजुर'ओ क'ओ।

2अरा ऎन चिच्‍ची गने मेस्रका काँच ही समुदर लेक्खा ओन्टन, अरा नॆ आ मेक्‍खो अरा अदही मूर्ती अरा अदही नामे ही गनती आबोन जित्तचका रहचर आरिन ईरकन। आर आ काँच ही समुदर गुसन धर्मेसी तमा गे चिच्का तमुर्रा गुट्ठिन धरचका ती इज'आ लगियर।

3अरा आर धर्मेसी जॊंख़स मूसासी डंडीन अरा भेंडो ख़द्द मसीसी डंडीन पाड़ियर, “अना उर्मी ती सवंगिय धर्मे उर्बायो, निंग्‍है नलख गुट्ठी कोहाँ अरा अजगुत र'ई। जुग गुट्ठी ही बॆलायो, निंग्‍है डहरे गुट्ठी उजगो अरा मानिम र'ई।

4अना उर्बयो, निंग्‍है ती नॆ मल एल्‍चो? अरा नॆ निंग्‍है नामे ही महबा मल ननो? एन्‍देरगेका नीन ओर्त लेका नेम्‍हा र'अदय। उर्मी राजी बर'ओ ती निंग्है मुन्दहारे ऒड़ लग्‍गो, एन्‍देरगेका निंग्‍है उजगो ही नलख गुट्ठी दहदर मंजकी किरकी र'ई।”

5इबड़ा कत्था ही ख़ॊख़ा ऎन ईरकन ख़ने, मेर्ख़ा नू मन्दिर गोवाह ही नेम्हा कुमबा गने तिसगरका रहचा।

6अरा सात गोटा सस्तिन उइय्का सात गोटा मेर्ख़ा पैकर मन्दिर ती उरखर। आर सफा अरा बिलचना पेलपेले किचरी अत्तका ती एवंख़ नू सोना ही गतला हॆंचका रहचर।

7आ बारी अबड़ा चरियो उज्‍जना आलॊ ती ओन्टा अबड़ा सतियो मेर्ख़ा पैकर गे हुल्‍लो ती हुल्‍लो गूटी उज्‍जू धर्मेसी कोड़हे खींस ती निंदका सात गोटा सोना ही डुबहन चिच्‍चर।

8अरा धर्मेसी महबा अरा सवंग ती मन्दिर कुहड़ा ती निंदिया केरा। अरा अबड़ा सतियो मेर्ख़ा पैकर ही सतियो सस्ती ही अरगी मुंजुरना गूटी नॆ हूँ मन्दिर नू कोर'आ पोल्‍लर।

← Chapter 14 Jump to: Chapter 16 →