Revelation 22

Kurukh (पुना गच्छरना NT (BSI))

← Chapter 21 Jump to:

1इदही ख़ॊख़ा आ मेर्ख़ा पैकस एंगन बिल्‍लोर लेक्‍खा झलकारना उज्‍जना ही अम्मु ही ख़ाड़न ऎदस। आद धर्मेस अरा भेंडो ख़द्दासी बॆल-गदिया ती बाह'ई।

2अरा आद नगरे ही मझी ता मुध सड़क नू बाह'आ लगिया। अरा ख़ाड़ ही ई पक्खे अरा आ पक्‍खे उज्‍जना ही मन्न गुट्ठी रहचा, अरा अबड़ा मन्न बारा रकम ही ख़ंजपा चि'आ लगिया, अरा अबड़ा ओन ओन महिना नू ओन ओन रकम ही ख़ंजपा चि'आ लगिया, अरा अबड़ा मन्न ही अतख़ा गुट्ठी ती उर्मी जाती जाती ता आलर कोड़े मना लगियर।

3अरा अक्‍कु ती इन्द्रिइम स्राप हूँ मल मनो, अरा धर्मेसी अरा भेंडो ख़द्दासी बॆल-गदिया आ नगरे नू र'ओ, अरा आसी जॊंख़र आसी सुसर ननोर।

4अरा आर आसिन मुंही मुंहिन ऎरोर, अरा आसी नामे आर ही कपड़े नू लिख्रकी र'ओ।

5अरा असन माख़ा मल मनो, अरा आर गे बिल्‍ली अरा बीड़ी ही बिल्ली ही चाड़ मल मनो, एन्देरगेका धर्मे उर्बस आर गे बिल्‍ली मनोस। अरा आर हुल्‍लो ती हुल्‍लो गूटी राजी ननोर।

6फेन आ मेर्ख़ा पैकस एंगन बाचस, “इबड़ा कत्‍था पत्त'अना जॊगे अरा मानिम र'ई। धर्मे उर्बस नॆ तंग्है कत्था तिंगुर ही बॊलता गुट्ठिन तंग्है तबे नू नन्दस, आस चाँड़हे मन्ना ही चाड़ र'अना कत्था गुट्ठिन तंग्है जॊंख़र गे ऎद'आ गे तंग्है पैकासिन तइय्कादस।”

7येसुस ब'अदस, “ऎरा, ऎन चाँड़हे बर'आ लगदन। नॆ ई पुथी नू र'अना ख़ॊख़ा मन्ना एंग्है कत्था गुट्ठिन मन्दस, आस आसीस ख़क्‍खू आलस हिकदस।”

8ऎन यॊहन हिकदन, नॆ इबड़ा कत्‍था गुट्ठिन ईरकन अरा मेंजकन। एकाबारी ऎन ईरकन अरा मेंजकन ख़ने, एका मेर्ख़ा पैकस एंगन इबड़ा कत्‍था गुट्ठिन ऎद'आ लगियस आसिन ऒड़ लग्गा गे आसी ख़ेडमूली खत्रकन।

9ख़ने आस एंगन बाचस, “ऎरा, एन्ने अमा नना, ऎन हूँ निंग्‍है गने अरा येसुसी पत्त नू गोवाह चि'ऊ निंग्‍है भईर गने अरा धर्मेसी कत्था तिंगुर गने अरा ई पुथी ता कत्था गुट्ठिन मन'उर गने संगे जॊंख़न हिकदन। औंगे धर्मेसिन दिम ऒड़ लग्गा।”

10फेन आ मेर्ख़ा पैकस एंगन बाचस, “ई पुथी ही ख़ॊख़ा मन्ना धर्मेसी कत्‍था गुट्ठिन अमा मरका नना, एन्‍देरगेका इबड़ा कत्था मन्ना ही बेड़ा हेद्दे अंड़‍सकी र'ई।

11मलदौ ननुस अउरिम मलदौ नन्नुम र'अदस नेकअन, अरा मड़िख़का जियातस अउरिम मड़िख़का जिया गने र'अस नेकअन, अरा उजगो आलस अउरिम उजगो नलख नन्नुम र'अदस नेकअन, अरा नेम्‍हा आलस अउरिम नेम्‍हा र'अदस नेकअन।”

12येसुस ब'अदस, “ऎरा, ऎन चाँड़हे बर'आ लगदन। अरा ओर्त ओर्त नंजका ही लेक्‍खा आस गे ऎन चि'अना इनाम एंग्‍है गुसन र'ई।

13ऎन अल्‍फा अरा ओमेगा, मुन्द ता अरा ख़ॊख़ा ता, ऒरे अरा छेद्दे हिकदन।

14एकार तम्‍है किचरी गुट्ठिन नॊड़नर ती सुध उइय्नर, आर आसीस ख़क्ख'ऊ र'अनर। आर लेका नगरे ही बली ती कोर'आ गे अरा उज्‍जना ही मन्न ही ख़ंजपन मोख़ा गे अदिया ख़क्खोर।

15लिकिन अल्‍ला लेक्खा नेम्हा मलका आलर, अरा टोनहर, अरा पेहरन ही सोतरा नलख ननुर, अरा आल पिटुर, अरा मूर्तिन ऒड़ लग्गुर, अरा ठकवा कत्‍था गुट्ठिन पत्त'अरकी अबड़ा नू ईकू ओर्मर नगरे ही बहरी र'ओर।

16ऎन येसु एंग्‍है पैकासिन इदगे तइय्कन का आस इबड़ा कत्‍था गुट्ठी ही पत्त नू कलीसिया गुट्ठी नू निमा गे तेंगोस। ऎन दाऊद बॆलासी कोड़हे मुध जंईपुंई हिकदन, अरा ऎन लौकारना बिज-बीनको हिकदन।”

17धर्मेसी बॊलतस अरा बेंजा पेल्लो येसुसिन “बरा” ब'अनर। अरा इदन मिनुस हूँ “बरा” ब'अदस नेकअन। अरा एकास ओनक'आ र'अदस आस बरदस नेकअन, अरा एकास पत्तारदस आस उज्जना अम्मन सिथियम हो'अदस नेकअन।

18ई पुथी ता ख़ॊख़ा मन्ना धर्मेसी कत्था गुट्ठिन मिनू ओर्मर गे एंग्है चेताब'अना ईद र'ई का: नीकईम इय्या लिख्रका इबड़ा कत्था गुट्ठी नू इन्द्रिइम कत्थन जोड़दस होले, धर्मेस ई पुथी नू लिख्रका सस्ती गुट्ठिन आसी मइय्याँ बड़हाब'ओस।

19अरा नीकईम ई पुथी ही ख़ॊख़ा मन्ना धर्मेसी कत्‍था गुट्ठी ती इन्द्रिइम कत्थन ओथ्ररदस होले, धर्मेस ई पुथी नू लिख्रका उज्‍जना ही मन्न अरा नेम्‍हा नगरे नू आस गे र'अना भागन ओथ्र'ओस चि'ओस।

20इबड़ा कत्‍था गुट्ठी गे गोवाह चि'ऊ येसुस ब'अदस, “हाँ, ऎन चाँड़हे बर'आ लगदन।” आमेन! अना येसु उर्बायो बरा!

21उर्बा येसुसी मया नीम ओर्मर मइय्याँ र'अन नेकअन।

← Chapter 21 Jump to: